Ads by Google Ads by Google

Toe filifilia afioga Gaoteote avea ma Senatoa Itumalo Vaifanua


Le afioga i le Tama’ita’i o le Ao ia Gaoteote Palaie Tofau [ata AF]
ausage@samoanews.com

O le mae’a ai o le sailiga tofa a le Itumalo o Vaifanua i le aso To’ona’i na te’a nei i le afioaga i Vatia, na tasi ai loa le fa’atofalaiga i le paia o fa’auluuluga o le Itumalo, ina ia toe tu’uina atu le nofoa o le itumalo mo le isi 4 tausaga o lo o lumana’i nei, e toe fa’aauau e le afioga i le Tama’ita’i o le Ao, le afioga i le ali’i Senatoa ia Gaoteote Palaie Tofau, o ia fo’i lea o le Peresetene o le Senate mo le nofoaiga lona 34 lea na fa’atoa mae’a i le lua vaiaso talu ai.

 

O le itumalo o Vaifanua e aofia ai afioaga o Vatia, Aoa, Alao, Tula ma Onenoa, ma o le tofi o le Itumalo mo le isi 4 tausaga o lo o lumana’i nei, ua oo atu nei lona fa’asologa i le afioaga i Aoa.

 

Na taua e ni isi o le Itumalo le sologa lelei o le fonotaga mo le sailiina o se tasi e nofoia le nofoa o le itumalo, e leai fo’i se vevesi poo ni manatu e ono lepeti ai le nonofo filemu o ta’ita’i o le itumalo.

 

O le afioaga i Aoa na muamua taoto atu i ai le avanoa mo sa latou sui fa’atu, ona o i latou lea ua oo i ai le fa’asologa, ma saunoa fa’afetai ai le afioga i le Tama a le Malo, Aumoeualogo Te’o Fuavai e fa’afetaia ai le afioga i le Tama’ita’i o le Ao e tusa ai o lona tauaveina o le nofoa o le itumalo mo tausaga e 8 ua tuana’i.

 

“E ui i le to’atele fo’i o ni isi sa latou lagolagoina le tatau lea ona se’e atu le nofoa o le itumalo e tauave e le afioga a Aumoeualogo, ae na fa’aaloalo le afioga i le Tama a le Malo ma ia toe lafo atu ai le nofoa i le afioga i le Tama’ita’i o le Ao na te fa’aauauina, lea fo’i na tali i ai le itumalo atoa”, o le saunoaga lea a se tasi o molimau fa’atuatuaina i le Samoa.

 

Ina ua mae’a le saunoaga a le afioga a Aumoeualogo mai Aoa, na sosoo ai loa lea ma saunoaga a fa’auluuluga o isi afioaga o le itumalo e aofia ai Alao, Tula ma Onenoa, ae fa’ai’u ai i le saunoaga a le afioga i le ali’i senatoa ia Gaoteote, ma ia fa’afetaia ai le itumalo e tusa ai o la latou lafo.

 

O le mae’a ai o le fonotaga na fa’ai’u ai loa i tulaga o fa’aaloaloga masani a le atunu’u aemaise ai tulaga i le fofoga taumafa, ma tatala ai loa le fili ali’i i le taeao lava o le aso Toonai na te’a nei.

 

 Na taua e ni isi o fa’auluuluga o le Itumalo i le Samoa News e fa’apea, o le tausaga e 2009 na tofia ai e le Itumalo o Vaifanua le afioga i le Tama’ita’i o le Ao ia Gaoteote na te nofoia le nofoa o le Itumalo mo le fa tausaga.

 

Ae ina ua mae’a le ulua’i fa tausaga na nofoia ai e Gaoteote le nofoa o le itumalo, na toe tasi fo’i le itumalo na te toe fa’aauauina le nofoa mo le isi 4 tausaga, lea ua fa’aiuina i le tausaga lenei.

 

“E ui i le naunau o Fa’auluuluga o afioaga eseese o le itumalo i le tofi, o le itumalo lenei o Vaifanua e le naunau se tasi i le saili malo, ae naunau ina ia faia le fa’aiuga e manuia ma fealofani ai le itumalo atoa fa’apea ona ta’ita’i, aua o fa’aiuga e faia e ta’ita’i i le taimi nei, o fa’aiuga fo’i na e mulimuli i ai tupulaga ma fanau lalovaoa, ma o lea la ua tasi le fa’afitiga o aleaga i le paia o le itumalo, o le nofoa mo le isi 4 tausaga o loo lumana’i nei, o le a toe fa’aauau lea e le afioga i le Tama’ita’i o le Ao ia Gaoteote, ma ua atoa ai le 12 tausaga o lana tautua i le nofoa o le itumalo fa’apea ai le Fono Faitulafono a le atunu’u”, o le saunoaga lea a se tasi o molimau fa’atuatuaina sa ia fa’ailoa i le Samoa News tulaga o le fonotaga.

 

I le aso mulimuli o galuega fa’atino a le Fono Faitulafono, na saunoa ai le afioga ia Gaoteote e fa’afetaia afioga i Senatoa e tusa ai o galuega lelei sa latou fa’atinoina i lenei 4 tausaga o le a mae’a.

 

I le fa’aiuga o lana saunoaga sa ia saunoa ai e fa’apea, o ai lava le Senatoa e toe fo’i mai i le nofoa o le itumalo mo le isi 4 tausaga, e le suia lava le tautua a le maota maulauga, ae fa’aauau pea la latou faiga alofilima, o le auauna lea ma tautua mo se manuia o Tutuila ma Manu’a.

 

O ni isi o itumalo ua latou taua le taoto o a latou sailiga tofi e fa’atoa faia pe a maea le sailiga tofi a le atunu’u i le vaiaso fou.