E tele fesili mai afioga i Faipule ma Senatoa e fa’atatau i fa’amatalaga ma lapataiga sa tuuina atu e le Ofisa Vaaitau atoa ai ma le lagolago a le Matagaluega o le Puipuiga o le Saogalemu Lotoifale mo le atunu’u i le ‘aga o Gita na fa’atoa mavae atu nei.

O le afioga i le ali’i Senatoa ia Magalei Logovi’i na ia lagaina le mataupu i le fa’aletonu o ripoti sa tuuina atu e le Ofisa Vaaitau i luma o le Senate i le vaiaso na te’a nei. Na taua e Magalei e fa’apea, ana talafeagai ripoti na tuuina atu i le atunuu, e le tele se fa’aletonu e maitauina i meatotino a tagata.

Ae o le tele ai o maota ma laoa na fa’aleagaina i le malolosi o matagi to fa’ata’uta’u, ua lava lea e fa’ailoa mai ai e lei tapena le atunu’u i le fa’alavelave, e mafua mai i le le sa’o o ripoti sa tuuina atu.

E lei nofo lelei foi i le fa’afofoga a Magalei le fa’amatalaga mai le Pule o le Ofisa Vaaitau, e fa’atatau i le tele lea o se lesona ua latou aoaoina mai mea fa’aletonu na alia’e mai i le latou auaunaga i le taimi o le ‘afa o Gita.

I luma o le Maota o Sui i le vaiaso fo’i na te’a nei, na fa’aleo ai e ni isi o afioga i Faipule le tatau lea ona fa’atulaga se iloiloga e fesiligia ai le tautua a le Ofisa Vaaitau, atoa ai ma le Matagaluega o le Puipuiga o le Saogalemu Lotoifale, i le taimi e fetaia’i ai le atunu’u ma fa’alavelave fa’alenatura.

O le afioga i le ali’i faipule mai Manu’a #1 ia Vesi Talalelei Fautanu Jr na ia talosagaina le iloiloga. Saunoa Vesi e fa’aepa, e i ai lona talitonuga e lei lelei ripoti ma fa’amatalaga sa tuuina atu e le Ofisa Vaaitau i le atunu’u. E oo lava foi i le auaunaga a le Ofisa o le Puipuiga, e i ai fo’i lona talitonuga e lei atoatoa lana auaunaga e tatau ona faatinoina mo le atunu’u.

“E foliga mai ua alu tele mafaufau o le Ofisa o le Puipuiga i le tau mata’ituina o le taimi e fana ai le pulu faaniu kilia a Kolea i Matu, ae galo ai ona fa’atino la latou matafaioi e pei o le asia o le atunuu ina ia mautinoa o loo malu puipuia ma tapena mo le ‘afa”, o le saunoaga lea a Vesi.

Na lagolagoina e le afioga i le ali’i Faipule ia Timusa Tini Lam Yuen le finagalo o Vesi mo se iloiloga. Saunoa Timusa e faapea, sa i ai lona talitonuga o le taimi tonu lea e fa’aola ai sailini e fa’ailoa atu ai i le atunu’u le ‘afa ua lata mai, ae o se itu e fa’anoanoa ai, e leai se sailini na ola.

I le lata ai i le 10 tausaga talu ona tuana’i le galulolo o le 2009, na taua ai e Timusa e fa’apea, o le aoga tonu lava lea o sailini sa faapipi’i solo i le atunu’u, atoa ai ma le anoanoa’i o aoaoga sa faia, ina ia fa’aaoga sailini e logo ai tagata i le taimi o le fa’alavelave, ae foliga mai e leai ma se fuafuaga na taunu’u.

Na lagolagoina e le Sui Fofoga Fetalai ia Fetu Fetui Jr ma le afioga a Vailoata Eteuati Amituana’i le faia o se iloiloga.

Na talosagaina e Vailoata pe mafai ona fa’aopoopo atu ai ma le Faatonu o le Ofisa o Fesootaiga a le malo (ASTCA) i le iloiloga, ona o le isi lea fa’afitauli sa maitauina e le atunu’u i le taimi o le ‘afa o Gita, o le motusia uma lava o fesootaiga i le taimi na malolosi ai le agi o matagi, e oo mai lava fo’i i le taimi lenei, o loo i ai lava afioaga o le atunu’u e le i toe lelei lava a latou fesootaiga tau telefoni ma le televise.

O le vaiaso fou lea ua fuafua e fa’ataunu’uina ai lenei iloiloga a le Maota o Sui, ae le’i mautu le aso mo le iloiloga a le Senate.