O le ali’i e 54 tausaga le matua lea na tu’uaia i lona tu’uina atu o ni mariuana i se tamaititi aoga i le tausaga na te’a nei, ua poloaina e le Fa’amasinoga Maualuga lona tuua o le teritori ae toe fo’i atu i Samoa ma nofo mau ai mo le umi o lana faanofovaavaaia.

O le susuga a Galu Nofoa, lea o lo o taua i fa’amaumauga a le Fa’amasinoga, o le uncle o le ali’i aoga sa a’afia i lenei mataupu, ua ta’usala o ia i le moliaga mamafa o lona tufatufaina atu lea o fualaau fa’asaina i fanau e laiti i lalo o le tulafono.

O le vaiaso nei lea na tuuina mai ai le faasalaga a le fa’amasinoga fa’asaga ia Nofoa, lea na taofia mai lava i le toese i Tafuna talu mai le taimi na taofia ai o ia e Leoleo i le masina o Oketopa 2016.

O lo o tu’uaia fa’atasi Nofoa ma le ali’i faiaoga ia Ioane Alo, i lo la tu’uina atu lea o fualaau fa’asaina i fanau e talavou i lalo o le tulafono. O ali’i aoga o lo o a’afia i lenei mataupu, sa aooga i laua i le aoga maualuga a Tafuna i le taimi na tula’i mai ai lenei fa’alavelave i le tausaga na te’a nei.

O lenei fa’alavelave na tofu atu i le Ofisa o Leoleo ina ua maua e le Leoleopo o le aoga Maualuga a Tafuna ali’i aoga e to’alua o lo o la taulimaina se paipa o lo o i ai vaega o le pauta faasaina o le aisa.

Ae ina ua fesiligia e Leoleo ali’i aoga na a’afia, sa la fa’ailoa ai, o Nofoa ma Alo na tuuina atu fualaau fa’asaina nei ia laua.

O le vaiaso nei lea na lau ai le faasalaga a Nofoa, ae o  Alo lea ua fa’atulaga lana fa’amasinoga autu e fa’ataunu’uina i le fa’aiuga o lenei tausaga, ina ua le mafai ona latou  maua ma le malo se maliliega aufa’atasi e fa’ai’u ai lana mataupu.

Na faatoese Nofoa i le fa’amasinoga e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i lona aiga e tausi lana fanau. Sa ia folafola i le fa’amasinoga, o le taimi mulimuli lenei e toe tula’i ai o ia i soo se solitulafono i totonu o Amerika Samoa. Sa ia taua lona salamo ao taofia ai o ia i le toese.

Na talosaga le loia a Nofoa ia Douglas Fiaui i le fa’amasinoga ina ia fa’asala le ua molia i se fa’asalaga nofovaavaaia, ina ia maua ai le avanoa o le Fa’amasinoga e mata’ituina ai tulaga uma o lana nofo vaavaaia. Na taua fo’i e Fiaui e fa’apea, talu ai o lo o lelei pea pepa nofomau o Nofoa, ua ia talosagaina ai le tatau lea ona nofo pea o ia i le atunu’u e tausi lona aiga.

Na lagolagoina e le loia a le malo ia Christy Dunn le agava’a o Nofoa i se fa’asalaga nofovaavaaia, peita’i sa ia faailoa i le fa’amasinoga le matuia tele o lana gaioiga sa faia, o lona ave lea o fualaau faasaina i lona nephew o loo aoga, lea ua mafua ai ona a’afia lona nephew ma le isi tamaititi i solitulafono o le umia o fualaau fa’asaina.

E 10 tausaga na manatu le fa’amasinoga e fa’asala ai Nofoa atoa ai ma le salatupe e $5,000, peita’i o le tuliina o lana faasalaga faa falepuipui o le a faamalumalu, ae faanofovaavaaia o ia mo le 10 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 40 i le falepuipui i Tafuna. O le tuliina o lana faasalaga faa falepuipui e 40 masina o le a taofi, ae poloaina loa o ia na te tuua le teritori i se taimi vave lava, ma nofomau ai i fafo atu o Amerika Samoa mo le umi o lana nofovaavaaia e 10 tausaga.

Afai ae toe taumafai e ulufale mai i le atunuu ae lei mae’a le 10 tausaga o lana nofovaavaaia, o le a toe molia loa o ia i isi solitulafono mamafa i lona le usitaia lea o poloaiga a le fa’amasinoga.