Teena Faipule suiga tulafono e ui ua taoto fautuaga a le Loia Sili

Le afioga i le sui fofoga fetalai ia Fetu Fetui Jr o loo soisoi ao fa’atalofa le afioga i le ali’i faipule ia Fatulegae’e Palepoi Mauga ma le loia sili a le malo ia Talauega Eleasalo Ale.  [ata AF]
FETU: E fete’ena’i le tulafono toe tutupu ai misa i le va o tagata
ausage@samoanews.com

E ui o lea ua taoto le fautuaga a le Loia Sili o le malo i luma o le maota o sui, e fa’amanino auiliili ai le agaga atoa na mafua ai ona talosagaina e le malo se suiga e toe fa’amalosia ai le tulafono, lea e fa’asala ai ave ta’avale e paka a latou ta’avale i paka e fa’apitoa mo na o i latou e i ai manaoga fa’apitoa o le tino ma le mafaufau, ina ia malosi ma mautu atili le tulafono, ae ua pasia lava e le Komiti o le Puipuiga o le Saogalemu Lautele a le maota ina ia teena suiga a le malo.

 

O suiga e pei ona fuafuaina e le faigamalo a Lolo ma Lemanu e ala i le tulafono lea ua taoto nei i luma o le Fono Faitulafono, e le gata e tu’u atu ai le malosi i le Ofisa e Puipuia aia tatau o tagata e i ai manaoga fa’apitoa o le tino ma le mafaufau (OPAD), latou te fa’asalaina ai ave ta’avale e paka a latou ta’avale i avanoa ua fa’apitoa mo i latou nei, ma fesoasoani ai i le galuega o lo o fa’atino e Leoleo o le malo, ae o lo o fuafuaina ai fo’i fa’asalaga mo i latou e molia ma ta’usala e le fa’amasinoga.

 

Ua mae’a nei ona pasia e le Komiti suiga ina ia aveese le malosi lea ua fuafua le malo e tu’u atu i le ofisa o le OPAD e fa’asala ave ta’avale e maua o lo o latou soli se tulafono, ae taoto pea le galuega a Leooleo e fa’atino.

 

O le vaiaso fou lea ua fa’amoemoe le Komiti e ripoti ai i luma o le maota le fa’aiuga o le latou galuega fa’atasi ma suiga, i le taimi e faitau fa’alua ai le tulafono lea ua i luma o le maota.

 

E to’a 8 faipule sa lagolagoina suiga a le komiti, ae to’a 7 faipule sa latou finau ina ia taoto pea le tulafono i le tino na tu’uina mai ai e le faigamalo, ona o lo o i ai mafua’aga tatau ma talafeagai e tatau ai ona tu’u atu le malosi i le Ofisa o le OPAD e fesoasoani ai i le fa’atinoina o le galuega.

 

Saunoa le sui fofoga fetalai ia Fetu Fetui Jr e fa’apea, afai ae tu’u atu le malosi i sui o le Ofisa o le OPAD latou te fa’asalaina ai ave ta’avale e maua o lo o soli le tulafono, e le gata o le a fete’ena’i ma le malosi lea ua taoto atu i Leoleo o le malo latou te fa’asalaina ai tagata i luga o le alatele, ae ono tutupu mai ai fo’i ni fa’afitauli i le va o tagata lautele ma sui o le Ofisa o le OPAD o le a tu’u atu i ai le malosi e fa’asala ave ta’avale.

 

“O lo’u popolega i le suiga o le tulafono e pei ona talosagaina e le malo, e ono tutupu mai ai misa ma vevesi i le va o tagata lautele ma sui o le Ofisa o le OPAD, ma afai e tutupu ni vevesi i le va o tagata lautele ma sui o le Ofisa, fa’amata e mafai e sui o lou Ofisa ona foia fa’afitauli ia”, o le fesili tu’u sa’o lea a Fetu i le Fa’atonusili o le Ofisa o le OPAD, susuga i le ali’i foma’i ia Dr. Peter Tinitali, ae na tali le ali’i foma’i, “ailoga e tutupu ni fa’afitauli”.

 

Na fa’auilavea le loia sili o le malo ia Talauega Eleasalo Ale ma ia teena le finagalo o Fetu i le ono i ai lea o ni fa’afitauli e tutupu mai i le va o tagata lautele o le atunu’u ma sui o le ofisa o le OPAD.

 

“E leai ni fa’afitauli e tutupu mai i suiga o le tulafono e pei ona talosagaina e le malo, o lo o manino tiute ma galuega fa’atino a Leoleo i le tu’uina atu lea o ticket i soo se solitulafono i luga o le alatele, ae o le agaga o le tulafono, ia mafai ona fesoasoani le OPAD i le fa’amalosiina o le tulafono ua tele tausaga e le o mafai ona fa’amalosia”, o le saunoaga lea a Talauega.

 

Sa ia taua fo’i e fa’apea, atonu e na o se taimi puupuu lava lea o lo o talosaga mai ai le malo ina ia fesoasoani le OPAD i Leoleo i le fa’atinoina o le galuega lenei, ae afai loa e mafai ona toe fa’aopoopo isi Leoleo fou ma ua toe to’atele le aofa’i o le aufaigaluega e puipuia le saogalemu o le atunu’u, ona toe talosagaina fo’i lea o se isi suiga i le tulafono, ina ia toe aveese mai le malosi mai le OPAD ae toe fa’afo’i atu i le Ofisa o Leoleo latou te fa’atinoina le galuega.

 

Na fa’amanino atili e le loia sili e fa’apea, e le o se aia tele lea o lo o manatu le malo e tu’u atu i le OPAD latou te fa’asalaina ai “na o ave ta’avale” e maua o lo o paka a latou ta’avale i paka e fa’apitoa mo tagata e i ai manaoga faapitoa o le tino ma le mafaufau.

 

“E le tau alu le sui o le OPAD e saili le ave ta’avale e tu’u i ai le ticket, ae o le taimi lava e fa’amaonia ai ua soli le tulafono, o le taimi fo’i lea e tusi ai le ticket ma fa’apipi’i i le tino o le ta’avale, ona alu lea o le ave ta’avale e tali i luma o le fa’amasinoga e fa’atatau i lana ticket, e leai fo’i la se avanoa e feiloa’i ai le sui o le Ofisa o le OPAD ma le ave ta’avale e pei ona atugalu i ai ni isi o faipule, e le faia fo’i e le sui o le OPAD le fa’aiuga o le ticket, o le matafaioi lena a le fa’amasinoga”, o le saunoaga lea a Talauega e tau fa’amalamalama ai le uiga moni o le tulafono.

 

Saunoa le afioga i le ali’i faipule ia Vesi Talalelei Fautanu Jr e fa’apea, na pau lava le matafaioi a le Ofisa o le OPAD, o le puipuia lea o aia tatau o tagata e i ai manaoga faapitoa o le tino ma le mafaufau.

 

O le popolega o le afioga ia Vesi i le suiga o le tulafono lenei, ina ne’i avea le fa’aopoopo atu o lenei matafaioi i le Ofisa o le OPAD ma auala latou te le toe maua ai ni isi o alaga tupe fesoasoani mai le Feterale, lea o lo o fa’atupe ai ni isi o galuega fa’atino a le Ofisa.

 

I le talanoaina ai o le taua o le mataupu e fa’atatau i le ave o le fa’amuamua ia i latou o lo o i ai manaoga fa’apitoa o le tino ma le mafaufau, na taua ai e le afioga i le ali’i faipule ia Faimealelei Anthony Fu’e Allen le tele o faleoloa ma ni isi o nofoaga i le atunu’u latou te le o usitaia le tulafono, i le tatau lea ona i ai ni paka mo i latou o lo o i ai manaoga o le tino ma le mafaufau i luma o faleoloa poo ofisa fo’i ma nofoaga eseese.

 

Na fautuaina e Faimealelei le susuga Dr. Tinitali ina ia silasila toto’a lona Ofisa o le vaega taua lea, ina ia mautinoa e i ai paka fa’apitoa nei i luma o soo se faleoloa poo ofisa i soo se vaega o le atunu’u, mo i latou o lo o i ai manaoga faapitoa o le tino ma le mafaufau.

 

Na taua e le Komesina o Leoleo ia Save Liuato Tuitele le taua o le tulafono, ae tatau ona matua fa’amanino po o ai sui o le Ofisa o le OPAD e fa’amalosia le tulafono, ina ia mautinoa e faia ni a’oa’oga mo i latou ia.

 

Na taua atili e Save e fa’apea, o ni isi o setete i Amerika e pei o Hawaii, e le fa’amalosia e Leoleo le tulafono lea, ae i ai lava tagata fa’apitoa ua mae’a ona filifilia ma a’oa’oina latou te fa’amalosia le tulafono ma ticket ave ta’avale e maua o lo o latou soli le tulafono.

Comment Here