Toe filifilia afioga Alo e avea ma Kovana o le Falelima i Sasa’e


Le afioga i le To’afia ia Alo Dr. Paul Stevenson lea ua toe filifilia e avea ma Kovana o le Falelima i Sasa’e mo le isi 4 tausaga, ma le afioga i le sui faipule a Amerika Samoa i le Laumua i Uosigitone, tofa Aumua Amata, i le mae’a ai o le fonotaga a le Falelima i Sasa’e e sailia ai so latou kovana o le Falelima, na usuia i le maota i Gagamoe i le aoauli o le aso Lulu na te’a nei. [ata AF]
ausage@samoanews.com

Ua toe filifilia nei le afioga i le To’afia ia Alo Dr. Paul Stevenson na te toe tauaveina le tofi o le Kovana o le Falelima i Sasa’e mo le isi 4 tausaga, ina ua talia e le Falelima la talosaga a le Itumalo o Ituau, ina ia toe taoto atu le tofi e fa’aauau pea e le latou Itumalo.

 

O le aoauli o le aso Lulu na te’a nei na usuia ai le fonotaga a le Falelima i Sasa’e i le malae i Gagamoe i Pago Pago, e sailia ai se tasi e avea ma Kovana o le Falelima.

 

Na fa’atumulia le malae i Gagamoe i Fa’asuaga ma Tapa’au o le Falelima i Tamali’i, tainane Tama Matua, Ponao’o ma Faleupolu, aemaise ai le mamalu taue’e o le Falelima atoa i Sasa’e na maua le avanoa latou te molimauina ai lenei fa’amoemoe taua.

 

O le mae’a ai o le ali’i taeao na feiloa’i ai le Falelima atoa, na fetalai ai loa le Tofa a Tuaolo sa fai ma fofoga o le aso, e fa’ailo le autu o le fonotaga, o le sailia lea o se tasi e avea ma Kovana o le Falelima mo le isi 4 tausaga, fa’atasi ai ma lona fa’ailoaina o le talosaga ua mae’a ona folasia e le Itumalo o Ituau, ina ia toe taoto atu le tofi latou te fa’aauauina.

 

Na maua le avanoa o le afioga a Alo e saunoa fa’afetai ai i le Falelima i Sasa’e e tusa ai o tausaga e 4 sa ia nofoia ai le nofoa, aemaise ai o le latou lagolagoina o lona tula’i mai e fa’atino tiute ma galuega mo le itumalo.

 

I le mae’a ai o lana fa’afetai, na ia toe fa’aoloolo maau ai i le Falelima mo se avanoa e toe tu’u atu ia te ia, e fa’aauau ai pea lana tautua i le nofoa o le Kovana o le Falelima.

 

“E tele galuega sa tatou galulue mai ai i lenei 4 tausaga, ae ou te tatalo atu ma le agaga maualalo, afai e tusa ai ma so outou finagalo, ou te fia auauna pea mo oe le Falelima”, o le saunoaga lea a Alo.

 

O le afioga i le Tama’ita’i o le Ao ia Gaoteote Palaie Tofau, o ia fo’i lea o le Peresetene o le Senate na saunoa e fai ma sui o Itumalo o Sua ma le Vaifanua, e fa’afetaia ai le Itumalo o le Maoputasi e tusa ai o le mafutaga, atoa ai ma lo latou fia fa’afofoga i se finagalo mai le afioga i le Maoputasi ia Mauga Tasi Asuega e uiga i lenei mataupu.

 

Ina ua maua le avanoa o le afioga i le Maoputasi ia Mauga, sa ia fa’aoloolo maau ai i le Falelima atoa, ina ia alolofa e talia le talosaga a Ituau, e ala i le toe tu’uina atu lea o le tofi o le Kovana o le Falelima i le afioga a Alo, lea fo’i na talisapaia fa’atuaeleele e le Falelima atoa e leai ma se isi na fa’atuiese.

 

O le mae’a ai ona talia e le Falelima atoa o le talosaga e toe fa’aauau ai e le afioga i le To’afia ia Alo le tofi, na saunoa fa’afetai ai loa le afioga i le Maoputasi ia Mauga e tusa ai o le faigofie o auala e fa’atino ai sailiga tofi a le Falelima.

 

“O le fa’aiuga ua tatou faia i le aso lenei (aso Lulu na te’a nei), ua atagia mai ai le tasi o tatou loto aemaise ai o le maualuga o le agaifanua a Samoa i itumalo ta’itasi o le Falelima, ou te manatu ina ia fa’aauau ai pea i le tulaga lea sailiga tofi a le Falelima, e atagia mai ai lo tatou nonofo fealofani ma le galulue fa’atasi”, o le saunoaga lea a Mauga ma fa’ai’u ai loa le fonotaga i fa’aaloaloga masani e aofia ai meaalofa tupe, taumafa fa’apea ai palapala malo na fa’aaloalo i ai le afioaga i Fagasa mo le mamalu o le Falelima.

Comment Here