Ads by Google Ads by Google

Tele fesoasoani mai le Koluse Mumu mo aiga na afaina i le ‘afa o Gita


I lenei ata mai le Facebook a le malo o Amerika Samoa (ASG), o se vaaiga i le aufaigaluega a le Koluse Mumu kiliva fesoasoani i nu’u mo aiga sa afaina i le ‘afa o Gita. [ata: ASG]

Ua fa’ailoa aloaia mai e le Ofisa o le Koluse Mumu le tele o fesoasoani ua mae’a ona tufatufaina atu i aiga na a’afia i latou ona o le malolosi o matagi mai le ‘afa o Gita na a’afia ai le atunu’u i le aso 9 o Fepuari.

 

O fesoasoani eseese e pei ona tufatufa atu i aiga na mafatia o loo aofia ai ma le ‘card’ - Client Assistance Card (CAC) - e fai ai fa’atau mo mea uma e mana’omia i totonu o le aiga. Ae fa’atulagaina i latou e maua le ‘card’.

 

Na asia e le Ofisa o le Koluse Mumu afioaga e 13 i totonu o le atunu’u, o nofoaga ia sa pito sili ona mafatia i le ‘afa, ma tufatufa atu i ai le aofa’i o fesoasoani eseese e tusa ma le 29,000 e pei o kula e fa’amalulu ai taumafa ma vaiinu, ogaumu e kuka ai meaai ma fagu kesi, o tapoleni e nonofo ai, aemaise ai vaega eseese e fesoasoani i le aiga.

 

E eseese vaega o loo fa’avae i ai le tufatufaina atu o fesoasoani a le Koluse Mumu. E faavae fesoasoani i le tulaga pagatia na aafia ai aiga. E i ai aiga e feololo meatotino sa faaleagaina, ae i ai fo’i aiga ua matua faaleagaina uma lava meatotino e aofia ai ma le fale ua pau i lalo, o i latou la ia o loo sili ona mamafa i ai fesoasoani a le Koluse Mumu.

 

Mo le fa’aaogaina o le ‘card’ e fa’atau ai fesoasoani mo aiga, ua fautuaina e le Koluse Mumu e fa’apea, o le ‘card’ lea e mafai ona fa’aaoga i le tuana’i ai o aso e 3 talu ona tauaaoina atu.

 

A mae’a loa aso e 3 talu ona tauaao lau ‘card’, ona mafai loa lea ona fa’aaoga e tala mai ai se tinoitupe i se masini ‘ATM’, pe ave fo’i e fa’atupe mai ai se fa’atau mai faleoloa eseese e mafai ona latou fa’aaogaina ituaiga card o le ‘Visa cards’.

 

O oloa e mafai ona fa’atau i le ‘CAC card’ e aofia ai taumafa, lavalava, kesi, atoa ai ma manaoga e manaomia i totonu o le aiga.

 

O lo o fa’aauau pea ona tauaao atu e le Koluse Mumu taumafa mo aiga o lo o alala i nofoaga o sulufaiga e oo mai i le taimi nei, ae ua fautuaina i latou ina ia aga’i atu loa i o latou aiga, pe afai ua tulaga lelei o latou aiga mo le toe fo’i atu i ai, poo le taimi fo’i latou te tauaaoina ai fesoasoani mai le malo ma le Koluse Mumu.

 

Ua faailoa mai e ni isi o aiga mai isi afioaga na aafia le amata lea ona toe fo’i atu o i latou i nofoaga sa nonofo ai, ina ua mae’a ona tauaao a latou fale tapoleni i le vaiaso nei.