Ads by Google Ads by Google

Tele suiga ua i ai fa’atoaga a ni isi aufai fa’atoaga a le atunu’u

ausage@samoanews.com

Ua fa’aalia e ni isi o le aufai fa’atoaga a le atunu’u i le Samoa News suiga tetele ua molimauina i auala e tausi ai le saogalemu o fa’atoaga, talu mai le fa’aiuga sa tu’uina mai e le Ofisa o Fa’atoaga a le malo i le 3 vaiaso talu ai, e taofia ai le toe fa’atauina atu o fualaau’aina i le polokalame o Taumafa a fanau aoga, ina ua molimauina tulaga fa’aletonu i ni isi o fa’atoaga i le atunu’u.

 

I se feiloaiga a le Samoa News ma ni isi o le aufai fa’atoaga a le atunu’u i le vaiaso na te’a nei, sa latou fa’aalia ai le i ai o se suiga tele i le tulaga o le tausiaina o le saogalemu o a latou fa’atoaga, pe a fa’atusatusa i le tulaga sa i ai i le 3 vaiaso talu ai.

 

“O la’u fa’atoaga le isi fa’atoaga sa a’afia i le fa’aiuga e taofia mai le toe fa’atauina atu o fualaau’aina i faleoloa ma le polokalame a le school lunch, ona o ni isi o tulaga fa’aletonu sa molimauina ai e sui o le Ofisa o Fa’atoaga a le malo, peita’i talu mai le 3 vaiaso talu ai, ua tele le suiga ua si’itia i ai le saogalemu o la’u fa’atoaga, e le gata ua mae’a ona fa’atinoina ni isi o vaega sa moomia le fa’aleleia, ae ua uasia fo’i tulaga e tatau ona i ai le tausiaina o le saogalemu o le fa’atoaga”, o le saunoaga lea a le susuga ia Lio Unasa, o se Tama fai fa’atoaga mai Pava’ia’i.

 

Ina ua fesiligia e le Samoa News po o a tonu vaega sa fa’aletonu i lana fa’atoaga ua mae’a ona fa’aleleia, ae na taua e Unasa le mae’a lea ona fa’aleleia nofoaga e la’u i ai fualaau’aina i le taimi e uma ai ona tau, ma le fa’amoemoe e fufulu mama fa’atoa la’u ai i le school lunch.

 

“Sa fa’aletonu le nofoaga e fa’atumu ai kukama, maukegi ma le anoanoa’i o fualaau’aina e fufulu ai, a o le i la’u atu i le school lunch, peita’i o le taimi nei, ua mae’a ona fausia le nofoaga e tuu uma i ai a’u fualaau’aina, ma ua mae’a fo’i ona asia e sui o le Ofisa o Fa’atoaga”, o le saunaoga fa’ai’u lea a Unasa.

 

E to’atolu isi fai fa’atoaga sa latou talanoa mai i le Samoa News e fa’atatau i le mae’a lea ona foia fa’afitauli sa poloaina ai a latou fa’atoaga e le Ofisa o Fa’atoaga a le malo e fa’aleleia.

 

Na taua e le Tina ia Aneti Valaau mai Tafuna e fa’apea, o vaega sa fa’aletonu i lana fa’atoaga e aofia ai le le mama o le nofoaga e la’u ma fa’atupu i ai fualaau’aina, atoa ai ma le masalomia o lona fa’aaogaina o vailaau malolosi e le fa’atagaina e tausi ai lana fa’atoaga, peita’i o ia vaega uma ua mae’a ona siaki e le Ofisa o Fa’atoaga, ma ua latou fa’amaonia le mae’a lea ona fa’aleleia o ia vaega.

 

“Pau le vaega lea ua fa’atali i ai, o se fa’atonuga aloaia mai le Ofisa o Fa’atoaga e fa’atatau i le toe taliaina  lea o le la’u atu o fualaau’aina i le polokalame a le school lunch, pe afai e mae’a ona asiasia uma fa’atoaga i le atunu’u, ae mo la’u fa’atoaga, ua mae’a ona fa’aleleia vaega sa fa’aletonu”, o le saunoaga lea a Valaau.

 

Ae na taua e le Tama ia Ulutonu Finauga o Iliili e fa’apea, e leai se vaega na sala ai lana fa’atoaga, ae o ia le isi fai fa’atoaga na a’afia ina ua faia le fa’aiuga a le Ofisa o Fa’atoaga e taofi le toe la’uina atu o fualaau’aina i le school lunch, ina ua masalomia ni isi o fai fa’atoaga i le le fa’amaoni.

 

Ina ua fesiligia e le Samoa News le susuga a Finauga pe sa i ai se a’afiaga i le itu tau tupe i lona aiga ina ua taofia le toe fa’atauina atu o ana fualaau’aina, na soisoi le ali’i fai fa’atoaga ma saunoa e fa’apea, “Sa i ai lava sina fa’aletonu i le itu tau tupe i lo’u aiga, ina ua taofia le toe fa’atauina atu o a’u fualaau’aina, peita’i e sili lava le usita’i i le tulafono nai lo se isi lava tulaga, ma ua sauni mo le tu’uina mai o se isi fa’aiuga mai le Ofisa o Fa’atoaga mo le toe fa’ataga lea o le la’u atu o fualaau’aina a le aufai fa’atoaga i le school lunch”.

 

Na fa’amaonia mai e le sui sinia o le Ofisa o Fa’atoaga a le malo ia Arona Palamo i le Samoa News i le vaiaso na te’a nei, le fa’aauau pea o asiasiga masani a le Ofisa o Fa’atoaga fa’apea ai sui o Ofisa a le malo lea ua tofia e le Kovana latou te galulue fa’atasi, i le asiasia lea o fa’atoaga ina ia mautinoa o lo o latou usitaia tulafono i vailaau aemaise ai o le saogalemu o le fofoga taumafa a le atunu’u.

 

“E le o mautu mai se fa’aiuga i le taimi nei i se taimi ma se aso e toe tatala ai le fa’aiuga ua mae’a ona tu’uina atu e taofia ai le talaiaina o fualaau’aina, pau le galuega a le Matagaluega o lo o faia i le taimi nei, o lo o fa’aaua pea a matou asiasiga, ma ua i ai ni isi o fa’atoaga ua moilmauina lo latou usitaia o tulaga sa moomia le fa’aleleia”, o le saunoaga lea a Palamo.

 

Mai le silia i le to’a 90 le aofa’i o le aufai fa’atoaga ua mae’a ona lesitala i le Asosi a le Aufai Fa’atoaga a le atunu’u, o i latou uma lava ia na a’afia i le fa’aiuga e taofia ai le toe la’uina atu o a latou fualaau’aina i le polokalame a le school lunch a le Ofisa o Aoga a le malo.