E tele naua suiga ua fuafua le Ofisa o Fesootaiga a le malo e fa’atinoina i le tausaga tupe fou lenei ua amata, mo le fa’amoemoe e fa’aleleia atili ai lana tautua i totonu o le atunu’u.

O ni isi o ia suiga e aofia ai le taumafai lea ina ia fa’aleleia tulaga o fesootaiga i laina telefoni, ina ia taofia ai le fa’afitauli o le talanoa atu i le isi laina, ae fa’alogo atu fo’i o lo o lagona atu ai ma talanoaga a isi tagata i luga o le laina lava lea e tasi; auala e fa’a taugofie ai tulaga o fesootaiga fa’avaomalo; ma le taumafai lava ina ia siitia auala e fa’alauiloa ai tulaga tau maketi mo le Ofisa o Fesootaiga a le malo.

O se iloiloga sa faia e le Komiti o Fesootaiga a le maota o sui, i lalo o le ta’ita’iga a le afioga i le ali’i faipule ia Vailoata E. Amituana’i, ma le Pulesili fou a le Ofisa o Fesootaiga a le malo ia Puleleiite Tufele Li’amatua Jr i le vaiaso na te’a nei, na mafai ai ona fa’afofoga afioga i Faipule i tulaga ua aga’i atu i ai le tautua a lenei Ofisa taua o le malo.

O le masina o Mati 2018 ua fa’amoemoe e amata aloaia ai se faiga paaga a le Ofisa o Fesootaiga a Amerika Samoa, ma le kamupani telefoni mai Amerika, le TNT. O le agaga o lenei taumafaiga e pei ona taua e Puleleiite, o le taumafai lea ina ia fa’a faigofie tulaga o fesootaiga mai atunuu i fafo ma Amerika Samoa, ia taugofie, ae sili atu ia vave ma malu puipuia.

Na fa’afetaia e Manumaua W. Wilson le afioga a Puleleiite i le auaunaga fou a le Ofisa o Fesootaiga, lea ua maitauina le to’atele o le atunu’u latou te fa’aaogaina i le taimi nei, le “e-charge”. Saunoa Manumaua e fa’apea, o se auala ua leva na tatau ona fa’atinoina ina ia fesoasoani ai i tupe maua a le Ofisa.

Saunoa Puleleiite e fa’apea, o le “e-charge” o le igoa lea o le tautua a le BlueSky, ae o le “e-top-up” o le igoa sa’o lea o le auaunaga fou a le Ofisa o Fesootaiga, lea ua molimauina le to’atele o le atunu’u ua latou fa’aaogaina i le taimi nei.

Na fa’amanino e le Pulesili e fa’apea, i suesuega ua mafai ona fa’atinoina e le Ofisa, e tusa ma le 190 le aofa’i o faleoloa i le atunu’u sa latou fa’atauina atu pepa telefoni (phone cards) a le ASTCA, ae ina ua fa’aaoga le latou tautua fou o le “e-top-up”, e tusa ma le 295 le aofa’i o faleoloa ua mafai ona latou fa’aaogaina lenei tautua, ma ua maitauina fo’i le si’itia o tupe maua a le Ofisa mai lea auaunaga, e fesoasoani ai i le fa’atinoina o lana auaunaga i le atunu’u.

Saunoa atili Puleleiite e fa’apea, i tausaga ua mavae, o se tasi lenei Ofisa a le malo sa tele ina fa’alagolago tasi i ai le malo i tulaga o tupe maua, peita’i o le aga’i mai pea i nai tausaga e lei mamao atu, sa molimauina ai le tulaga pagatia o le itu tau tupe seia oo mai lava i le taimi na tofia ai o ia e avea ma Ta’ita’i le tumau.

Ua ia valaoia e fa’apea, ua i ai le vaai mamao a le Pulega, e tapuni tusi a le Ofisa i le masina o Setema ua mavae atu, ua toe fo’i le latou paketi mo le masina lava ia o Setema i le uliuli.

O le fa’aaogaina o ituaiga telefoni e pei ona ta’atele i le atunu’u i le taimi nei, o le isi lea tulaga sa fesiligia e Manumaua, poo i ai se fuafuaga a le Ofisa e si’itia le tulaga. Saunoa Manumaua e fa’apea, o se tulaga lelei fo’i pe afai e faataugofie e le ASTCA tau o ana telefoni, ona to’atele lea o tagata latou te fa’atauina, ma tele ai a latou tupe maua i le taimi e fa’atau ai e tagata minute mo telefoni.

Saunoa Puleleiite e fa’apea, o se tasi o itu sa ia maitauina ina ua fa’atoa taunuu atu i le Ofisa, e to’atele o lo o fa’aaogaina le ituaiga Telefoni lea e tatala (Flip-phone). O le fuafuaga lea ua i ai, o lo o fa’amoemoe e tatau ona oo atu i le tausaga fou, ua le toe fa’aaogaina e le ASTCA le ituaiga telefoni lea, ae o le a fa’aaoga na o le ituaiga telefoni lea e taua o le ‘smart-phone’, e le gata e faigofie o fesootaiga, ae o ituaiga telefoni fo’i ia e tele galuega e mafai ona fa’atinoina ai, e aofia ai le siaki o le imeli, matamata ai ta’avale, pe mafai fo’i ona fa’aaoga o se T.V.

I le tulaga o le auaunaga i lalo o le polokalame e taua o le ‘BLAST’, ua i ai le fa’amoemoe o le vaiaso lona lua o le masina lenei e amata loa ona fa’aola atu maota ma laoa o aiga ua mae’a ona fesootai ma le polokalame lenei.

O lenei auaunaga e aofia ai le tautua a le Televise faapea ai fesootaiga tau initaneti. O se tasi o fa’afitauli e mafua ai ona telegese fesootaiga tau initaneti i le atunu’u e pei ona saunoa Puleleiite, o le vaivai o le malosi o lo o maua mai i le uaea o fesootaiga o loo i ai.

Afai e 14,000 le aofa’i o aiga o le atunu’u o loo latou fa’aaogaina le tautua o le initaneti i le taimi e tasi, e le aofia ai pisinisi ma ofisa a le malo, faapea ai ma tagata o lo o latou fa’aaogaina telefoni, o iina lea e mafua ai ona telegese fesootaiga, e le taitai lava le malosi o le uaea o fesootaiga o loo i ai e sapalai mai ai le malosi tau initaneti e moomia mo fesootaiga.

Ina ua fesiligia le mataupu e fa’atatau i nonogatupe a le ASTCA mai le Teugatupe a le Litaea, na taua ai e Puleleiite le i ai o se fuafuaga a le Ofisa, mo le tuuina atu lea o se isi a latou talosaga i le Litaea mo se isi nonogatupe, e fesoasoani ai i le fa’atupeina o ni isi o galuega a le Ofisa o lo o foufou mai i le lumana’i, e aofia ai fesootaiga ma kamupani o lo o tosoina mai uaea o fesootaiga i le Pasefika, e pei o le Tui Samoa Cable mai Samoa, ma le kamupani a le Hawaiki Cable.