Tele fesili ma fa’asea atunu’u i le fa’aaoga o ta’ifau ma masini su’e ai uta


Se alii o le Ofisa o Tiute i le taimi na ia toso ese mai ai se ato pa’u ua mae’a ona siaki i totonu o le masini a le Ofisa o Tiute, i uta mai Samoa na malaga mai ma le Lady Naomi i le vaiaso na te’a nei. [ata AF]

Ni isi o le pasese a le Lady Naomi mai Samoa i le taimi na taunu’u mai ai i le uafu i Fagatogo i le vaiaso na te’a nei, a o ta’ita’i atu e se sui o le Ofisa o Tiute ia se tasi o ta’ifau mai le vaega a le latou K-9 Units, mo le sailia o fualaau fa’asaina i uta na malaga mai ma le va’a. [ata AF]
ausage@samoanews.com

Ua avea le fa’ateia o le vaai a ni isi o le mamalu lautele o le atunu’u i le auala lea ua fa’atinoina ai galuega a le Vaega Fa’amalosi Tulafono a le malo, e pei o le Ofisa o Tiute ma Leoleo, i le mataalia o le sailia o uta mai fafo i le uafu ma le malae va’alele na fa’alogoina ai le tele o fesili ma fa’asea a ni isi o le atunu’u, i le mafua’aga o nei suiga fa’afuase’i.

 

Na taua e se tasi o Tamali’i o le atunu’u le fa’ateia o ia ina ua ia molimauina ni isi o malu o le malo i le malae va’alele i Tafuna i le vaiaso na te’a ei, fa’atasi ai ma a latou ta’ifau o lo o tata’i solo i vaega o lo o malolo ai le mamalu o le atunu’u i tagata malaga ma le au fa’atali va’a.

 

Na oo foi ina ua ia malaga mai i le uafu i Fagatogo i le vaiaso lava na te’a nei e fa’atali ni isi o lona aiga mai Samoa, ae sa ia toe molimauina ai fo’i le vaaiga lava lea e tasi, e ese na fa’aaoga ta’ifau e su’e ai uta i totonu o le va’a, ae toe aumai fo’i i fafo ua siaki i le masini (scanner) o lo o i totonu o le Van a le Ofisa o Tiute o lo o paka atu i fafo.

 

“O le fesili ua oo mai, o tagatanu’u ea o Amerika Samoa ma Samoa o ni tagata ua latou fa’atinoina ni solitulafono matuia ua mafua ai ona i ai nei vaaiga faafuase’i i totonu o le atunu’u,” o le saunoaga lea a lea Tamali’i o le atunu’u e le finagalo e fa’ailoa lona suafa, ona o puipuiga lava i tulaga o le saogalemu ma le malu puipuia o lona tagata matua.

 

I le tele ai o tausaga o tautua lenei Tamali’i i vaega ‘au a le malo tele, fa’apea ai ma tausaga sa aumau ai i Amerika, a o lea ua toe fo’i mai e tautua i le malo, nu’u ma aiga, sa ia taua ai e fa’apea, e le tatau i le Komesina o Leoleo ona faia nei ituaiga gaioiga o le feofeoa’i o Leoleo ma a’upega fa’apea ai ma ta’ifau i nofoaga tumutumu o lo o feoa’i sa’oloto ai le atunu’u, ina ne’i avea ma itu e fa’apopoleina ai le mamalu lautele o le atunu’u.

 

“E to lo’u pulou i taumafaiga ua faia e le malo e saili ai ma fa’atamaia i latou o lo o aumaia ma umia fualaau fa’asaina i le atunu’u, atoa ai ma a’upega mata’utia, ae o la’u fautuaga, tu’u le feoa’i solo i nofoaga e tumutumu ai le atunu’u ma le oso ai o lagona popole o le atunu’u, ae aga’i sa’o i nofoaga ma nu’u o lo o tulei ma fa’atau mai ai fualaau fa’asaina, nofoaga ia o lo o silafia uma e Leoleo ma le to’atele o le atunu’u, nofoaga na ua leva na tatau ona fa’atamaia ma molia i latou o lo o faia na faiga le alofa i le tulafono,” o lana saunoaga lea.

 

Na taua e ni isi sa i ai i le uafu i Fagatogo lagona fa’anoanoa toe ita, i le auala o lo o fa’atinoina ai e le Ofisa o Tiute le siakiina o uta e pasese o lo o malaga mai le Lady Naomi, ona e atagia mai ai uiga tufanua ma le leai o se fa’aaloalo, ae ua avea le naunau e saili fualaau fa’asaina ma auala ua soona faia ai le mamalu o le atunu’u i taimi e ta’amilo ai a latou ta’ifau i le sailiina o uta, aemaise ai taimi e fa’aaoga ai le masini (scanner) e siaki ai ato.

 

Na taua e se tasi o Tama sa malaga mai ma lona afafine i le Lady Naomi le fa’ateia o i laua ina ua fa’atonu e le sui o le Ofisa o Tiute sa ta’ita’iina atu le ta’ifau i laua ina ia taofi la ato mo se taimi umi lava a o sosogi ai le ta’ifau, ona toe avatu fo’i lea ua tu’u i totonu o le masini e siaki ai, ma ua pei ai laua o ni tagata o lo o aumaia fa’anana fualaau fa’asaina i le atunu’u.

 

I le taimi o folafolaga a le maota o sui i le aso Gafua na te’a nei, na fautuaina ai e ni isi o afioga i faipule le tatau lea ona silasila toto’a le Komesina fa’apea ai le Ofisa o Tiute i auala e fa’atino ai le sailiina o uta mai fafo, ina ia aua ai ne’i a’afia aia tatau ma lagona o tagata lautele.

 

Na taua e le Komesina o Leoleo ia Le’i Sonny Thompson i le Samoa News, i le taimi na fa’alauiloa ai le suiga ua faia e sailia ai uta mai fafo mo fualaau fa’asaina e fa’apea, o le agaga atoa o le Ofisa o Leoleo, ia mafai ona galulue ma isi ofisa fa’amalosi tulafono a le malo i auala e mautinoa ai e le o toe sao mai fualaau fa’asaina i totonu o le atunu’u.

Comment Here