Tele lu’itau na feagai ma le malo i le tausaga ua mavae


[ata: SN]
ausage@samoanews.com

E tele naua lu’itau i le itu tau tupe na fetaia’i ma le faigamalo a Lolo ma Lemanu i le tausaga ua mavae, e pei ona fa’amanino e le afioga i le ali’i Kovana i lana saunoaga, e tatala aloaia ai le Tauaofiaga lona 3 o le Nofoaiga 35 a le Fono Faitulafono i le masina nei.

 

E ui i le tele o nei lu’itau e pei ona taua e le tofa Lolo Matalasi Moliga, ae na mafai lava ona aga’i i luma galuega fa’ataoto a le malo, e ala i le lagolagosua atu a le Fono Faitulafono, atoa ai ma le sao a tagata faigaluega i le taumafai lea ina ia fa’atino gaioiga uma e mafai ai ona fa’ataunu’u le auaunaga a le malo mo le atunu’u.

 

O se tasi o itu taua na faamamafa e le faigamalo i ana taumafaiga ina ia faapaleni pea le malosi o lona tamaoaiga, o le toe vaavaai lea i auala e faamalosia ai ana tulafono tupe o lo o mafai ona maua mai ai tupe maua mo le malo, atoa ai ma le taumafai ina ia fa’atonutonu le tulaga i tupe fa’aalu ma tupe maua, ina ia mautinoa e le toe sili atu tupe fa’aalu nai lo tupe o lo o maua mai e le malo e fa’atino ai lana auaunaga i le atunu’u.

 

O ni isi o itu sa manatu le malo e fa’amalosia ai pea lana fa’amuamua i tulaga o fesoasoani ma atina’e, o le ave lea o le fa’amuamua i le sailia o auala e fa’aleleia ai aoaoga mo fanau, tausiaina o le soifua maloloina, atina’e mo le fa’aleleia o le puipuiga o le saogalemu lautele, atoa ai ma le fausiaina o fale ma atina’e e tautua ai tagata, faapea ai taumafaiga ina ia fa’aleleia auala, atoa ai ma isi lana tautua e sapaia ai le sao a tagata matutua, tupulaga faapea ai tagata faigaluega uma i le malo ma le atunu’u.

 

“O lo o tele pea le galuega e moomia le fa’amae’aina i lenei tausaga fou 2018, e ui o lo o i ai pea lu’itau o lo o tau fa’amata’u mai i le tamaoaiga o le atunu’u, ae galulue pea le malo e fa’atino lana pito laau,” o se vaega lea o le saunoaga a le ali’i kovana.

 

O se tasi o taumafaiga o lo o galue malosi i ai le malo i le taimi nei, o le sailia lea o auala e fa’amalosia ai le tutumau pea o kamupani i’a i le atunu’u.

 

E pei ona silafia, o le tulafono e pei ona fa’atoa pasia mai e le Konekeresi i tulaga o le pili o lafoga, e le o aofia ai i totonu le vaega lea e fa’aagafua ai lafoga. Lona uiga, o le tausaga lenei o le a toe siitia ai le isi faaopoopoga o totogi amata e pei ona pasia mai e le feterale i tausaga ua mavae, ma o se isi lea aafiaga tele i kamupani i’a aemaise ai lava o lea ua tapunia le kamupani a le Samoa Tuna Processing.

 

Na faailoa e Lolo i ta’ita’i o le Fono i lana saunoaga e fa’apea, e matua manaomia lava le galulue fa’atasi o le Fono Faitulafono ma le faigamalo, i le sailia lea o auala e fesoasoani ai i le fa’aleleia atili o le auaunaga a le malo i tagata.

Comment Here