Ads by Google Ads by Google

Teena ripoti na toe fa’afo’i fa’amalosi se fafine ma’itaga Filipino

ausage@samoanews.com

Na teena e le Pulesili o le Ofisa o Femalagaaiga a le malo ripoti e fa’apea na fa’afo’i fa’amalosi e lona Ofisa se fafine Filipino o lo o ma’itaga fa’atasi ai ma lana tama e 5 tausaga i le masina na te’a nei.

 

I se talanoaga ma le Samoa News e uiga i lenei mataupu, na fa’amaonia mai ai e le afioga Peseta Dennis Fuimaono le tulaga sa’o e uiga i lenei mataupu.

 

“E le i tipoti fa’amalosia le tama’ita’i Filipino e pei ona taua i le ripoti, sa malie lava o ia e toe fo’i i Filipaina ina ua ova ona aso i le atunu’u. E le 7 fo’i masina o lona ma’itaga e pei ona taua i le ripoti, e na o le 4 masina o lona ma’itaga”, o le saunoaga lea a Peseta i se talanoaga ma le Samoa News.

 

O le mataupu lenei na tofu atu i le Ofisa o le Loia Sili a le malo, ina ua faila e le Konesula a Filipaina i Honolulu sana talosaga ia Talauega Eleasalo Ale e uiga i lenei mataupu, ma talosagaina ai se avanoa e toe fo’i fa’afo’i mai ai o ia e fanau i Amerika Samoa.

 

E le gata sa tuuina atu le tusi a le Konesina o Filipaina i le Lolia Sili, ae sa tuuina atu ai fo’i ma le tusi a Ipu Avegalio Lefiti, o ia lea o lo o Faauluulu i ai le Ofisa e Fesoasoani mo i latou ua Sauaina ma mafatia.

 

E pei ona taua i tusi sa tuuina atu i le Loia Sili, o le tama’ita’i o Merlin Gerin Lloren, lea e 7 ma le 1/2 masina lona ma’itaga, atoa ai ma lana tama e 5 tausaga le matua, na tipoti ese atu ma Amerika Samoa i le aso 1 Mati, ma le fa’amoemoe e toe fo’i atu i lo la atunu’u o Filipaina, ona ua ova aso e nonofo ai i Amerika Samoa.

 

E pei ona taua i le ripoti, sa fa’amalosi ona tipoti ese atu i laua ma Amerika Samoa, e ui o lo o silafia lelei e le aufaigaluega a le Ofisa o Femalagaaiga, e le mafai ona malaga o ia ona o le tulaga fa’aeteete gata o lona ma’itaga.

 

Na taua e Peseta i le Samoa News e fa’apea, o Lloren ma lana tama na malaga mai i le pemita e 30 aso ma nonofo faasolitulafono ai lava i le atunu’u.

 

O le kamupani a le H & H Samsung Company na aumaia Lloren ma le fa’amoemoe na te fa’atinoina galuega fa’a su’etusi mo le kamupnai. E le i umi se taimi na galue ai o ia i le kamupani ae molimauina e le kamupani tulaga fa’aletonu, e le iloa e ia fa’atino galuega sa ia folafola e mafai ona ia fa’ataunu’uina. O le mafu’aaga lena e le i toe mana’omia ai loa e le kamupani o ia e galue mo i latou.

 

Na taua e Peseta i le Samoa News e fa’apea, o le mataupu lenei na tofu atu i le Ofisa ina ua oo atu le Pule o le kamupani a le H & H ma talosagaina sa latou fesoasoani i se auala e saili ai Lloren ina ia toe fa’afo’i i Filipaina, ona ua ia fa’asalalau solo tala le sa’o e fa’atatau ia te ia, e aofia ai tala fai mai o le pule o le H & H na ma’itaga ai.

 

Na taua e Peseta i le Samoa News e fa’apea, o Lloren ma ma’itaga i le isi fo’i ali’i Filipino e fai lana pisinisi fale falaoa i Nuuuli.

 

Na taua atili fo’i e le Pule o le Kamupani, o Lloren ua leva ona mae’a le pemita na ulufale mai ai, ae o lo o fa’aauau pea ona nofonofo solo i ana uo ma tagata Filipino i totonu o le atunu’u.

 

O ni isi o tala na taua e le Pule o le H & H i le Pule o le Ofisa o Femalagaaiga ua alu Lloren ma fa’asalalau solo, e aofia ai tu’uaiga fai mai o le Pule o le Kamupani lea na ma’itaga ai.

 

O le maua ai e le Ofisa o Femalagaaiga o fa’amatalaga e uiga i lenei mataupu, na amata ai loa ona latou sailia Lloren ona o lea ua faamaonia ua ova ona aso i le atunu’u. Na teena e Peseta le ripoti fai mai o le to’alua o se ali’i faigaluega i le Ofisa o Femalagaaiga na sainia le pemita e 30 aso na ulufale mai ai Lloren ma lana tama i Amerika Samoa.

 

O lana molimau, o le kamupani a le H & H na sainia le pemita na ulufale mai ai le tama’ita’i lenei i le atunu’u.

 

E lata i le 3 masina o sailia e le aufaigaluega a le Ofisa o Femalagaaiga ia Lloren ae maua loa, ma auina atu loa i le latou Ofisa i Utulei mo le fa’atalatalanoaina o le mataupu. Saunoa Peseta i le Samoa News e fa’apea, i lea talanoaga, lea fo’i sa auai le Pule o le Kamupani a le H & H faapea ai ma ni isi o tagata faigaluega Filipino a le kamupani, na fa’aalia manino ai e Lloren lona malie e toe fo’i i Filipaina, ina ua mae’a ona fautuaina o ia i a’afiaga e oo i ai pe afai ae musu e toe fo’i i lona atunu’u, ona o lea ua ova ona aso.

 

“Sa matou suesueina fo’i le tulaga o lona ma’itaga ma faamaonia ai, fa’atoa 4 masina le mamao o lona ma’itaga, ona faia ai loa lea o le faaiuga e toe fo’i atu i Apia ma fa’aauau atu ai lava lana malaga i Filipaina, au e le i atoa le 5 masina o le ma’itaga”, o le saunoaga lea a Peseta i le Samoa News.

 

O le mae’a ai ona faia o feuiaiga uma lava e tatau ona faia, na momoli ai loa e sui o le aufaigaluega a le Ofisa o Femalagaaiga ia Lloren ma lana tama i le malae va’alele i Tafuna, ma tuuvaa ese atu ai loa i laua i Samoa.

 

Saunoa Peseta e fa’apea, sa i ai tagata ua uma ona fa’atulaga e le latou ofisa e fesoasoani i le pikiina o Lloren ma lana tama i le malae va’alele i Fagali’i pe a taunu’u, ma momoli ai loa laua i le malae va’alele i Faleolo e pu’e ai le la va’alele mo Fiti, ma aga’i atu ai i Hono Kong, seia oo atu ai lava i Filipaina.

 

Ae o le fa’afitauli na tula’i mai, e oo atu tagata na faatulaga e piki ia Lloren ma lana tama, ae tulioso loa i totonu o le ta’avale a isi tagata Filipino, o tagata o le aiga o le alii fai pisinisi fale falaoa lea na ma’itaga ai o ia.

 

“O le mafua’aga na le mafai ai ona malaga Lloren ma lana tama i Filipaina, e le faapea na teena e le va’alele, ae e le i manana’o lava i laua e toe fo’i i lo la atunu’u”, o le saunoaga lea a Peseta.

 

O lo o i ai pea lenei tina ma lana tama i Samoa, ma ua talosagaina e le Komesina a Filipaina le toe auina mai o ia i le atunu’u e ola ai ma lana pepe.