Ads by Google Ads by Google

Tausinio aufusu a le atunu’u i le ta’amilosaga a le Tafatolu i Samoa


Le aufusu a le atunu’u ma latou faiaoga lea o lo o i ai nei i Samoa i le ta’amilosaga o le Tafa-Tolu e aofia ai Niu Sila, Samoa ma Amerika Samoa. [ata AF]
ausage@samoanews.com

O lo o i ai nei i Samoa se aufusu e to’afa a le atunu’u, lea o lo o filifilia mai i kalapu eseese a le Asosi o Fusuaga Amata a Amerika Samoa (American Samoa Amateur Boxing Association-ASABA), ma le fa’amoemoe e tausinio i le ta’amilosaga o le Tafatolu lea o loo talimalo ai Samoa i le vaiaso nei.

 

O le ta’amilosaga a le Tafatolu e aofia ai Samoa, Amerika Samoa ma Niu Sila. O se ta’amilosaga ua tu’u fa’atasia e Asosi o Fusuaga a le Pasefika, e le gata e iloilo ai tulaga lelei ma le malolosi o ali’i ma tama’ita’i fusu, ae o se avanoa fo’i e tapena ai aufusu a atunuu o le Pasefika i Ta’aloga Laiti a le Pasefika (Pacific Mini Games), lea ua fa’amoemoe e talimalo ai le atumotu o Vanuatu i le masina fou o Tesema.

 

O le aufusu e to’afa a le atunu’u e aofia ai Alesana Alesana, lea o lo o fusu i le aupaga o le 69kgs, o le ali’i o Orlando Taala, lea o loo fusu i le aupaga o le 75kgs, o le ali’i o Alofa Mataafa, lea o loo fusu i le aupaga o le 81kgs, ma le tama’ita’i e to’atasi o Elizabeth Tuavale, lea o loo fusu i le aupaga o le super heavyweight a tama’ita’i.

 

O lo o malaga fa’atasi ma le aufusu le latou faiaoga, le afioga a Sala Etuale Sanele, o le sui peresetene o le ASABA ia Okesene Malala, fa’apea ai ma le susuga ia Leilua Aoao, o ia o se ali’i Laufli mo le ta’amilosaga.

 

Na taua e Sala i se fa’atalatalanoaga ma le Samoa News i le vaiaso na te’a nei, le atoatoa o tapenaga a le aufusu a le atunu’u mo lenei fa’amoemoe. Sa ia taua e fa’apea, e to’alua sui fou o lo o malaga i le au, o i laua ia o Alesana ma Taala, to’alua fo’i sui tuai, o i laua ia Mataafa ma le tama’ita’i o Tuavale.

 

O le tama’ita’i fusu o Tuavale, sa avea ma sui o le aufusu a Amerika Samoa sa auina atu i le ta’amilosaga o Fusuaga Faavaomalo o le Teuila sa faia i Samoa i le masina o Setema o le tausaga nei, lea na latou sosola mai ai ma le Ipu o le Siaumupini, ina ua latou maua manumalo e 5 mai le aofa’i o fusuaga sa faia e 9. Sa manumalo ai fo’i le tama’ita’i o Tuavale i le ta’amilosaga lea, e pei ona fa’amaonia mai e Sala.

 

“E maualuga le talitonuga o le a fa’amanuiaina la tatou aufusu i ni pine mai Samoa. E le gata i le atoatoa o le tapenaga a le aufusu, ae o sui tuai e to’alua ma sui fou e to’alua o loo malaga, o ni isi ua lava lo latou tomai i le ta’aloga, ua lava fo’i le malosi e fa’atino ai le ta’aloga,” o le saunoaga lea a Sala.

 

“O se avanoa lelei fo’i lenei e mafai ai ona tapenapena sa tatou aufusu mo ta’aloga a le Pasefika i Vanuatu i le masina fou. E le gata o se avanoa e feiloa’i ma taaalo ai ma aufusu mai Samoa ma Niu Sila, o ni isi o atunuu ua iloa i le ta’aloga o le fusuaga i le Pasefika, ae o se avanoa lelei fo’i e fa’amasani ai a tatou aufusu i le tulaga maualuga ua i ai le ta’aloga i le lalolagi.”

 

Na taua e Mataafa i le Samoa News le atoatoa o lana tapenaga, ma ua ia sauni fo’i e finau mo se pine mo Amerika Samoa.

 

I tapenaga a le tama’ita’i o Tuavale, sa ia taua ai fo’i lona sauni e tuuina atu lona malosi atoa e finau ai ina ia toe manumalo fo’i i lana fusuaga.

 

O le faaiuga o le vaiaso nei lea ua fa’amoemoe e toe taliu mai ai le aufusu i le atunu’u. Talosia ia manuia le fa’amoemoe o alo ma fanau a Amerika Samoa.