A o sauni ai le itu a le malo mo le finauina o le latou tagi i le aso a taeao, fa’asaga i ali’i se to’afa mai le kamupani a le Aute, lea o lo o tu’uaia i le tafanaina o le Ofisa o Leoleo i Tafuna i le 2 tausaga talu ai, o le vaiaso na te’a nei na teena ai e le Fa’amasinoga Maualuga ni isi o talosaga na fa’aulu e le itu tete’e fa’asaga i lenei mataupu.

O ni isi o ia talosaga e aofia ai le fa’afinauga ina ia fa’aleaogaina loa moliaga o lo o tu’uaia ai i latou nei e to’afa, e mafua mai i le tulaga lea ua tape ese ai e le malo ni isi o vaega o fa’amatalaga ua fa’amoemoe e tu’uina atu i luma o le vaega iloilo iuga, fa’apea ai ma le talosaga a le tama’ita’i loia fautua lagolago ia Karen Shelly ina ia fa’aui i tua lona igoa mai le avea ma loia fautua a le ali’i o Sinapati Tu’ufa’anatu.

O le itula e 9:00 i le taeao, Tesema 6 ua fa’amoemoe e amata sailia ai se vaega o ali’i ma tama’ita’i fa’amasino latou te iloiloina se fa’aiuga o le mataupu fa’asaga i ali’i e to’afa o lo o tu’uaia e le malo i lenei mataupu.

O i latou e to’afa: Manu Lefatia, Tuliese Taliu, Sinapati Tu’ufa’anatu ma Mosegi Solia Jr.

I le mae’a ai ona molimau o le ali’i Leoleo ia Det. Savelio Vaofanua i luma o le fa’amasinoga maualuga i le vaiaso na te’a nei, e fa’atatau i le fa’atonuina lea o ia fa’atasi ai ma isi Leoleo Su’esu’e e le Komesina ina ia tape ese igoa ma saini a molimau i le pito i lalo o a latou fa’amatalaga tusitusia, na finau ai loa loia a le itu tete’e i le fa’amasinoga e solofua moliaga fa’asaga i ali’i e to’afa, ona o lea ua manino i le molimau a le malo, o i latou lava lea ua mafua ai ona tape ma aveese isi vaega o fa’amatalaga mai totonu o le ripoti a Leoleo.

Na finau atili fo’i le itu tete’e e fa’apea, afai o lea ua toe fa’aletonu lava i le malo tulaga o a latou fa’amatalaga ma tu’uaiga fa’asaga ia i latou e to’afa o lo o tu’uaia, e leai fo’i la se aoga e tau tu’u atu ai fua le mataupu i luma o le vaega iloilo iuga e iloilomai ai se fa’aiuga.

Ae i le fa’afinauga a le afioga i le ali’i Fa’amasino ia Elvis. P. Patea fa’atasi ai ma ana fa’amasino lagolago, sa ia taua ai le taoto atu pea o le mataupu lea e iloilo e le vaega iloilo iuga.

Saunoa atili Patea e fa’apea, e i ai mafua’aga na ala ai ona faia e le malo le fa’a’iuga e tape ese ai fa’amatalaga sa i luga o le ripoti a Leoleo, ae afai e taumafai itu e lua ma le fa’amasinoga e saili le mafua’aga na faia ai, o le vaega iloilo iuga latou te tu’uina maia se fa’aiuga o lea fesili.

I le talosaga a Shelly e aveese mai ai o ia mai le toe avea ma loia fautua a Tu’ufa’anatu, na fa’amanino ai e Patea i le tama’ita’i loia fautua lagolago mafua’aga ua teena ai e le fa’amasinoga lana talosaga.

Na taua e Shelly i le fa’amasinoga le mafua’aga ua ala ai ona ia talosaga e aveese mai lona igoa mai le toe avea ma loia fautua a Tu’ufa’anatu, ona o le aso 12 Tesema lea ua fa’amoemoe e muta aloaia ai lana konekarate ma le Ofisa o le Loia Fautua mo Tagata Lautele, ma toe fo’i atu ai loa i lona aiga i le Iunaite Setete.

Talu ai e ono silia ma le 2 vaiaso le umi e fa’agasolo ai le fa’amasinoga iloilo fa’asaga i ali’i e to’afa o lo o tu’uaia i lenei mataupu, na talosaga ai loa Shelly mo se avanoa e tofia ai se isi loia e fautuaina Tu’ufa’anatu, ona e o o atu i le taimi lea ua ia tuua le atunu’u.

Ae na saunoa Patea e fa’apea, i lalo o tulafono o lo o lima ta’ita’iina ai galuega fa’atino a le Fa’amasinoga, o lo o manino mai ai le tulaga lea, e tasi lava le mafua’aga e le toe avea ai se loia ma loia fautua a se tagata ua molia, pe afai ua le toe mana’o i ai le tagata o lo o molia i le loia.

Na fa’ailoa atili fo’i e Patea ia Shelly e fa’apea, ua leva na tatau ona tu’uina atu lana talosaga i luma o le fa’amasinoga, peita’i o lea ua oo i le po e sosoo ma le aso o le fa’amasinoga, a o lea fa’atoa faila atu lana talosaga, o le mafua’aga fo’i lea ua teena ai e le fa’amasinoga.