Tele fa’amanuiaga maua atunu’u mai le Faletupe Fou malo

 Nisi o sui o le Komiti Fa’afoe o le Faletupe Fou a le malo atoa ai ma afioga i Senatoa i le iloiloga sa faia i luma o le Senate i le taeao ananafi.  [ata AF]
ausage@samoanews.com

Na manino i molimau a sui o le Komiti Fa’afoe o le Faletupe a le Teritori o Amerika Samoa atoa ai ma sui o le pulega o le Faletupe, ina ua molimau i luma o le Komiti o le Fa’agaioiina o le malo a le Senate i le taeao ananafi, le tele o auala eseese e mafai ai ona fa’amanuiaina tagatanu’u o le atunu’u i le tautua a le Faletupe fou pe a tatala i le aso Gafua o le vaiaso fou.

 

O lenei iloiloga e pei ona taua e le ta’ita’i komiti, afioga Galea’i M. Tu’ufuli ma ni isi o afioga i ali’i senatoa e fa’apea, o le taumafai ina ia fa’amanino ni isi o tala ua soona fa’asalalau solo i le ea, e fa’atatau i le le saogalemu o le Faletupe fou a le malo lea o le a tatalaina nei, ona e le o puipuia i lalo tulafono tau inisiua a le feterale (FDIC), aemaise ai fo’i le popole o ni isi o le atunu’u, po o ai ituaiga tagata e talia a latou talosaga mo ni nonogatupe i lenei faletupe.

 

E ui e le o i ai se fa’amalumaluga a le FDIC i le faletupe fou a le malo, peita’i na fa’amanino e le afioga a Utu Abe Malae i luma o le senate ananafi e fa’apea, fa’atoa mafai ona maua e le faletupe fou a le malo le fa’amalumaluga a le FDIC, pe afai e tuana’i tausaga e 2 pe 3 fo’i talu ona tatala le faletupe, ae vaavaai mai le FDIC ua ausia uma e le faletupe aiaiga ma tuutuuga uma e tatau ona latou fa’atinoina, ona fa’atoa mafai ai loa lea ona tu’uina mai le fa’amalumaluga a le FDIC mo le faletupe a le malo.

 

Ui o lea, o lo o tele lava isi fa’amanuiaga e agava’a ai le atunu’u pe afai ae tatala le auaunaga a le Faletupe, e pei o le agava’a i nonogatupe eseese, atoa ai ma le mafai lea ona fa’aaoga ‘card’ a le faletupe i atunu’u i fafo e aofia ai le malo tele.

 

Na fesili le afioga i le ali’i senatoa ia Tuaolo M. Fruean i sui o le Komiti Fa’afoe o le Faletupe, e fa’amanino i le maota le mafua’aga na ala ai ona manatu le malo latou te fa’atautaia lenei faletupe, ae o le a fo’i se aoga o le faletupe fou lenei mo le atunu’u.

 

Saunoa Utu e fa’apea, ina ua fa’ailoa e le Faletupe o Hawaii la latou fuafuaga e tula’i ese ai ma Amerika Samoa, atoa ai ma le fiu e tau saili se isi auala e maua ai se isi auaunaga tau faletupe mo le atunu’u, na manatu ai loa le faigamalo a Lolo ma Lemanu e tula’i mai e saili se auala e fesoasoani ai mo Amerika Samoa, lea la e pei ona i ai le Faletupe fou o le Teritori lea ua fa’amoemoe e tatalaina i le vaiaso fou.

 

I tulaga i auaunaga masani fa’a faletupe e tatau ona silafia e le atunu’u, o le tuana’i ai o aso e 30 talu ona tatalaina le tautua a le faletupe lenei, o le a mafai ai loa ona fa’agasolo nonogatupe mo le atunu’u, e aofia ai nonogatupe mo fa’alavelave, lea e amata atu i le $500 e o o atu i le $2,500, fa’apea ai nonogatupe mo tagata ta’ito’atasi, lea e amata atu i le $2,500 e oo atu il e $10,000, fuafua lava i le maualuga o le totogi ma le tupe maua o lo o gafatia e le tagata faigaluega.

 

O le mea moni e pei ona taua e le Komiti Fa’afoe i luma o le senate, e fuafua le talia o le nonogatupe i le tulaga lelei o fa’amaumauga fa’a faletupe a tagata e faigaluega, ae afai e i ai se fa’aletonu i tulaga o tupe maua (credit), o le a taumafai pea le Faletupe e saili se auala e fesoasoani ai i le atunu’u o lo o fia talosaga mo ni nonogatupe.

 

O le agaga atoa o le malo ma le pulega a le faletupe, ia maua uma e tagatanu’u o le atunu’u avanoa e fesoasoani atu ai le faletupe i o latou aiga.

Comment Here