Na lagolagoina uma e afioga i Faipule le toe filifilia o le tofa i le Tau Tootoo ia Savali Talavou Ale, e toe avea ma Fofoga Fetalai o le Maota o Sui mo le isi 2 tausaga o loo lumana’i nei, e ala i le palota fulisia na fa’aalia i le taimi na fa’atauto ai afioga i Faipule o le maota o sui i le taeao ananafi.

O le Failautusi tuai o le maota o sui ia Fialupe Lutu, lea fo’i ua toe filifilia e avea ma Failautusi mo le isi 2 tausaga, na ta’ita’ia le saunoga o le fa’atautoina o afioga i Faipule.

O le afioga i le Fa’amasino Sili ia Michael Kruse na taitaia le sauniga o le fa’atautoina o afioga i Faipule filifilia o le nofoaiga lona 35 a le Fono Faitulafono, ao molimauina e le to’atele o uo ma aiga na lolofi ai e molimauina lenei sauniga taua.

Ao lei fa’ataunu’uina le sauniga o le fa’atautoina o Faipule, na mua’i tolaulauina le tusi mai le Komesina o le Ofisa o Palota a le atunu’u, e fa’ailoa mai ai suafa o Faipule e to’a 21 ua fa’amaonia ma aloaia le avea ma sui filifilia o itumalo eseese mo le nofoaiga fou ua nofoia nei.

O le mae’a ai ona fa’amaonia o Faipule filifilia mo le nofoaiga fou, na sosoo ai loa ma le fa’atautoina o i latou e le afioga i le Fa’amasino sili.

O le afioga i le ali’i faipule ia Toeaina Faufano Autele na saunoa e fa’atula’i le suafa o Savali e toe avea ma Fofoga Fetalai o le maota o sui, i le taimi na saili ai ni sui fa’atutu mo le tofi, lea fo’i na fa’aluaina e le afioga i le ali’i faipule ia Puleleiite Tufele Li’amatua ma le mamalu o le maota o sui.

Na taua e le afioga Toeaina e fa’apea, e le tau fa’alauiloaina le tautua a le afioga a Savali, ona o ia o le sui faipule ua tele tausaga o tautua i le nofoa a lona itumalo o Alataua, lea ua atoa le 36 tausaga o lana tautua, ma fa’ailoa ai loa le lagolagoina e afioga i Faipule o le tofa Savali e toe avea ma ta’ita’i mo le isi 2 tausaga, ina ua fulisia le palota e 20-0 sa alo atu i ai sui uma o le maota.

O le mae’a ai ona toe filifilia o Savali e avea ma ta’ita’i o le maota o sui, na ia taitaia ai loa vaega mulimuli o loo totoe o le sauniga o le fa’atautoina o sui o le maota, e aofia ai le filifilia o se Failautusi ma se Satini na te fa’amamaluina tauaofiaga a le maota, ma toe filifilia Failupe Lutu e avea ma Failautusi, ae o le susuga ia Line Olo lea ua toe filifilia e avea ma Satini o le maota.

I le fa’aiuga o le sauniga o le fa’atautoina o afioga i Faipule, na fa’afetaia ai e Savali le tofa fa’aalia e ala i le toe filifilia o ia e avea ma ta’ita’i o le maota, ma ua ia sauni latou te galulue fa’atasi ma le maota atoa mo le manuia o le auaunaga a le Fono Faitulafono.

Sa ia fa’afetaia fo’i aiga ma uo na maua le avanoa e fa’atasi atu ai i lenei sauniga taua, lea ua mafai ai ona lagona le fiafia o sui filifilia e fa’atino la latou tautua mo le atunu’u i lenei nofoaiga.

E pei ona silafia, o sui e to’a 21 o le maota o sui ua mae’a nei ona fa’atauto e aofia ai sui tuai e to’a 15 ma sui fou e 6 lea ua manumalo mai i nofoa a o latou itumalo ta’itasi. O le afioga i le Tama’ita’i Faipule ia Vui Florence Vaili Saulo, e na o ia le faipule tama’ita’i ua i ai mo le nofoaiga lenei a le maota o sui.