Ads by Google Ads by Google

Tele lu’itau feagai ma le malo i le itu tau tupe


[ata: SN]
ausage@samoanews.com

E le o se taimi faigofie lenei i le faigamalo a Lolo ma Lemanu, e mafua mai i le tele o lu’itau i  le itu tau tupe o lea ua fetaia’i nei ma le malo, a o lea fa’atoa amata le Kuata muamua o le tausaga tupe fou 2018.

 

Na fa’ailoa e le afioga i le ali’i Kovana ia Lolo Matalasi Moliga i le fonotaga a le Kapeneta i le vaiaso i ona tua atu, o le ulua’i 4 masina muamua o le tausaga tupe fou lenei, e le o se taimi faigofie lea i le faigamalo, ona o le tele o lu’itau ua fetaia’i ma le malo i le itu tupe tau tupe.

 

E mafua lea saunoaga mai le Ta’ita’i o le atunu’u, e pei ona taua i lana saunoaga i luma o le Kapeneta, e mafua mai i tulaga lea ua taoto ai pili tupe sa tu’uina atu e le faigamalo i luma o le Fono Faitulafono mo le pasiaina, ae foliga mai ua i ai se fa’aletonu i lenei taumafaiga.

 

“O ulua’i vaiaso o le Kuata muamua o le tausaga tupe lenei ua mae’a atu, e le o se taimi faigofie lea i le tatou faigamalo, e mafua lea tulaga, e le gata i le tele o fesuiaiga mai le malo tele, a o lea fo’i o loo maitauina ni isi o tulaga le mautu i fuafuaga sa tuuina atu i le Fono Faitulafono e ala i a tatou pili tupe, ae le avea nei fa’afitauli ma lu’itau ma auala tatou te fa’avaivai ai ma solomuli,” o le saunoaga fa’alototele lea a le ali’i kovana.

 

O lagona ma mafaufauga o le atunu’u i fesuiaiga ua i ai le fa’atautaiga o gaioiga ma galuega a le malo, o le isi lea itu na taua e le ali’i kovana o lo o mafua mai ai lu’itau ma fa’afitauli, peita’i e le avea ia auala ma itu e faaloto vaivai ai Ta’ita’i o le malo mai lo latou fa’atinoina o galuega lelei e manuia ai le atunu’u.

 

Na aofia i le saunoaga a le ali’i kovana le va feagai o le faigamalo ma le Fono Faitulafono, aemaise lava i le talanoaina o pili tupe sa fa’amoemoe e maua mai ai se fesoasoani mo le malo.

 

Saunoa Lolo e fa’apea, e i ai lona talitonuga sa i ai le fa’aletonu i le pito laau a le faigamalo, i le auala na tuuina atu ai pili tupe i luma o le Fono Faitulafono. E mafua lea tulaga, ona sa ese le vaai a le faigamalo i auala e tatau ona iloiloina ai e Senatoa ma Faipule pili tupe, ese fo’i le silasila a le Fono Faitulafono i le taimi na taunu’u atu ai pili tupe nei.

 

“Sa tatou fa’amoemoe e tatau ona pasia e le Fono Faitulafono le lafoga o oloa e 7% ina ia fesoasoani ai i tupe maua a le malo, peita’i ina ua taunu’u atu a tatou pili tupe, sa ese fo’i le silasila a le Fono Faitulafono, lea ua mafua ai ona faia la latou fa’aiuga. Tatou te le tuuaia le Fono Faitulafono, ae tatau ona tatou toe vaavaai i se auala e fa’aleleia atili ai a tatou pili tupe, a o lei toe tu’uina atu i luma o le Fono Faitulafono i le tausaga fou,” o le saunoaga lea a Lolo.

 

Ua i ai le fa’amoemoe e pei ona saunoa le ali’i kovana, o le a toe galulue le faigamalo i le toe fa’aupuina o ana pili tupe ina ia atoatoa ma lelei, e aofia ai ma le taumafaiga ina ia tu’u fa’atasi ni isi o pili tupe ina ia tasi ai ma faigofie le gagana o le tulafono, a o le i toe tuuina atu i luma o le Fono Faitulafono i le tausaga fou.

 

Na faamaonia e Lolo i luma o le Kapeneta, le mae’a lea ona latou fono ma Ta’ita’i o le Fono Faitulafono e uiga i lenei mataupu, ma ua malilie fo’i i laua i le auala lea o le a faia e le faigamalo, o le teena o ni isi o pili tupe ua uma ona pasia e Senatoa ma Faipule, ina ia mafai ai ona toe faia ni isi teuteuga e fa’aleleia atili ai, a o lumana’i ai le tuuina atu i luma o le Fono Faitulafono.