Toe fono Falelima i Sisifo mo le sailiina o sona Kovana Itumalo
Le afioga i le Alo o Salamasina, le ali’i Senatoa ia Satele Galu Satele ma ni isi o lona Itumalo ina ua mae’a le fono a le Falelima i Sisifo mo le sailiina o se tasi na te fa’aauauina le tofi o le Kovana Itumalo sa nofoia e le afioga a Lualemaga E. Faoa ua tu’umalo. [ata AF]
O le itula e 10:00 i le taeao o le aso Faraile nei, o a taeao lea ua fa’atulaga e usuia ai le fonotaga lona lua a le Falelima i Sisifo, mo le sailia o se tasi e avea ma o latou Kovana Itumalo, na te fa’aauauina le nofoa sa tauaveina mai e le afioga ia Lualemaga E. Faoa ua tu’umalo.
O le fonotaga lona lua mo le Falelima i Sisifo sa valaauina lea e le Failautusi o le Ofisa o Mataupu Tau Samoa, le afioga i le Maoputasi ia Mauga Tasi Asuega, e mafua mai i le fesiligia e le to’atele o le fa’aiuga i lana ulua’i fonotaga sa usuia i le maota o Asotau i le masina na te’a nei, lea sa tofia ai e Satele le afioga i le Sa’o ia Tuiasaina S. Esera e avea ma Kovana Itumalo o le Falelima i Sisifo.
I se fa’aaliga sa fa’alauiloa e le Sui Failautusi o le Ofisa o Mataupu Tau Samoa, tofa i le Tootoo ia Malemo Tausaga i luga o leitio fa’asalalau i le vaiaso nei, o loo ia talosagaina ai le Falelima i Sisifo ina ia auai atu i le fonotaga lona lua lea ua valaauina e le Failautusi o le Ofisa o Mataupu Tau Samoa, mo le toe soalaupuleina o le mataupu e fa’atatau i se latou Kovana Itumalo.
E pei ona lomia muamua e le Samoa News i le masina na te’a nei, o le mae’a ai o le ulua’i fonotaga a le Falelima i Sisifo i le masina na te’a nei, na fono ai loa le afioga i le ali’i kovana ia Lolo Matalasi Moliga ma sui o le Ofisa o Mataupu Tau Samoa, ma fa’ailoa i ai le tulaga tonu e pei ona i ai le mataupu, i le mae’a ai lea ona fesiligia e ni isi o le itumalo o Tualatai o le fa’aiuga e pei ona tofia ai e Satele le afioga i le Sa’o ia Tuiasina e avea ma Kovana Itumalo, a o lea e le i fono le Itumalo.
Na taua e le afioga a Satele ina ua fesiligia e le Samoa News i le aso ananafi, e le i o o atu se fa’aaliga mai le Ofisa o Mataupu Tau Samoa e logoina ai o ia e uiga i le fonotaga lea ua ia fa’alogo fa’apea sa fa’asalalau i leitio.
Sa ia saunoa atili e fa’apea, e le malamalama o ia poo le a lenei fono ua toe talo a o lea ua mae’a ona tasi le Falelima i Sisifo i lana fa’aiuga i lana ulua’i fonotaga sa usuia i le masina na te’a nei.
“O lea ua mae’a ona tasi le Falelima i Sisifo i lana fa’aiuga, pe to’atasi pe to’alua e i ai i le fono a le Falelima i Sisifo, o i latou lava ia sa faia le fa’aiuga”, o le saunoaga lea a Satele.