Tele lu’itau fa’ataoto Maoputasi i sui o le Itumalo i le Fono

ausage@samoanews.com

O le fonotaga a le Itumalo o le Maoputasi lea na usuia i le malae i Gagamoe i le aso Gafua na te’a nei, na fa’atula’i e le fa’aao o le itumalo le tele o lu’itau e tatau ona galulue i ai sui o le Itumalo o le a pale mai i nofoa o le Fono Faitulafono i le isi nofoaiga o le a sosoo nei.

 

O ni isi o ia atina’e e pei ona saunoa le afioga i le Maoputasi ia Mauga Tasi Asuega, o le fa’aleleia lea o le paka o lo o i totonu o le afioaga, fa’aauau le fausiaina o le sewer line i le afioaga i Aua, aemaise ai o le va’ava’ai i auala eseese e si’itia ai atina’e i totonu o le itumalo i tulaga o auala ma auvai.

 

Sa auai i le fonotaga afioga i Faipule e to’alima o le itumalo o lo o latou nofoia nofoa o afioaga ta’itasi i totonu o le maota o sui i le nofoaiga lenei a le Fono Faitulafono.

 

O i latou na auai e aofia ai Meauta Mageo o Pago Pago, Faimealelei Anthony Fu’e Allen o Aua, Vaetasi Tuumolimoli Saena Moliga o Leloaloa ma Atu’u, Vailoata E. Amituana’i o Fagaalu ma Utulei/Gataivai, o i latou uma ia ua toe manumalo mai i nofoa a o latou itumalo mo le isi nofoaiga o le a sosoo nei, fa’apea ai ma le afioga i le ali’i faipule mai Fagatogo ia Maugaoali’i Leapai Tusipa Anoa’i, lea ua le manuia lana taumafaiga mo le nofoa o le itumalo mo le isi 2 tausaga.

 

Mo le sewer line i le afioaga i Aua, na fautuaina e Mauga ia le afioga ia Faimealelei ina ia galulue fa’atasi ma le  Vaetasi i le fa’atinoina lea o auala lelei uma e mafai ai ona fa’aauau le fausiaina o lea galuega.

 

“Tautuana ma lau afioga Faimealelei le tatou sewer line i Aua, o le galuega lea sa ma amataina mai ma le afioga ia Paopaoailua [Joe Fiaui] ua usufono, lea fo’i la ua e tula’i mai i le tofi a le itumalo, ua tatau fo’i la ona lua galulue malosi ma Vaetasi i le unaia maia o lenei galuega, ua tatau ona fa’amae’a le galuega o le paipa lea, e tele le sao taua o le galuega lena i totonu o le itumalo o le Maoputasi”, o le saunoaga lea a Mauga, o ia fo’i lea o le Failautusi o le Ofisa o Mataupu Tau Samoa.

 

I le avea ai o Mauga ma Failautusi o le Ofisa o Mataupu Tau Samoa, sa ia fa’aaogaina ai lona tulaga fa’ata’ita’i i le faigamalo fa’alotoifale, atoa ai ma lona tulaga fa’ata’ita’i o le Itumalo na te fautuaina ai ali’i mautofi uma o le itumalo, ina ia fa’amaoni i le fa’atinoina o latou tiute.

 

“Mo Pulenu’u uma ma Leoleo o le itumalo, e fautuaina outou ina ia fa’amalosia galuega i totonu o nu’u ma afioaga o le itumalo, ma fa’amalosia tulaga o le puipuiga ina ia fa’aitiitia ai tulaga o fa’afitauli ma fa’alavelave e tutupu i totonu o nu’u ta’itasi o le itumalo”, o le saunoaga lea a Mauga, ma ia fautuaina ai loa afioaga ta’itasi uma o le itumalo, ina ia tapena a latou lisi o Pulenu’u ma Leoleo e fa’aoo mai i le isi fonotaga a le itumalo lea ua fuafua e faia i le afiafi o le aso, aso Lulu, Novema 23, 2016.

 

O le itula e 12:00 i le aoauli nei e fono ai le Falelima i Sasa’e i le maota o Mauga o Gagamoe i Pago Pago, mo le fa’amautuina o tofiga a le Falelima i totonu o le Faigamalo Fa’alotoifale, e aofia ai le tofi o le Kovana o le Falelima.

 

Na fa’ailoa e Mauga i le itumalo o le Maoputasi le mae’a lea ona ia taliaina o le talosaga a le Itumalo o Ituau, ina ia toe lafo atu le tofi o le Kovana o le Falelima e tauave e le afioga i le To’afia ia Alo Dr.Paul Stevenson, ae o le a fa’atali le fa’amautuina o lea tofiga i le fono a le Falelima i le aso.

Comment Here