Tete’e Alo ma Nofoa i tu’uaiga fa’asaga ia te i laua


[ata: SN]
ausage@samoanews.com

O le masina fou o Novema lea ua fa’atulaga e faia ai le ulua’i iloiloga o le mataupu a Iosefa Alo ma Galu Nofoa, i le mae’a ai lea ona la teena o le moliaga mamafa e tasi lea ua tu’uaia ai i laua e le malo i le taeao ananafi.

 

O lo o tu’uaia Alo ma Nofoa i le moliaga o le umia fa’asolitulafono lea o vaega o le pauta fa’asaina o le aisa, ma le fa’amoemoe e tulei ma fa’atau atu isi tagata. O se solitulafono e mafai ona fa’asala ai se tasi i le toese mo le umi e le silia i le 20 tausaga, pe fa’asala fo’i i le salatupe e le silia i le $2,000, poo fa’asalaga uma fo’i e lua.

 

O moliaga fa’asaga ia Alo ma Nofoa na alia’e mai i le fa’alavelave lea na tula’i mai i le amataga o le masina nei, ina ua maua e se Leoleo po a le aoga maualuga a Tafuna ni ali’i aoga se to’alua o lo o la umia se paipa o lo o i ai vaega o le pauta fa’asaina o le aisa, ma logoina ai loa Leoleo latou te su’esu’eina lenei mataupu.

 

Na auina atu ali’i aoga e to’alua i le Ofisa o Leoleo i Tafuna mo su’esu’ega, na mafai ai loa ona maua e Leoleo fa’amatalaga e uiga i lenei mataupu, ma i’u ina molia ai loa Alo ma Nofoa. O Alo, o se ali’i faiaoga ae o Nofoa o le uncle lea o le isi ali’i aoga.

 

Ina ua sailia ali’i aoga e to’alua, sa maua i ai se paipa o lo o tumu ai vaega o le pauta pa’epa’e o le aisa, faatasi ai ma se afi penisini o loo afifi i se ofu lanumumu i totonu o le aoga aoga a le ali’i o C.K.

 

E tusa ai ma fa’amaumauga a le fa’amasinoga, o ali’i aoga e to’alua ia C.K ma J.M o lo o tu’uaia e le malo na maua i ai le paipa, ma taumafai ai loa Leoleo e fesiligia i laua pe na fa’afefea ona la mauaina le paipa.

 

Sa fesiligia e Leoleo ia J.M a o i ai lona tuafafine matua, ae o C.K na fesiligia ao i ai lona Tina.

 

Na taua e J.M i Leoleo e fa’apea, e masani ona maua mai ana mariuana mai lona uncle o Nofoa. I le po o le aso 5 Oketopa, sa tu’u atu ai e Nofoa se sikaleti mariuana ia te ia, ona ia alu lea ma ia i le aoga i le aso na sosoo ai.

 

Na taua e C.K e fa’apea, i le aso 4 Oketopa, sa la ulaina ai ma le ali’i faiaoga o Alo se paipa o lo o i ai vaega o le aisa i totonu i tafatafa o le fale o Alo i Lauli’i. I le aso na sosoo ai ina ua alu i le aoga, sa tu’u atu ai e J.M sikaleti mariuana e 3. Sa ia fa’atauina atu i le isi tamaititi aoga le isi afa sikaleti mariuana, ae o le isi afa sikaleti na totoe ai sa la ulaina ma se tasi o ana uo. Sa ia tuuina atu ia Alo sikaleti mariuana e 2 sa totoe.

 

I le aso 6 Oketopa, na taua ai e C.K i Leoleo sa tuu atu ai e Alo le paipa o lo o i ai vaega o le pauta o le aisa i totonu, ma fai atu ia te ia e alu e fa’atau i le $30, pe ave fo’i e maua atu ai ni sikaleti mariuana. O le paipa lea na taua e C.K sa la ulaina ma J.M i tua o le fale’aiga a le aoga, ae maua ai loa i laua e le Leoleo po a le aoga.

 

Na fa’aalia atili e C.K i Leoleo lona vaaia o J.M o ia nana se sikaleti mariuana i tua o le nofoa o le ta’avale Leoleo lea na momoli atu ai laua i le Ofisa o Leoleo. Na sailia e Leoleo le nofoa o le ta’avale e pei ona taua e C.K ma latou maua i ai se sikaleti mariuana o loo i totonu o se pepa iila, ma mafua ai loa ona toe fesiligia J.M e uiga i le sikaleti mariuana lea.

 

Sa i ai le Tina o J.M i le taimi na toe fesiligia ai o ia e Leoleo. Sa ia fa’aalia i Leoleo e fa’apea, e tusa nei ua 2 vaiaso talu ona amata ona ia fa’atauina atu sikaleti mariuana sa avatu e lona uncle o Nofoa ia te ia.

 

Sa ia faamatala i Leoleo e fa’apea, e masani ona avatu e Nofoa lau mamago o le mariuana ia te ia, ona tago lea ua taai fa’a sikaleti ae fa’atau i le aoga. Sa ia taua fo’i i Leoleo, sa amata mai lava ona ia ulaina le mariuana ina ua Vasega 10 o ia.

 

Ina ua fesiligia e Leoleo ia Nofoa, sa ia ioeina ai lona tuuina atu o mariuana ia J.M. Na taua e Nofoa le alu atu o J.M ma tupe e fa’atau mai ai mariuana ia te ia, ona ia tu’u lea i ai o mariuana e alu e fa’atau e maua ai se tupe. Na taua atili e Nofoa e fa’apea, sa masani fo’i ona ia tulei ma fa’atau atu mariuana i le taimi a o i ai lana laau mariuana sa toto i tafatafa o lona fale i Futiga.

 

Ina ua fesiligia fo’i e Leoleo ia Alo e uiga i lenei mataupu, sa ia ioeina ai fo’i lona tuuina atu o le paipa ia C.K e alu ma ia i le aoga.

 

O lo o taofia pea Alo ma Nofoa i le toese i Tafuna, se’i vagana ua la totogi le $20,000 ona fa’atoa mafai lea ona tatala i laua i tua.

Comment Here