Ads by Google Ads by Google

Tele pea lu’itau fetaia’i malo fa’aleleia soifua maloloina tagata

ausage@samoanews.com

E ui e fa’amata e faigofie le tulaga o lo o i ai le tausiaina o le soifua maloloina o le atunu’u i le taimi nei, tauala mai i le tautua a le Matagaluega o le Soifua Maloloina aemaise ai o le Falema’i i Faga’alu, le LBJ, peita’i na fa’amanino e le afioga i le ali’i kovana ia Lolo Matalasi Moliga i le fonotaga ma lana Kapeneta i le vaiaso na te’a nei, le tele o lu’itau o lo o feataia’i pea ma le malo i le tausiaina o le soifua maloloina o le atunu’u.

 

O ia lu’itau e pei ona saunoa le ali’i kovana o le tulaga lea i le itu tau tupe, ona o le tele o tupe o lo o fa’atautaia ai le auaunaga tau soifua maloloina, e le mafai ona faia i Amerika Samoa suiga mo le fa’aaogaina, se’i vagana ua sui mai i le Konekeresi le tulafono.

 

E pei ona masani ai i soo se taimi o fonotaga a le kovana ma lana Kapeneta, e maua ai lava le avanoa o Taitai o Vaega Tumaoti o le malo latou te fa’aleoina ai ripoti i tulaga o lo o i ai a latou auaunaga i le atunu’u, ma o le tofa Taufete’e J. Faumuina, o ia lea o le Pulesili o le Falema’i sa ia fa’aleoina le ripoti i le tulaga o lo o i ai le tautua a le Falema’i i luma o le kovana ma le kapeneta.

 

“O le lu’itau masani lava e pei ona taumafai mai i ai le Falema’i i le tele o tausaga, o le tau fa’asoasoaina lea o ana tupe mo lana tautua, peita’i o lea ua fa’aopoopo mai i ai ma le lu’itau i le fa’aitiitia lea o itula faigaluega a tagata faigaluega, e mafua mai i le fa’aiuga e pei ona tu’uina mai e le faigamalo, ma e ui o lo o to’atele pea tagata o lo o fa’asea ma le fiafia, i le fa’aitiitia o itula faigaluega a isi tagata ae fa’asa’oloto pea isi tagata, peita’i o lo o matou galulue pea ina ia saili se auala e foia ai lea tulaga”, o le saunoaga lea a Taufete’e.

 

Na fa’aauau le saunoaga a Taufete’e e fa’apea, o le mafua’aga o le fa’afitauli e pei ona tula’i mai i le aufaigaluegaa le falema’i, e to’atele tagata faigaluega e ova galulue, peita’i o i latou ia o lo o aofia i le fa’aitiitia o itula faigaluega.

 

“Talu ai le to’a laiti o le aufaigaluega, o ni isi o taimi e galulue ai ni isi o i latou i sifi e ta’i 24 itula i le 7 aso o le vaiaso, peita’i o lea ua latou fa’alogo e le o aofia totogi o foma’i ma tausima’i i le fuafuaga e fa’aitiitia ai itula, o iina la lea e tula’i mai ai tulaga lu’itau e pei ona matou fetaia’i, ae o lo o galulue pea e foia nei fa’afitauli i se auala to’afilemu”, o le saunoaga lea a Taufete’e.

 

O tulaga o lu’itau i le itu tau tupe, o se tasi lea o mataupu o lo o fa’aauau pea i le taimi nei, ma o lo o galulue le falema’i e saili auala uma ina ia foia ai. Saunoa Taufete’e e fa’apea, o lo o tele naua tupe mai le polokalame a le Medicaid ma le Medicare, peita’i o le fa’afitauli, e i ai lava le aofaiga o lo o pasia mai e le feterale e mafai ona fa’aaoga, tusa lava la pe tele le aofa’i o le tupe o lo o avanoa mai mo le falema’i, e tatau lava ona mulimulita’i i le tulafono ua uma ona i ai.

 

O le tulaga i le Falema’i Fou e pei ona fuafuaina, ua mae’a nei ona taoto atu le ripoti a le Pulega o le Falema’i i le afioga i le ali’i Kovana mo sona finagalo.

 

Sa i ai le fuafuaga e fausia le falema’i fou a le atunu’u i Tafuna e pei ona saunoa Taufete’e, peita’i o lea ua manino i le fautuaga a le Kovana, o Faga’alu lava e fausia ai le falema’i fou i le nofoaga e pei ona fuafuaina.

 

I tulaga o fa’asea a le atunu’u fa’asaga i le tautua a le falema’i, na fautuaina ai e Taufete’e le kovana ma le kapeneta ina ia onosa’i pea ao fa’agasolo galuega fa’atino a le aufaigaluega a le falema’i.

 

“E leai lava se tulaga e faigofie i le taimi nei, o lo o to’atele pea lava ni isi o lo o fa’asea fai mai e le lelei le tautua a foma’i ma tausima’i, o isi fo’i fai mai ua fefefe e o atu i le falema’i i Fagaalu ona o lo o tele le fa’aletonu o lo o tula’i mai ai, pau le fautuaga le atunu’u, aua le fefe e ma’i, a oo mai lava le taimi e te ma’i ai ona e malie lea e te ma’i, ae alu atu i le falema’i se’i matou togafitiina lou ma’i”, o le saunoaga lea a Taufete’e na tali e ai sui o le kapeneta ma le kovana.

 

Saunoa Lolo e fa’apea, o le isi lea tupe tele o lo o fa’aalu e le malo i tausaga uma ma aso ta’itasi, o le tupe e tausia ai le soifua maloloina o le atunu’u.

 

“Pau le lu’itau lea o loo tatou fetaia’i i le taimi nei, e le o iinei e fai mai ai fa’aiuga mo le fa’aleleia o le soifua maloloina atoa ai ma le tausiaina o le soifua o tagata, ae o fa’aiuga na e fai mai fafo i le malo tele, lea la ua mae’a ona fai la matou fesootai ma le tatou Faipule i Uosigitone, ina ia galue mai mo le faia o ni isi o tulaga e fa’aleleia ai le soifua maloloina o le atunu’u, e aofia ai le sui o le tulafono i le fa’aaogaina o tupe, ina ia aveese tulaga o puipuiga i le fa’aaogaina o tupe, ae mafai ona fa’alautele lea tulaga ina ia mafai ai ona tatala faitoto’a mo Amerika Samoa”, o le saunoaga lea a Lolo.