O le ali’i lea ua ta’usala i lona fasi fa’amo’amo’a o lana uo tama’ita’i i totonu o le ta’avale, ua poloaina e le fa’amasinoga ina ia toe fa’afo’i atu o ia i Samoa, ma aumau ai mo le umi e 5 tausaga o lana fa’asalaga fa’anofovaavaaia.

E le gata i lea, ua poloaina fo’i e le afioga i le ali’i Fa’amasino ia Elvis P. Patea le loia a le malo ia Christy Dunn ina ia fa’atonu le sponsor a lenei ali’i ia totogi le sala e $1,800 ua fa’asala ai e le fa’amasinoga le ua molia, atoa ai ma le totogi o le pasese e toe fo’i atu ai o ia i Samoa.

O le ali’i o Karisi Tia’alii, 25 tausaga le matua na ulua’i tuuaia e le malo i moliaga mamafa e aofia ai le fa’aoolima i le tulaga muamua, fa’aoolima i le tulaga lua, taofia faasolitulafono o se tagata, atoa ai ma le gaoi. Ae i lalo o se maliliega na sainia e le ua molia ma le malo, na ia tali ioe ai i le moliaga o le faaoolima i le tulaga lua ma le taofia faapagota o se tagata, ae solofua e le fa’amasinoga isi moliaga sa totoe ai i le pepa o tagi sa latou fa’aulu.

I le tali ioe ai o Tiaali’i i moliaga e pei ona ta’usala ai o ia e le fa’amasinoga, sa ia ta’utino ai i le fa’amasinoga e fa’apea, a o la malaga i totonu o le ta’avale ma lana uo tama’ita’i i le aso 12 Tesema 2017, sa ia tago atu ua futi mai lona lauulu ae tu’i ona foliga aga’i i le pito i luma o le ta’avale ma manu’a ai ona foliga.

Sa ia taua atili lona tago atu ma oomi le ulu o lana uo tama’ita’i i lalo, ina ia taofia ai o ia mai le oso i fafo ma le ta’avale.

Na faatoese ma loimata le ua molia e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i lona aiga e tausi lona Tina ma tautua lona aiga atoa.

Na taua e Tiaali’i e fa’apea, o se lagona fa’anoanoa ia te ia le maliu o sona Tama a o taofia ai o ia i le toese, ma ua oo atu ai lagona ia te ia, e le i lava lana tausiga i lona Tama. O le mafua’aga lea o lona naunau mo se avanoa e toe fo’i ai i lona aiga, se’i fa’aauau lana tausiga i lona Tina manu o maua le avanoa.

“Ou te ta’utino atu, ou te le toe solia se tulafono a le malo, ae ua ou fia fo’i i tua se’i toe fa’asa’osa’o mea ua fa’aletonu o lo’u olaga”, o le molimau lea a Tiaali’i i luma o le fa’amasinoga.

E lei manatu le loia a Tiaali’i ia Michael White na te toe fa’aopoopo se isi fa’amatalaga i le fa’amasinoga e ese mai i le folasaga sa folasia e le ua molia. Ae mo le loia a le malo, na talosaga le tama’ita’i ia Dunn i le fa’amasinoga ina ia fa’asala le ua molia i se fa’asalaga faanofovaavaaia, e aofia ai le poloaina o ia na te tuliina sina fa’asalaga fa’a falepuipui.

Na talosaga atili fo’i Dunn i le fa’amasinoga ina ia poloaina le ua molia na te totogi le tupe e $1,800, o le pili lea a le na a’afia e tusa ai o le totogi o lona taotoga i le falema’i.

Saunoa le afioga i le ali’i Fa’amasino ia Elvis P. Patea e fa’apea, o le gaioiga sa faia e le ua molia fa’asaga i le na a’afia, o se gaioiga e matua sili ona matuia ma ogaoga.

“E ui o lea fa’atoa ta’usala oe i se solitulafono i luma o le fa’amasinoga maualuga, ae i le silasila a le fa’amasinoga i le gaioiga sa e faia, e fai lava si matuia ma ogaoga, ma ua alaga tatau ai se fa’asalaga talafeagai mo oe”, o le saunoaga lea a Patea.

Mo le moliaga o le faaoolima i le tulaga lua, e 5 tausaga na manatu le fa’amasinoga e fa’asala ai le ua molia. Mo le moliaga o le taofia faapagota o se tagata, e 7 tausaga na manatu le fa’amasinoga e fa’asala ai o ia. O ia faasalaga uma ua fa’amalumalu, ae ua manatu le fa’amasinoga e faanofovaavaaia o ia mo le 5 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 20 i le toese i Tafuna, peita’i, a mae’a loa ona ia tuliina masina e 12, ona taofi lea o le 8 masina o lo o totoe, ae poloaina loa o ia ina ia tuua le teritori ae toe fo’i atu i lona atunu’u ma aumau ai mo le umi o lana nofovaavaaia.

Ua poloaina o ia e totogi le tupe e $1,800 mo le pili o le falema’i a le ua molia, ma o lea tupe o le a totogi e lana sponsor.