Ads by Google Ads by Google

Tele pea fa’amatalaga eseese fa’atatau Tina Filipino na fa’afo’i fa’amalosi

ausage@samoanews.com

A o fa’aauau ai pea fa’amatalaga e fa’atatau i le mataupu i le Tina ma’itaga mai Filipino lea na fa’amalosia ona fa’afo’i ese atu ma le atunu’u i le masina na te’a nei, na maua le avanoa o le Samoa News e fesiligia ai ni isi o lo o taua o latou suafa i lenei mataupu.

 

O ni isi o i latou nei e aofia ai le ali’i ofisa o Femalagaaiga ia Siliva Patu, lea o lo o tu’uaia sa totogi i ai le tupe e $2,200 mo pepa nofomau a le Tina Filipino ma lona Tama, atoa ai ma le Pulesili o le Kamupani a le H&H Samsung Inc, le susuga ia Heo lea na avea ma sponsor lona lua a le Tina i le tausaga na te’a nei.

 

Na fesuisuia’i le saunoaga a Patu na tuuina mai i le  Samoa News ina ua fesiligia o ia e uiga i lenei mataupu. I lana ulua’i saunoaga i luga o le telefoni, sa ia faamaonia mai ai i le Samoa News, sa totogi atu e le aiga o le Tina Filipino le tupe e $2,200 ia te ia i le masina o Tesema 2015, o lo o ia te ia fo’i lisiti e fa’amaonia ai le tupe sa totogi atu.

 

Ae ina ua toe fesiligia o ia e le Samoa News i le aso na sosoo ai, o iina na suia ai loa le molimau a Patu. Sa ia fa’aalia i le Samoa News, na te le o manatua pe sa totogi atu e le aiga o le Tina Filipino se tupe ia te ia, ae na te manaomia se taimi se’i toe alu ai e talanoa ma le aiga poo ia te i latou kopi o le lisiti.

 

Mulimuli ane ao fa’agasolo le talanoaga, na toe saunoa ai Patu e fa’apea, e na o le Tama o le Tama’ita’i Filipino ua mae’a ona totogi atu le $1,100, ma o lo o ia te ia fo’i le lisiti, ae na te le o manatua pe sa totogi atu se $1,100 a le Tina.

 

Ae na taua e le Tina Filipino ia Merlin Gerin Lloren i le Samoa News e faapea, na muamua totogi e lona Tina ma lona tausoga le $1,100 mo le bond a lona Tama ia Pau, ae mulimuli totogi lana ia fo’i $1,100 mo le la bond ma lana tama i ni nai vaiaso mulimuli ane ai.

 

Na maua fo’i le avanoa o le Samoa News e fesiligia ai le susuga Heo e uiga i lenei mataupu.

 

I lea talanoaga, na teena ai e Heo tu’uaiga e faapea sa ia faa faigaluegaina le tama’ita’i o Lloren i le tausaga na te’a nei.

 

Na taua e Heo e fa’apea, na alu atu Lloren ma tagi atu ia te ia mo se fesoasoani, i se avanoa e maua ai sana galuega i lana kamupnai. O le alofa o Heo na ia taliaina ai ma tuu atu ai le avanoa e galue ai le tumau, ae sei vaavaai pe agava’a o ia.

 

I le masina ai o le vaiaso e tasi talu ona galue Lloren i le kamupani a Heo, na fautuaina ai loa e Heo o ia, e tatau ona fai muamua sona ID mai le Ofisa o Femalagaaiga ona fa’atoa mafai lea ona avea o ia ma tagata fagaluega i lana kamupani.

 

I le moilmau a Heo i le Samoa News, sa ia taua ai e fa’apea, ina ua oo i le aso na faatulaga e faia ai le fono a Lloren i luma o le Komiti Faafoe a le Ofisa o Femalagaaiga, na fiu ai e fa’atali o ia ua le oo atu.

 

O le mafua’aga lea na faia ai loa le faaiuga a le Ofisa o Femalagaaiga e toe fa’afoi o ia i lona atunu’u, ona ua ova aso talu ona aumau ai i Amerika Samoa.

 

Na taua e Heo ma lona ita tele lona totogi o le lata i le $3,000 mo le pasese a le Tina ma lana tama e toe fo’i atu ai i Filipino, ae foliga mai o lea o lo o nonofo i Samoa e le o taunu’u le la malaga.