Tete’e Faaili Matau i tu’uaiga a le malo

ausage@samoanews.com

O le aso 29 Tesema lea ua fa’atulaga i ai le isi iloiloga o le mataupu a le ali’i o Faaili Matau, i le mae’a ai lea o lona teena o moliaga mamafa e 2 ua faila e le malo fa’asaga ia te ia, i le mae’a ai lea o lana ulua’i iloiloga sa faia i luma o le Fa’amasinoga Maualuga i le vaiaso nei.

 

O lo o tu’uaia e le malo le ali’i o Matau i moliaga mamafa e lua o lona umia fa’asolitulafono o vaega o le pauta fa’asaina o le aisa, atoa ai ma lona umia fa’asolitulafono o vaega o le laau fa’asaina o le mariuana. O ia solitulafono, o ni solitulafono o le vaega D i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, poo le fa’asalagatupe e le silia i le $5,000, pe fa’asala fo’i i fa’asalaga uma ia e lua.

 

O le mataupu e pei ona tu’uaia ai Matau na alia’e mai i le faalavelave lea na tula’i mai i Tafuna i le aso 20 Oketopa pe tusa o le itula e 4:40 i le vaveao, ina ua maua atu e Leoleo sa tiute i luga o le alatele se ali’i o loo moe taliaga mai i se tasi o Fale Fa’atalipasi i Tafuna, ma aga’i atu ai loa Leoleo ma taumafai e fafagu i luga lea ali’i.

 

Sa maitauina e Leoleo se tama’i container lanu meamata o loo uu i le isi lima o le ali’i o lo o moe. E pei ona taua i fa’amaumauga a le fa’amasinoga e fa’apea, na ona ala a’e lava i luga o le ali’i sa moe, muamua loa tago i se naifi sa taoto ai i luga ma uu loa i lona lima, peita’i sa fautuaina o ia e Leoleo e aveese le naifi.

 

Na avea le masalosalo o Leoleo i mea o loo i totonu o le tama’i container o loo u’u e le ali’i sa moe, ma itu na talosagaina ai loa o ia e avatu le container se’i latou vaavaai i ai. Ae ina ua tatala e Leoleo le container, na tu’uaia ai loa lo latou maua i ai o ni tama’i taga pepa iila o lo o i ai pauta papa’e, lea na faia i ai se suesuega ma iloa mulimuli ane ai, o vaega ia o le pauta oona o le aisa.

 

O i isi mea o lo o tu’uaia e le malo na maua i totonu o le container, e aofia ai se sikaleti mariuana, o isi pepa iila o lo o i ai vaega o le pauta fa’asaina o le aisa, faapea ai ma se pepa taai. Na saili e Leoleo le tino o le ali’i sa moe ma maua i ai i le taga o lona ofu se paipa e ula ai le pauta o le aisa.

 

Ina ua fesiligia e Leoleo le ali’i lea po o ai lona igoa, sa ia fa’ailoa i Leoleo, o ia o Faaili Matau, poo “Whistle” e pei ona iloa ai o ia e le to’atele.

 

E $5,000 lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua mai le toese. Afai ae mafai ona tatala o ia i tua, ua poloaina o ia ina ia aua ne’i ona toe tagofia vaega o fualaau fa’asaina poo le ‘ava malosi, ua fa’asa fo’i ona ia toe soli se tulafono a le malo.

 

O se tasi o tuutuuga na faaopoopo e le Fa’amasinoga Maualuga i tuutuuga e tatala ai Matau, o le totogi uma lea o ana salatupe o lo o i ai i le Fa’amasinoga Fa’aitumalo.

Comment Here