Na teena e se sui o se tasi o kamupani i le atunu’u tu’uaiga sa latou fa’a faigaluega ina se ali’i mai Fiti sa aumai faasolitulafono i Amerika Samoa mo le silia i le 2 tausaga e aunoa ma ni pepa nofomau.

Na taua e se sui o le Kamupani a le Island Technologies Inc i le Samoa News i le vaiaso na te’a nei, e le sa’o ripoti e faapea sa latou fa’a faigaluegaina le alii o Rusiate Tabele, sei vagana ai lona fa’atinoina o galuega fesoasoani mo le kamupani ma ni isi o le aufaigaluega ae maua ai sina tupe mo ia.

Na taua e Tabete i luma o le Fa’amasinoga Maualuga i le 2 vaiaso talu ai, na mafua ona ia osofaia ma gaoi meatotino a le kamupani, e tau faapaleni ai le laititi o lona totogi sa maua atu ai, e na o le $60 i le vaiaso.

O le Pulesili o le kamupani ma lona aiga, o tagatanu’u mai Fiti. O Tabete foi o se tagatanu’u o Fiti, o le sootaga lea na mafua ai ona manatu le kamupani e fia fesoasoani i lenei ali’i.

E tusa ai o le molimau a se sui o le kamupani i le Samoa News, ina ua le toe faigaluega Tabete o se alii fagota i luga o se va’a fagota, na aga’i atu ai loa e saili galuega i le latou kamupani.

“Sa matou suesueina o ia ma faamaonia ai, e leai ni ona pepa nofomau, e le fa’atagaina fo’i o ia ona galue i la matou kamupani poo se isi lava fo’i pisinisi i Amerika Samoa, ona e leai se fa’atanaga mai le Komiti Fa’afoe a le Ofisa o Femalagaaiga e galue ai o ia i le atunu’u”, o le molimau lea a le sui o le kamupani.

Ae talu ai o le fa’atauanau atu o Tabete i le kamupani mo se fesoasoani, na talia ai loa lana talosaga ma ofo atu i ai galuega teu fanua na te fa’atinoina, pe tusa o le 2 itula i le aso, ae na o le 2 aso o le vaiaso na te fa’atinoina ai ia galuega.

E le i umi ona galue Tabete i le kamupani i lona nofoaga i Faleniu ae tula’i mai loa le fa’alavelave e pei ona gaoia ai le tele o meatotino a le kamupani e aofia ai telefoni, laptops, mea pu’eata, ma isi lava totoga o oloa e alu i le uila. O oloa na gaoia e tusa le tau ma le $15,000.

“O le gaioiga a le tagata gaoi sa faia e le tagata gaoi o le aveese lea o telefoni, laptops, pu’eata ma isi uma meatotino mai totonu o latou pusa, ona ave lea o le meatotino ae ta’atia ai lava na o le pusa i totonu o le faleoloa”, o le molimau lea a le sui o le kamupani.

O le masina o Tesema ina ua fa’aauau pea le galuega a le tagata gaoi, na manatu ai loa le kamupani o le a siaki a latou masini pu’eata o lo o nana solo i totonu o le fale, ina ia mafai ai ona iloa poo ai le tagata o lo o fa’atinoina lenei gaioiga leaga. Ina ua saili masini pu’eata na faamaonia ai o Tabete sa ia gaioiga meatotino uma na tau sailia.

E le i taliaina e le sui o le kamupani le molimau a Tabete sa fai i luma o le Fa’amasinoga, fai mai na mafua ona ia gaoia meatotino ona o le manatu ia maua o ia, ma faigofie ai loa ona toe fa’afo’i o ia i Fiti.

“E le sa’o lena molimau, e le i manatu Tabete e maua o ia mai lana gaioiga ua umi o fai. Na te lei iloaina o loo i ai ni mea pu’eata i totonu o le faleoloa. Ana le fa’aali lava i ai e Leoleo ata o ana gaioiga uma sa faia na te le iloaina o lo o i ai masini pu’eata i totonu”, o le molimau lea a le sui o le kamupani.

Na taua atili e le molimau e fa’apea, e le i leva ona latou mafuta ma Tabete ae alia’e loa suiga tetele i lana amio. E le gata ua mafuta atu i ni isi o ana uo ma faia ai inugapia, ae ua masalomia fo’i lona tagofia o fualaau fa’asaina. Atonu o le mafua’aga lea na ala ai ona unaia o ia e gaoia meatotino ma fa’atau atu ina ia maua ai tupe mo fualaau fa’asaina.

E o o mai lava i le taimi nei, e leai ma se oloa na gaoia ua toe maua e le kamupani. Na taua e le molimau e fa’apea, o lo o pogisa pea le kamupani poo i ai se taumafaiga a le malo e aofia ai ma Leoleo e toe saili meatotino na gaoia.

Na taua atili e le molimau e fa’apea, o le ripoti sa fa’asalalau e le Samoa News na mafua ai ona latou iloa le tulaga o le mataupu a Tabete.

“E le i fesootai mai lava le Ofisa o le Loia Sili poo Leoleo fo’i e logo mai le kamupani e tusa ai o le mataupu. Ana leai le ripoti sa faasalalauina e le Samoa News matou te le iloa ua mae’a ona lau le fa’asalaga a Tabele. Pau le fa’anoanoaga, e le o i ai se taumafaiga e poloaina ai le ua molia ina ia toe totogi mai se tupe mo meatotino sa ia gaoia.

E 28 masina lea ua poloaina e le Fa’amasinoga Maualuga ia Tabete na te tuliina i le toese i Tafuna, o se tasi lea o tuutuuga o lana nofovaavaaia, ina ua ta’usala o ia i moliaga mamafa e 3 o le talepe fale i le tulaga lua.

A mae’a ona ia tuliina masina e 12 i le toese, ona ia tuua lea o le atunuu ae toe fo’i atu i Fiti ma aumau ai mo le umi o lana nofovaavaaia e 7 tausaga. E $3,000 lana sala tupe, ma ua poloaina e le fa’amasinoga lana sponsor na te totogiina le salatupe, atoa ai ma le totogi o le pasese e toe fo’i ai Tabete i Fiti.