Na taua e le Fa’atonusili fou o le Matagaluega o le Puipuiga o le Saogalemu Fa’alotoifale a le malo i luma o le maota o sui i le vaiaso nei, le tele o lu’itau o lo o fetaia’i ma le Ofisa i le taimi nei, lea fo’i ua latou galulue ai ma le aufaigaluega mo le sailia lea o se auala e foia ai nei lu’itau.

I le taimi o lana iloiloga e fa’amaonia ai tofiga a le kovana fa’asaga ia te ia, i luma o le maota o sui, na taua ai e le afioga a Samana Semo Ve’ave’a e fa’apea, i le mae’a ai o lana ulua’i asiasiga i tulaga o lo o i ai le tautua a le Ofisa, ina ua mae’a ona filifilia o ia e le afioga i le ali’i kovana ia Lolo Matalasi Moliga e avea ma ta’ita’i, sa ia maitauina ai vaega e tatau ona ave i ai le fa’amuamua ina ia fa’aleleia, e pei o le sailia lea o se auala e fa’atula’i se polokalame e malu puipuia ai fa’amaumauga a le malo o loo i lalo o le Ofisa o Fa’amaumauga (Vital Statistics Office), galulue fa’atasi ma Ofisa Faamalosi tulafono a le malo e saili auala e fa’aitiitia ai le saoasaoa o le fa’afitauli o fualaau faasaina, atoa ai ma faiga faapologa fa’asaga i isi tagata soifua, atoa ai ma le fa’atula’iina lea o se fuafuaga e tete’e atu ai i ni faiga faaterorisi e tula’i mai i le atunu’u i le lumana’i.

“Mai le silia i le 2.8 miliona fa’amaumauga a le malo o loo i ai i le Ofisa o Fa’amaumauga, e le o i ai se isi polokalame e mafai ai ona fa’asao mai nei faamaumauga, pe afai ae tula’i mai se fa’afitauli ma leiloloa uma ai fa’amaumauga o loo i ai, ma o se tasi lenei o fuafuaga ua leva na tatau ona fa’ataoto mai e le malo”, o se vaega lea o le molimau a le afioga a Samana.

Mo se fa’ataitaiga e pei ona saunoa Samana, afai ae tula’i fa’afuase’i mai ni fa’alavelave fa’aterorisi i le atunu’u, e le o i ai se fuafuaga e mafai ai ona galulue fa’atasi Ofisa Fa’amalosi tulafono e fa’atino lea fuafuaga, o popolega o lo o i ai, ina ne’i tulai fa’afuase’i mai ni fa’afitauli ma a’afia ai soifua o tagata ae le o tapena le malo.

Na fa’ailoa e le afioga i le ali’i faipule ia Gafatasi Afalava e fa’apea, ua molimauina le saoasaoa o le tulaga ua i ai le fa’afitauli o fualaau faasaina i le atunu’u i le taimi nei, ma ua fiu fo’i le Ofisa o Leoleo e saili se fofo o lenei fa’afitauli ae ua le mafai lava.

“Pau le auala e mafai ai ona foia fa’afitauli nei, o le fa’amaoni o le Ta’ita’i ma lana aufaigaluega i le fa’amalosia o tulafono a le malo ua mae’a ona fa’ataoto e lima ta’ita’iina ai le malo atoa”, o le fautuaga fa’a tagata matua lea a le afioga a Gafatasi.

Na fa’afetaia e le afioga i le ali’i faipule ia Faimealelei Anthony Fu’e Allen le afioga a Samana, e tusa ai o ana fuafuaga fa’ataoto ua folasia e mulimulita’i i ai le ofisa mo le isi 4 tausaga o lo o lumana’i nei.

Na fa’ailoa e Faimealelei i luma o le Komiti e fa’apea, ina ua tula’i mai le galulolo lea na a’afia ai Amerika Samoa i le 2009, sa maitauina ai le leai o se fuafuaga faataoto a le Matagaluega o Aoga mo le saogalemu o fanau aoga, lea na ofo atu ai loa e le afioga a Samana lana fuafuaga o lo o i ai, ma avea ai loa o se fuafuaga e mulimulita’i uma ai le Ofisa o Aoga faapea ai le atunu’u atoa, pe afai ae toe tulai mai se isi fa’alavelave faalenatura i le lumana’i.

Na taua e le afioga i le tama’ita’i faipule ia Vui Florence Saulo le taua tele o le faia o suega mo tagata faigaluega a le malo, ina ia mautinoa latou te le o tagofia fualaau fa’asaina. Sa ia taua fo’i se pili sa faaulu i luma o le fono i ni tausaga ua mavae mo lea fa’amoemoe, peita’i e lei manuia.

Ae ina ua fesiligia e Vui ni vaega tupe fesoasoani e mafai ai ona fa’atino suega nei mo tagata faigaluega, na saunoa ai Samana e fa’apea, pau le auala e mafai ai ona fa’atino tulaga e pei ona fesiligia, o le tusi o se talosaga i le feterale mo se vaega tupe, ae taumafai ina ia sui le fa’aupuga o le talosaga ina ia mafai ai ona talia.