Ads by Google Ads by Google

Tele fesoasoani agava’a i ai le aufai faiva a le atunu’u

 Le Faatonusili o le Ofisa o le Puipuiga o le Vaomatua ma le Siosiomaga ia Dr. Ruth Matagi.  [ata AF]
ausage@samoanews.com

Na fa’aalia e le Fa’atonusili o le Matagaluega e Puipuia le Gataifale ma le Vaomatua (DMWR) ia Dr. Ruth Matagi-Tofiga i luma o le Komiti Soofa’atasi o le Paketi a le Fono Faitulafono i le taeao ananafi, le tele o fa’amanuaiga e agava’a i ai le aufai faiva a le atunu’u, pe afai e mulimulita’i i latou i ta’iala ma a’ia’iga o lo o moomia ina ia maua ai a latou fesoasoani tau tupe.

 

Ina ua fesiligia e le afioga i le ali’i senatoa ia Magalei Logovii tulaga o tupe e fesooasoani ai mo le fausia o ituaiga va’a fagota ua taua o le ‘super-alia’, na saunoa ai Matagi-Tofiga e fa’apea, o vaega tupe fesoasoai nei e talosagaina sa’o i le Komiti Fa’afoe o Faiga Faiva i le Pasefika, peita’i e oo mai lava i le taimi nei e lei maua mai lava lea fesoasoani.

 

O le vaega tupe e pei ona fesiligia, e aumai sa’o lava i le Komiti Fa’afoe o Faiga Faiva a le Pasefika, e fausia ai le isi ituaiga va’a alia fagota e pei ona saunoa le tama’ita’i fa’atonu, ina ia mafai ai ona fesoasoani atili i le fa’aleleia o tulaga i faiga faiva i le atunu’u.

 

“O lo o tele naua fesoasoani e mafai ona maua e le aufai faiva i va’a fagota alia, pau le vaega latou te faia, o le tu’u fa’atasia o fa’amaumauga o loo moomia e pei o le aofa’i o i’a sa maua i a latou faiva, aofa’iga o faiga faiva, ina ia mafai ona fesoasoani i fa’amaumauga e tu’uina atu mo le talosagaina o se vaeupga mai fafo”, o le saunoaga lea a le faatonu.

 

O se ni isi o atugaluga sa fa’aalia e ni isi o senatoa ma faipule, o tupe o loo totogi e le aufai va’a fagota alia mo le taula ai o a latou va’a i le uafu i Malaloa, ao lea e leai ni tupe o lo o totogi e le aufai va’a fagota tetele o lo o taula mai i le isi itu o le uafu i Malaloa.

 

Saunoa Faletagoa’i Tuiolemotu e fa’apea, afai ua totogi e le aufai va’a alia tupe mo le taula ai o a latou va’a fagota i le uafu o va’a faila i Fagatogo, e tatau fo’i la ona totogi se tupe a i latou o lo o pulea va’a fagota lapo’apo’a.

 

Sa talosagaina e le afioga i le ali’i fofoga fetalai ia Savali Talavou Ale le tama’ita’i fa’atonu, pe le mafai ona fausia se uafu e taula i ai va’a fagota alia i le itu i sisifo o le atunu’u, ina ia taofia ai le aufai va’a alia i le tau malaga mamao mai i sisifo i le taimi e a’e mai ai a latou fagota, ina ia sefe ai fo’i le kesi o lo o alu e tau ta’amilo mai ai.

 

Saunoa le faatonusili e fa’apea, e mafai ona fa’atinoina manaoga e pei ona taua, peita’i o le fa’afitauli o se alagatupe e fa’atupe ai lenei manaoga taua, ae i lona talitonuga, e mafai ona fa’atinoina vaega uma e pei ona talosagaina mo le fa’aleleia o le auaunaga mo le aufai faiva, pe afai ae maua ni alagatupe mai le malo tele e fesoasoani ai i le fausiaina o atina’e pei ona fautuaina.

 

I le fa’aiuga o le iloiloga na valaaulia ai loa e le faatonusili afioga i Senatoa ma Faipule ina ia auai atu i le fa’aaliga tele a le aufai faiva a le atunu’u, lea ua fa’amoemoe e faia i le taeao o le aso To’ona’i o le vaiaso nei, i le itula e 6:00 i le taeao i le nofoaga autu o le maketi i Fagatogo, ina ia maua ai lo latou silafia i tulaga o lo o i ai le atina’e o faiga faiva i le atunu’u.

 

Sanoa ia saunoa atili e fa’apea, o lenei fa’aaliga, o se ulua’i fa’aaliga lea a le aufai faiva o le a faia i le atunu’u, e fa’alauiloa ai ituaiga i’a eseese o le a mafai ona latou fagotaina mai ma fa’atau atu i le atunu’u lautele.

 

“O le fa’aaliga lenei e fa’apitoa mo i latou uma lava o lo o i ai a latou va’a fagota alia, ina ia mafai ona lesitalaina i latou ma auai i lenei fa’aaliga, ma maua ai fo’i le avanoa o le atunu’u e mailoa ai i a latou taumafaiga”, o lana saunoaga lea..

 

Na taua e ni isi o le aufai faiva a le atunu’u i le Samoa News i le lua vaiaso talu ai, o le taua o le fa’aaliga lea ua fuafua e fa’ataunu’uina i le fa’aiuga o le vaiaso nei, e le gata e maua ai le avanoa o le aufai faiva i va’a fagota alia e fa’aali ai tulaga o faiga faiva, ae o se auala fo’i lea e taumafai ai e tau fa’aolaola atili le Asosi ua tauau ina mou malie ese atu.