Ads by Google Ads by Google

Tele lagolago uo ma aiga mo aiga a’afia fa’alavelave a le Manu’a Store


[ata: archive]
ausage@samoanews.com

A o feagai ai pea aiga o ali’i na a’afia i le fa’alavelave lea na tula’i mai i le faleoloa o le Manu’a Store i Tafuna i le aso To’ona’i na te’a nei, ma tulaga faigata ona o le tulaga matuia o lenei fa’alavelave, ua fa’aalia e le to’atele o le atunu’u lautele fa’apea ai uo ma aiga lo latou lagolagoina o aiga o i latou ua a’afia, e ala i le momoli atu i ai o feau fa’amalosi ma fa’amafanafana, atoa ai ma le tu’uina atu o teu fugalaau ma tusitusiga e fa’alototeleina ai i latou.

 

E pei ona silafia e le atunu’u, o le aso To’ona’i o le vaiaso na te’a nei na tula’i mai ai se fa’alavelave i le nofoaga o le Manu’a Store i Tafuna, ina ua aafia se uaea eletise malosi mai galuega sa fa’atinoina ma sipata ai ni ali’i faigaluega se to’a 6, ma i’u ina maliu ai le to’atasi ae manunu’a le to’a 5 lea na taofia i le falema’i mo togafitiga.

 

O le ali’i na maliu, o le susuga lea ia Iosefa Elia, ae tuua na o si ona faletua ia Leann Lam Yuen Elia, lea o lo o fa’amoemoe o le masina o Mati o le tausaga nei e tu’u eseeseina ai e le Atua o ia ma le la pepe ulumatua.

 

O i latou e to’a 5 na taofia i le falema’i i Fagaalu, e aofia ai le to’atolu sa a’afia i manu’a e le tigaina tele, ma le to’alua sa togafia ma te’a mai i le falema’i.

 

A o feagai ai le aiga o le susuga ia Elia ma lagona fa’avauvau ona o le motusia fa’afuase’i o le mafutaga ma lenei ali’i, o le taeao o le aso Lulu na te’a nei na maliu ai le isi ali’i sa taofia i le potu tigaina i le falema’i i Faga’alu, le susuga ia Saito Paulo o Fagaitua.

 

Na molimauina e le Samoa News le to’atele o uo ma aiga o le susuga a Paulo na lolofi atu i le malumalu o le Falema’i i Faga’alu, i le mae’a ai lea ona o latou maua o le tala fa’anoanoa e fa’atatau i lona maliu.

 

Na fa’amaonia ai e le Komesina tofia o le Matagaluega o le Puipuiga o le Saogalemu Lautele le fa’aauau pea o su’esu’ega a Leoleo e tusa ai o lenei fa’alavelave.

 

I luga o auala o fesootaiga e pei o le Facebook, sa maitauina ai e le Samoa News le tele o tusitusiga fa’amaise atoa ai ma feau fa’amalosi mai uo ma aiga o lo o tu’uina atu i aiga aemaise ai ta’ito’alua o ali’i ua maliliu, e fa’alototeleina ai i latou ao i ai i lenei taimi faigata o mafutaga ua motusia.

 

Tau ina ia fa’amaise le Agaga Paia o le Atua i aiga o lo o feagai ma fa’anoanoaga, ona o lenei fa’alavelave matuia ua fa’afuase’i ai ona motusia mafutaga a i laua ua maliliu ma o laua aiga.