Ads by Google Ads by Google

Tete’e le ali’i Leoleo i tu’uaiga a le malo fa’asaga ia te ia


Le ali’i Leoleo ia Fa’auma Malo i le taimi na pu’e fa’apagota ai o ia e Leoleo i le 2 vaiaso talu ai. [ata foa’i]
ausage@samoanews.com

O le masina fou o Oketopa lea ua fa’atulaga e faia ai le fa’amasinoga autu a le ali’i Leoleo ia Fa’auma Malo, i le mae’a ai lea o lona teena o le moliaga e tasi ua tu’uaia ai o ia e le malo o Amerika Samoa.

 

O le taeao nei na tula’i ai Malo i luma o le Fa’amasinoga Maualuga a le atunu’u, ma ia teena ai le moliaga, o lona fa’aaoga o lona tiute o se tagata faigaluega a le malo e talia ai faiga fa’aalatua. O lea solitulafono, o se vaega D lea o solitulafono mamafa - afai ae fa’amaonia, e mafai ona fa’asala ai o ia i le falepuipui mo le umi e le sili atu i le 5 tausaga - pe fa’asala i le salatupe e le sili atu i le $5,000 - poo le fa’asala fo’i i fa’asalaga uma nei a lua.

 

O le mataupu lenei na tofu atu i le Ofisa o Leoleo, ina ua fa’afesoota’i e le ali’i na a’afia se Loia a le malo, ma ia fa’ailoa i ai taumafaiga a se ali’i Leoleo e aveese mai se vaega tupe tele mai ia te ia, e mafua mai i se fa’alavelave tau ta’avale sa a’afia ai o ia.

 

Na fa’afesootai e le Loia a le malo se tasi o Kapeteni i le Ofisa o Leoleo, ma logoina ai loa e le alii Kapeneta le Ofisa o Leoleo Su’esu’e (CID) e uiga i lenei mataupu, ma tofia ai loa le ali’i Leoleo Su’esu’e ia Det. Sili Sea na te su’esu’eina lenei mataupu e fa’atatau ia Malo.

 

O le ali’i o Malo, o se sui lea o le Vasega lona 25 o Leoleo na fa’au’u i le masina o Iuni o le tausaga nei. A o le i avea o ia ma Leoleo Fa’au’u, sa galue o ia i le vaega o le Marine Patrol a le Ofisa o Leoleo mo ni nai tausaga.

 

I fa’amaumauga a le fa’amasinoga o lo o taua ai e fa’apea, i le va o le masina o Aperila ma Me o le tausaga ne’i, na tula’i mai ai se fa’alavelave laititi tau ta’avale i tua o le auala e ui atu i le uafu o lo o taula ai le va’a mai Samoa, le Lady Naomi.

 

O lea fa’alavelave na mafua mai ina ua taia e le loli sa ave e le ali’i na a’afia se ta’avale sa paka ai i tafatafa o le auala. Na taua e le ali’i na a’afia i Leoleo e fa’apea, ao taumafai e fa’asolomuli le Loli a le Ofisa o Galuega a le malo na momoli atu ai se uta, sa fa’afuase’i ona ia so’aina ai le pito o se ta’avale sa paka i tafatafa o le auala, ma fa’aleagaina ai le moli.

 

E lei umi ae vaaia e le ali’i na a’afia le savali atu o se ali’i Leoleo mai le Marine Patrol ma talanoa atu ia te ia e uiga i le fa’alavelave. I luma o le mitiafu a le ali’i Leoleo, o lo o tusia ai le igoa “F. Malo”.

 

Na fa’ailoa e Malo i le ali’i na a’afia e fa’apea, afai na te tuuina atu ni pepa sala ia te ia (ticket), e $400 lana tupe e alu ai, ae afai na te fa’amagaloina o ia, e na o le $100 le tupe na te totogiina. Na manatu le ali’i na a’afia e sili pe a totogi na o le $100. O lea na ia fai ai loa ia Malo, o le a ia totogiina le $100, ae fa’atoa mau i le taimi e maua ai lana siaki i le isi vaiaso.

 

Talu mai le taimi lea, e lei toe fetaui lava Malo ma le ali’i na a’afia. Ae i le tuana’i ai o le masina talu ona tuana’i le fa’alavelave, na toe fetaui ai Malo ma le ali’i na a’afia i le maketi i Fagatogo. Na faailoa e Malo i le ali’i lea e fa’apea, talu ai ua ia olegia o ia e uiga i le $100, o le a sui le aofa’i o le tupe na te totogiina atu ia te ia i le aofaiga e $1,000.

 

Na malie le ali’i na a’afia ma ia talosaga ia Malo, se’i maua sana tupe ona totogi atu lea o lana tupe, ona o lea fa’atoa amata i lana galuega fou i le Island Breeze i Fagaalu - e le o toe faigaluega i le Ofisa o Galuega a le malo.

 

Ina ua la fetaui, sa fai loa i ai le ua molia, talu ai ua ie olegia fa’alua o ia, ua sii i le $2,000 le aofa’i o le tupe lea ua ia nofo aitalafu ai ia te ia. Sa le utuva le alu o Malo i le fale faigaluega a le ali’i na aafia ma tauanau mai le tupe. O ni isi o taimi e alu ai ma lana toniga leoleo, o isi fo’i taimi e alu ai i le ta’avale a leoleo, ma talanoa solo i tagata faigaluega e fa’atatau i le tupe o lo o aitalafu ai le ali’i na aafia ia te ia.

 

O lo o taua i fa’amaumauga a le fa’amasinoga le talosaga o Malo i se tasi o tagata faigaluega, ina ia fa’atonu le latou Pule e taofi le siaki a le ali’i o lo o a’afia e aua le tuuina i ai, ona o loo aitalafu ia te ia i se vaega tupe tele.

 

Ina ua fesiligia e Leoleo ia Malo e uiga i lenei mataupu, sa ia ioeina ai lona faia o lenei amio i le ali’i na a’afia ma le faanaunauga na te maua mai ai se tupe. Na ioe Malo i lona fa’aaoga le tatau o le malosi sa ia te ia e ala i le tofiga Leoleo, e fa’afefe ai le ali’i na aafia ina ia maua mai ai le tupe.

 

Sa ia taua atili fo’i i Leoleo lona matua naunau lava ina ia ona mauaina le tupe sa ia fai i le ali’i na a’afia e totogi atu, ona o tulaga faaletonu i le itu tau tupe ua a’afia ai lona aiga. Sa ia fa’atoese i Leoleo ma ta’utino i ai, e le sa’o le gaioiga sa ia faia.

 

O lo o tumau pea tuutuuga o lo o tatala ai i tua Malo ina ua mae’a ona ia totogiina le tupe e $5,000 sa fa’atulaga e le fa’amasinoga e tatala ai o ia i tua - e fa’atali ai le aso lea ua fa’atulaga e toe valaau ai lana mataupu.

 

O ni isi o tuutuuga o lo o tatala ai o ia i tua e aofia ai le fa’asa lea ona ia toe taumafai e soli se tulafono a le malo; fa’asa ona ia taumafai e tuua le atunu’u pe sola ese fo’i; aua ne’i ona toe taumafai e fa’afesootai le tagata o lo o a’afia i lenei mataupu; a ia avea o ia ma tagatanu’u e tausisi i tulafono a le malo i taimi uma.