Ads by Google Ads by Google

Tele fa’asea i tulaga fa’aletonu o meaai o lo o fafaga ai pagota


[ata: foa'i]
ausage@samoanews.com

Ua fa’aalia e le to’atele o aiga o ni isi o pagota o lo o tuli a latou fa’asalaga i le toese i Tafuna lagona fa’asea, i le tulaga fa’aletonu o lo o i ai meaai o lo o tausi ma fafaga ai e le malo i latou o lo o fa’a falepuipui i le toese i Tafuna.

 

Na taua e ni isi o aiga o pagota i le Samoa News e fa’apea, ua avea le le lava o mea’ai o lo o fafaga ai pagota ma auala ua talosagaina ai e i latou nei se fesoasoani mai tua i o latou aiga, mo se avanoa e sapalai atu ai taumafa mo i latou i taimi o le vaiaso.

 

E le gata na fa’amaonia mai e ni isi o Loia mai le Ofisa Loia Fautua mo tagata lautele lenei fa’afitauli, ae na o lava fo’i i Leoleopo o le Falepuipui, sa latou fa’amaonia mai fo’i i le Samoa News tulaga fa’aletonu i le le lava lea o meaai o lo o tausi ma fafaga ai pagota.

 

E le i manuia taumafaiga a le Samoa News i le tau sailiina mai lea o se finagalo o le afioga i le Komesina o Leoleo, tofa Le’i Sonny Thompson e uiga i lenei mataupu.

 

O lenei mataupu na tofu mai i le Samoa News i le masina na te’a nei, ina ua talosagaina e se Tina o lo o taofia sana tama i le falepuipui se fesoasoani mo se suesuega, fa’asaga i le fa’afitauli o lo o tula’i mai i le toese, i le le lava lea o meaai o lo o fafaga ma tausi ai pagota.

 

Na faamaonia mai e le Tina lea i le Samoa News e fa’apea, ua avea le le lava o meaai e fafaga ai pagota ma auala ua fai ai ma galuega matua a lona aiga, o le ave lea o meaai mo si ana tama o lo o loka i le falepuipui pe fa’alua i le vaiaso.

 

O le molimau lava fo’i lea na fa’aalia e se isi fo’i Tina talavou i le Samoa News i le vaiaso lenei. O le Tina talavou lea, o lo o loka lona To’alua i le falepuipui, ina ua fa’amaonia e le Fa’amasinoga Maualuga moliaga o le umia fa’asolitulafono o vaega o fualaau fa’asaina.

 

Na taua e lea Tina e fa’apea, e lagona le fa’anoanoa i aso Sa uma e alu ai e asi lona to’alua, i le taimi na te fa’amatalaina atu ai ia te ia le olaga fia’ai i totonu o le falepuipui i le tele o aso.

 

Na taua e le Tina lea e fa’apea, ua avea le tulaga pagatia na fa’ailoa ane e lona to’alua ma auala ua fai ai loa ma ana galuega matua, le ave o meaai mo si ona to’alua i ni isi o vaiaso, ae ese ai meaai e alu ma ia i le aso Sa pe a oo i taimi o asiga a aiga.

 

“E ui lava ua faamaonia le solitulafono a lo’u to’alua atoa ai ma isi pagota o lo o taofia i le falepuipui, ae le tatau lava i le malo ona fa’atamala i le tausiaina o i latou, ae tatau lava ona tausi ma fafaga fa’alelei i latou, o i latou fo’i o pele a aiga,” o le saunoaga lea a lea Tina mafatia.

 

O ni isi o ripoti na maua e le Samoa News, sa taua ai le tele o mea e manaomia e pagota i totonu o le toese e tausi ai lo latou soifua maloloina. O ni isi o ia vaega e le gata i meaai, ae faapea fo’i i fala, aluga ma ieafu e momoe ai, ona e leai ni fala poo ni fa’amalu i totonu o le falepuipui.

 

Na taua e se ali’i pagota i le Samoa News e fa’apea, e na o le ipu ti lava e tufa atu i le taeao ma le afiafi, ae o le aoauli e na o le 2 sipuni alaisa ma se fasi i’a e fa’a kaleve.

 

Na faua e se loia mai le Ofisa Loia Fautua mo tagata lautele, tulaga faaletonu sa ia molimauina i le tele o taimi na te asia ai pagota o lo o tauave e le latou ofisa, e le gata i le faaletonu o potu o lo o nonofo ma tausi ai i latou nei, ae o o lava fo’i i meaai e le o lava.

 

O le fa’afitauli i le le lava o meaai mo pagota, e le o se fa’afitauli e fou lea i totonu o le toese, e pei ona faamaonia mai e se Leoleo o le falepuipui e le i finagalo e fa’ailoa lona suafa. Na taua e lea Leoleo e fa’apea, i le taimi o le Pule o le Falepuipui lea na fa’atoa alu ese atu i ni nai masina e le i mamao atu, e fa’aalu ai e le Pule lea o le Falepuipui ana tupe e fa’atau ai pusa moa, pusa siusiu pipi ma taga alaisa e fafaga ai pagota, pe a oo i le taimi e tuai atu ai le sapalai o meaai mo le toese.