Ads by Google Ads by Google

Teena talosaga a le ali’i pagota mo se avanoa avea ai o ia Faifeau


[ata: archive]
ausage@samoanews.com

Na teena e le Fa’amasinoga Maualuga le talosaga a se ali’i pagota sa tu’uina atu i le aso Faraile na te’a nei, mo se avanoa e tatala ai o ia i tua e alu fa’atino lana filifiliga ua mae’a ona faia ao taofia ai o ia i totonu o le falepuipui, o le avea lea o ia ma Faifeau e tala’iina le finagalo o le Atua, ina ua talia e le fa’amasinoga le fa’afinauga a le loia sa tula’i mo le malo, ina ia fa’asala le ua molia i le fa’asalaga fa’a falepuipui pito maualuga o loo fa’atulaga mai e le tulafono e 5 tausaga.

 

E 5 tausaga lea ua fa’asala ai e le fa’amasinoga maualuga le ali’i o Anetele’a Segi e taofia ai i le toese i Tafuna, ina ua ta’usala o ia i le moliaga mamafa o lona tagofia lea o itutinosa o se teineititi e talavou i lalo o le tulafono, i lalo o se maliliega sa latou sainia ma le malo ma talia e le fa’amasinoga.

 

O le a aofia ai i le fa’asalaga fa’a falepuipui a Segi lea ua tuliina nei masina e 11 lea na taofia ai o ia ao fa’agasolo ai taualumaga o lana mataupu.

 

E lei nofo lelei i le fa’afofoga a afioga i ali’i fa’amasino le auala na fa’aleo ai e Segi lana fa’atoesega, ina ua maua lona avanoa e saunoa ai mo sana fa’amatalaga mulimuli ao le’i tu’uina atu se fa’aiuga a le fa’amasinoga, ona e atagia mai i lana fa’atoesega e le sa’o tu’uaiga ua faia fa’asaga ia te ia e le malo.

 

Na fa’atoese Segi i le tama’ita’i na a’afia, o ona matua ma lona aiga atoa, e tusa ai o tu’uaiga ua faia fa’asaga ia te ia, sa ia fa’atoese fo’i i le aiga o lona to’alua e tusa ai o tu’uaiga ua tu’uaia ai o ia e le malo

 

“E ui i nei tu’uaiga ua faia faasaga ia te a’u aemaise ai le tele o tusitusiga ua salalau i le ea, o loo sisila fofoga o Ieova i le mea moni sa tupu”, o se vaega lea o le fa’amatalaga a le ua molia i luma o le fa’amasinoga.

 

Sa ia taua fo’i e fa’apea, a o taofia ai o ia i totonu o le falepuipui mo le 11 masina, ua ia faia ai se filifiliga mautu mo lona olaga, o le avea lea o ia ma faifeau e tala’iina le finagalo o le Atua i totonu o le atunu’u.

 

“Lau afioga i le ali’i fa’amasino, ou te talosaga atu mo se avanoa se’i o’u fo’i ai i tua e fa’ataunu’u la’u filifilia ua uma ona faia ao taofia ai a’u i le toese, o le avea lea o a’u ma Faifeau mo le galuega a le Ali’i, ma se’i saili se galuega e tausi ai lo’u to’alua ma la’u fanau”.

 

Na talosaga le loia a Segi ia Douglas Fiaui i le fa’amasinoga ina ia fa’asala le ua molia i se fa’asalaga fa’anofovaavaaia, ae ua lava masina e 11 lea ua mae’a ona ia tuliina i le toese e fai ma ana fa’asalaga i lenei mataupu.

 

Na fa’aalia atili e Fiaui lona le fiafia i se vaega o le ripoti a le Ofisa Fa’anofovaavaaia, lea o loo taua ai se talanoaga sa faia i le va o le ali’i ua molia ma le sui o le Ofisa sa saunia le ripoti, ma taua ai se tulaga e fa’apea, sa naunau lava le ua molia e finau lana mataupu i luma o tagata iloilo iuga, peita’i sa fautua malosi lana loia fautua ina ia talia le ofa ua tu’uina atu e le malo.

 

Na taua e Fiaui e fa’apea, e le sa’o le vaega lea o le ripoti a le Ofisa Fa’anofovaavaaia, ona e foliga mai ua ta’uleagaina ai lana galuega lelei o loo faia e puipuia ai aia tatau o i latou o loo tu’uaia i solitulafono eseese.

 

Na fa’ailoa e Fiaui i ali’i fa’amasino e fa’apea, e le mafai ona ia faia se tulaga fa’apea ia i latou o loo tu’uaia i solitulafono eseese, o lona fa’amalosia lea o i latou e tali ioe i moliaga pe afai na te iloa latou te lei fa’atinoina ni solitulafono.

 

Na talosaga Fiaui i le fa’amasino ina ia talanoa i le Ofisa Fa’anofovaavaaia, e le talafeagai lo latou su’esu’eina fua o talanoaga i le va o le ua molia ma lana loia fautua, ae tatau lava ona fa’atino sa’o le galuega e ala i le saunia o ripoti e fuafua i ai fa’asalaga a le fa’amasinoga.

 

I le fa’aiuga o le fa’afinauga a Fiaui, sa ia talosagaina ai le fa’amasinoga ina ia talia le talosaga a Segi mo se avanoa e tatala ai o ia i tua e fa’atino le filifiliga ua ia manatu e lelei mo ia.

 

Ae na taua e le loia a le malo ia Gerald Murphy e fa’apea, talu ai le matuia o le gaioiga sa faia e le ua molia, e manatu ai le malo e alaga tatau ona fa’asala o ia i le fa’asalaga pito maualuga o loo fa’atulaga mai i le tulafono, o le nofosala lea i le toese mo le umi e 5 tausaga.

 

Na taua atili e le malo e fa’apea, o le matuia o le gaioiga sa faia e le ua molia, ina ua mae’a ona fa’atino e le ua molia uiga mataga i le teineititi na a’afia i tua i se togavao, sa ia fa’alogo o loo tau valaau le Tama o le teineititi i le igoa o lona afafine, o lea na ia alu atu ai i luma o le auala ma fa’afetaui le tamaloa ma fai i ai, o lona afafine o loo nofonofo i le fale fa’atali pasi, ma, ina ua aga’i atu le tamaloa i le fale fa’atali pasi, sa ia toe fo’i atu i le vaega o le togavao o loo i ai le teineititi ma la toe feusua’i, o le fa’alua ai lea ona ia faia uiga mataga ia te ia.

 

Saunoa le afioga i le ali’i fa’amasino ia Elvis P. Patea e fa’apea, e atagia mai i le fa’atoesega a le ua molia, e le o salamo o ia mai le mea sese sa ia faia, ma ua manatu ai le fa’amasinoga, e talafeagai le fa’aiuga e 5 tausaga lea ua fa’asala ai o ia i le toese i Tafuna.

 

Ua poloaina fo’i le lesitala o lona igoa i le lisi o i latou ua ta’usala i le faia o uiga mataga i fanau laiti, ma ia faia se suega i lona tino poo ia tauaveina siama o le HIV.