Ads by Google Ads by Google

Tele fesili fa’atatau ali’i sa avea ma Leoleo o loo tau sailia nei


[ata: SN]
ausage@samoanews.com

E tele naua fesili e le o mafai ona taliina i le taimi nei e fa’atatau i le mataupu lea o lo o tau sailia ai le ali’i lea sa avea ma Leoleo, lea na toe tatala i tua mai le toese i Tafuna i le mae’a ai lea ona taofia o ia e Leoleo i le vaiaso na te’a nei.

 

E le i manuia taumafaiga a le Samoa News mo le tau sailiina mai lea o se finagalo mai le Komesina o Leoleo, tofa Le’i Sonny Thompson i le vaiaso na te’a nei e fa’atatau i lenei mataupu.

 

Ae o ni isi o ia fesili e aofia ai le mafua’aga na ala ai ona toe tatala i tua Steve Tuatoo mai le toese i Tafuna, ae taofia ai pea isi ali’i e to’alua na taofia fa’atasi mai i latou e Leoleo.

 

O ripoti ua maua e le Samoa News e fa’apea na mafua ona toe tatala i tua Tuatoo, ona ua mae’a le 48 itula na taofia ai o ia, peita’i e o o atu fo’i i le taimi na mae’a ai le 48 itula, e le i mae’a ona fa’amautu moliaga fa’asaga ia te ia.

 

O Tuatoo, lea sa avea o se Leoleo a le malo mo le tusa ma le 20 tausaga, na to’atolu i ai ali’i na taofia mai e Leoleo i le taeao sesegi o le aso Tofi o le vaiaso na te’a nei, ina ua osofaia lona fale i Alofau fa’apea ai ma se fale i Taputimu, i lalo o se poloaiga mai le Fa’amasinoga, i le tau sailia lea o tulaga i fualaau fa’asaina.

 

O isi alii e to’alua e aofia ai Cody Christian Wood ma Taisia Lemalie, o ia o se ali’i ave taxi.

 

Na taua e se molimau i le Samoa News e faapea, o le taeao o le aso Toona’i o le vaiaso i ona tua atu ina ua tatala Tuatoo i tua mai le toese, o le taeao lava fo’i lea o lo o masalomia na tuua ai e ia le atunu’u ae malaga atu i Samoa.

 

O le vaiaso na te’a nei na tutula’i ai na o Wood ma Lemalie i luma o le fa’amasinoga mo a laua mataupu, se’i vagana ai Tuatoo e le i tula’i o ia i luma o le fa’amasinoga.

 

I se feiloaiga ma le Sui Komesina o Leoleo i le vaiaso na te’a nei, sa ia fa’amaonia mai ai le mae’a lea ona faila o moliaga fa’asaga i ali’i uma nei e to’atolu, ma ua fa’atulaga fo’i tupe e tatala ai i latou e fa’atalitali ai taualumaga o a latou mataupu.

 

E $200,000 lea ua fa’atulaga e tatala ai i tua Wood, $25,000 mo Tuatoo ae $5,000 mo Lemalie.

 

Na taua e se molimau i le Samoa News i le vaiaso na te’a nei, le fa’aauau pea lea ona taumafai le Ofisa o Leoleo a le atunu’u e tau saili fa’amaumauga i femalagaaiga a Tuatoo, ina ia mafai ai ona tau manino poo fea tonu o lo o aga’i i ai o ia.

 

O le osofaiga na mafua ai ona taofia i latou nei e to’atolu, na fa’atinoina lea e le Vaega a le Vice & Narcotics Units a le Ofisa o Leoleo, ma latou maua i ai se vaega tele o fualaau fa’asaina, a’upega ma pulufana, faapea ai se vaega tupe tele e silia ma le $50,000, atoa ai ma le tele o meatotino a tagata sa ave fa’agaoi e fa’atau ai fualaau fa’asaina.

 

O le masina o Ianuari o le tausaga fou 2018 lea ua faatulaga e toe tula’i ai Lemalie i luma o le Fa’amasinoga Maualuga, i le mae’a ai lea ona ia teena o tu’uaiga fa’asaga ia te ia i le aso Faraile na te’a nei.

 

O le taeao nei lea ua faamoemoe e fa’ataunu’uina ai le ulua’i iloiloga faapitoa a Wood i luma o le Fa’amasinoga Fa’aitumalo, e iloilo ai e le Fa’amasinoga mau a le malo e tusa ai o le tagi ua fa’aulu fa’asaga ia te ia.