Tele fesili fiamalamalama ai Fa’amasinoga fa’asaga i se ali’i pagota

ausage@samoanews.com

E tele naua fesili o lo o fiamalamalama ai le Faamasinoga Maualuga, fa’asaga i se ali’i pagota o lo o tuli sona fa’asalaga fa’a falepuipui i le taimi nei, i le mafua’aga e ala ai ona sola soo ese o ia mai totonu o le toese i Tafuna.

 

O ni isi o ia fesili e pei ona saunoa le afioga i le ali’i fa’amasino sili ia Michael Kruse fa’asaga i le mataupu a le ali’i pagota o Joeita Fa’aaliga, o le mafua’aga e le mafai ai e le pulega a le falepuipui ona latou iloa le taimi e sola ese ai Fa’aaliga, atoa ai ma le saogalemu o pagota ao tuli ai a latou fa’asalaga.

 

O le vaiaso na te’a nei na toe valaauina ai le mataupu a le ali’i o Fa’aaliga i luma o le Fa’amasinoga Maualuga, mo le tuuina atu o se fa’aiuga a le fa’amasinoga fa’asaga i le mataupu lea ua tu’uaia ai o ia, o lona le usitaia lea o poloaiga o lana nofovaavaaia sa tuuina atu i le 4 tausaga talu ai.

 

E pei ona manino i fa’amaumauga a le Fa’amasinoga, o Fa’aaliga na ulufale mai i Amerika Samoa i le masina o Aokuso 2012 i se pemita tafao e 30 aso, ma nofo fa’asolitulafono ai lava i le atunu’u e le i toe fo’i i Samoa.

 

I le latalata ai i le tausaga atoa talu ona nofo fa’asolitulafono o ia i le atunu’u, na alia’e mai ai loa le ulua’i mataupu e pei ona tu’uaia ai o ia i le gaoi ma le talepe fale i le masina o Iulai 2013, ma ta’usala ai o ia e le Fa’amasinoga i moliaga mamafa e 2 o le talepe fale i le tulaga muamua atoa ai ma le talepe fale i le tulaga 2.

 

E 7 tausaga na faanofovaavaaia ai e le Fa’amasinoga maualuga ia Fa’aaliga i le mataupu lea, e aofia ai le poloaiga o lona tuliina lea o masina e 40 i le falepuipui. A o i ai o ia i le falepuipui mo le tuliina o lana fa’asalaga, na sola ai o ia i tua ma osofa’i se faleoloa Asia i le 2014, ma fa’amaonia ai e le fa’amasinoga le moliaga o le talepe fale i le tulaga 2 fa’asaga ia te ia, ma faasala ai o ia i le toese mo le umi e 20 masina, o se tasi lea o tuutuuga o lana faanofovaavaaia e 7 tausaga.. E fa’atoa tuli lana fa’asalaga lea pe a mae’a ona tuli lana ulua’i fa’asalaga e 40 masina.

 

A o taofia ai o ia i le toese, sa avea ai o ia o se pagota ua fa’atuatuaina, ma tuuina atu ai loa ia te ia le tulaga o le “Trustee” i totonu o le toese, ma ia maua ai le avanoa e fealua’i sa’oloto solo ai i totonu o le lotoa, atoa ai ma lona fesoasoani i Leoleo o le falepuipui i ni isi o galuega fa’atino.

 

I le po o le aso 30 Iuni i le 2016, na sola ai i tua Fa’aaliga ma ia gaoia le ato tupe a se fafine sa nofonofo i totonu o lana ta’avale. Na molia o ia e le malo ma ta’usala e le fa’amasinoga i le moliaga o le gaoi, ma faasala ai o ia e tuli le umi e 7 tausaga i le falepuipui.

 

Na avea le mataupu lea na auala na fa’atoa iloa ai loa, o ia fo’i lea na osofaia se faleoloa Asia i Tafuna i le po o le ao 19 Iuni 2016, ina ua sola mai i tua o le toese ma osofa’i le faleoloa Asia lea, ma ia gaioiina ai le tupe e $1,500.

 

Na molia o ia e le malo i le moliaga o le sola i tua mai le falepuipui, ma fa’amaonia ai lana solitulafono e le Fa’amasinoga, ma fa’asala ai loa o ia e tuli le umi e 5 tausaga i le toese. O lana fa’asalaga lea e fa’atoa tuli pe a uma ona tuli lana 7 tausaga na muamua tuuina atu. Lona uiga, e 12 tausaga lea ua poloaina o ia e tuli atoa i le falepuipui.

 

Afai ae faaopoopo le faasalaga faa falepuipui a Fa’aaliga lea ua tuliina nei, atoa ai ma fa’asalaga o le a fuafua le fa’amasinoga e tuuina atu, e mafua mai i lona le usitaia o tuutuuga o lana nofovaavaaia, e ono taofia o ia i le falepuipui mo le 34 tausaga.

 

Ua fautuaina e Kruse loia a le malo ma le loia a Fa’aaliga, ina ia tuuina atu ni a laua fautuaga i se ituaiga fa’asalaga e tatau ona faia mo le ua molia. E talitonu le fa’amasinoga, e le tatau i le Pule o le Toese ona ia tofia Fa’aaliga ma isi pagota o loo faanofovaavaaia i lalo o le malosi o le fa’amasinoga, e avea ai i latou ma “Trustee”, ona o iina lea o lo o mafua mai ai le fa’alavelave e pei ona toe solitulafono ai le ua molia

 

O le masina o Ianuari 2018 lea ua toe tolopo i ai le mataupu a Fa’aaliga, ma o lo o taofia pea o ia i le falepuipui i le taimi nei.

Comment Here