Ads by Google Ads by Google

Tete’e Thomas Siaumau moliaga, aofia ai moliaga mamafa e 6


[ata: SN]
fili@samoanews.com

O ali’i o lo’o masalomia i le auai i le tafanaina o se ta’avale leoleo i le masina ua te’a, ua ia teena moliaga fa’asaga ia te ia.

 

O le aso 29 o Tesema 2017 sa tulai ai le susuga ia Thomas Siaumau i luma o le Fa’amasinoga Maualuga i lana uluai iloiloga ma ia teena ai moliaga sa faila e le malo.

 

O le loia fautua ia Douglas Fiaui, sa tulai mo le ua molia ma fa’ailoa i le fa’amasinoga le teena e Siaumau o moliga e iva e pei ona faila e le malo. I le teena ai e Siaumau o moliaga a le malo, ua fa’atulaga ai loa le isi ana iloiloga i le masina fou.

 

Mai moliaga e iva o lo’o tuuaia ai Siaumau, e 6 moliaga mamafa, ae 3 moliaga mama.

 

O le amataga o le vaiaso ua te’a na taua ai e le afioga i le Komesina o Leoleo, Le’i Sonny Thompson, i le Samoa News e fa’apea talu ai ona o lo’o fa’auau pea suesuega a leoleo i lenei mataupu, o le a le mafai ai ona auiliiliina mai tu’uaaiga po’o moliaga fa’asaga ia Siaumau.

 

O le lua vaiaso talu ai sa taofia fa’apagota ai e leoleo ia Siaumau ina ua faila e le malo moliaga fa’asaga ia te ia, e auala mai lea i se poloaiga a le fa’amasinoga.

 

Ae o le aso 27 o Tesema, sa tulai ai Siaumau i luma o le afioga i le ali’i fa’amasino ia Fiti A. Sunia, i le Fa’amasinoga Fa’aitumalo, mo se tasi o ana iloiloga. Ma i lea taimi sa talosagaina ai e le itu tete’e le ali’i fa’amasinoga e fa’atulaga se tino i tupe e mafai ai ona tatala i tua Siaumau e fa’atalitali ai lana mataupu a’o fa’agasolo i luma o le fa’amasinoga.

 

Saunoa le loia fautua a le ua molia, Ryan Anderson, e faapea i le taimi na taofia ai Siaumau e leai se tupe fa’atulaga e tatala ai o ia i tua, ae i lalo o le Fa’avae Toe Teuteu a Amerika Samoa, o lo’o taua ai le agava’a o Siaumau i se tupe fa’atulaga e tatala ai i tua.

 

Ae sa fiau le loia a le malo, Woodrow Pengelly, ma fa’atuiese i lea talosaga ona e 6 moliaga mamafa fa’asaga ia Siaumau, ma e le o se taimi muamua foi lea ua tulai ai lenei taulealea i luma o le fa’amasinoga.

 

Ae sa tali le susuga ia Anderson e faapea e moni e le o se taimi muamua lea o Siaumau i molia ai i le tulafono, ae o lo’o lo’o i ai lona aia tatau i lalo o le fa’avae o Amerika Samoa e fa’atulaga ai le pone - pe o le tupe e tatala ai i tua.

 

Sa toe finau Pengelly e faapea sa i ai nisi o mataupu faapea i le vaitaimi ua fano, sa le fa’atulagaina ai e le faamasinoga se tupe o se pone, ona o le tulaga matuia o i latou sa tuuaia i solitulafono.

 

I le fa’aiuga a le Sunia, sa ia fa’atumau ai pea e leai se tupe fa’atulaga e tatala ai le ua molia ia tua, ma e mafai e le itu tete’e ona toe laga lenei mataupu i luma o le Fa’amasinoga Maualuga.

 

E pei ona lipotia e le Samoa News i lana lomiga ia Tesema 19, o lo’o taua ai e le Komesina o Leoleo ia Le’i Sonny Thompson i se fa’atalanoaga ma le Samoa News e faapea o le po o le aso 14 o Tesema sa tafana ai e se tagata pe o ni tagata se ta’avale leoloe i le nofoaga o le Tony Solaita Baseball Field in Tafuna.

 

O le fa’alavelave e pei ona saunoa le Komesina o Leoleo, na tula’i mai i le taimi na aga’i atu ai se ta’avale a Leoleo e tali i se valaau mai le Leoleo po a le ASTCA, e uiga i ni cherry bomb na tauai atu e ni tagata i totonu o le lotoa a le ASTCA.

 

Na taunu’u Leoleo ma taamilo i le lotoa mo sina taimi, ona fa’aauau atu ai lava lea o le siaki masani a Leoleo i le itu o lo o i ai le malae Baseball i tua atu o le o le nofoaga autu a le ASTCA.

 

A o fa’atino le siaki masani a Leoleo, sa moimauina le faitoto’a o le pa o loo matala, ona manatu ai loa lea o Leoleo ina ia siaki totonu o le lotoa pe aisea ua matala ai le pa o le malae Baseball. Na oso i fafo le isi Leoleo ma savali atu e siaki le pa ae ave atu e le isi Leoleo le ta’avale.

 

I le taimi na tulioso uma ai i fafo Leoleo ma aga’i atu i totonu o le lotoa, na la vaaia ai loa se moli (flash) e foliga o se moli o se fana o loo aga’i mai i le isi itu pogisa o le malae. O iina na la iloa ai loa se tagata o loo ia fanaina le la ta’avale Leoleo.

 

O le isi pulufana na nuti nini’i ai le tioata pito i tua o le ta’avale pikiapu a Leoleo, ma agai atu ai le pulufana ma masae ai le vaega o le nofoa e faalagolago ai le ulu o le ave ta’avale, ae o le isi pulu na fana ma pu ai le faitoto’a o le pasese i le itu taumatau.