Taunu’u isi tofiga fou a le Kovana i le Fono Faitulafono


[ata: archive]
ausage@samoanews.com

O le vaiaso nei lea ua taunu’u ai fo’i i luma o le Fono Faitulafono isi tofiga a le afioga i le ali’i kovana ia Lolo Matalasi Moliga, mo i latou ua ia filifilia e avea ma Fa’atonusili le tumau o Matagaluega ma Ofisa a le malo, e fa’atalitali ai le taimi e fa’amaonia ai i latou e maota e lua.

 

O tofiga e pei ona tu’uina atu e le ali’i kovana i luma o le Fono Faitulafono, o lo o aofia ai i latou sa avea ma Fa’atonusili o Matagaluega ma Ofisa a le malo i le 4 tausaga ua mavae, lea fo’i ua ia tofia e toe avea ma fa’auluuluga o matagaluega ia ma ofisa a le malo, aemaise ai i latou o lea fa’atoa tofia e avea ma ta’ita’i o ni isi o Ofisa o le malo.

 

O tofiga fou a le ali’i kovana ua tauaao atu i luma o le Fono, e aofia ai Evelyn Lili’o lea ua ia tofia e avea ma Fa’atonusili le tumau o le Ofisa o Tagata Matutua (TAOA), e sui tulaga i le tofa a Ale Tifimalae Ale sa ia tauaveina lenei tofiga i le 4 tausaga ua mavae.

 

O le tofa a Va’amua H. Sesepasara lea ua tofia e avea ma Fa’atonusili le tumau o le Matagaluega o le Puipuiga o le Vaomatua ma le Gataivale, e sui tulaga i le tama’ita’i foma’i ia Dr. Ruth Matagi-Tofiga lea ua tofia e avea ma Fa’atonusili le tumau o le Matagaluega o Aoga a le malo.

 

O le tofa a Fu’ega Lua Moliga, o le uso lea o le afioga i le ali’i Kovana, o lea ua tofia e avea ma Fa’atonusili o le Ofisa o Tautua Eseese a le malo, e sui tulaga ai i le tofa Malemo Tausaga sa ia tauaveina lea tulaga, ao lea ua filifilia nei e avea ma Sui Failautusi o le Ofisa o Mataupu Tau Samoa.

 

O le faletua ia Eseneiaso Liu lea ua tofia e avea ma Faatonusili le tumau o le Matagaluega o Tagata Faigaluega a le malo, e sui tulaga i le tofa Le’i S. Thompson sa ia tauaveina lea tofiga, lea ua filifilia e avea ma Komesina le tumau o le Matagaluega o le Puipuiga o le Saogalemu Lautele.

 

O le afioga a Samana Semo Ve’ave’a lea ua tofia e avea ma Faatonusili le tumau o le Matagaluega o le Puipuiga o le Saogalemu Lotoifale, e sui tulaga ai i le afioga a Utuali’i Savusa sa ia nofoia le nofoa mo le 4 tausaga ua mavae.

 

Ma le afioga a Tuimavave Tauapa’i Laupola lea ua filifilia nei e avea ma Fa’atonusili le tumau o le Ofisa o Fa’amatalaga a le malo poo le KVZK-TV, e sui tulaga i le tofa a Fagafaga D. Langkilde lea sa ia tauaveina lenei tulaga i le 4 tausaga talu ai, ao lea ua filifilia e le Kovana e avea ma sui sooupu ma le au fa’asalalau a le atunu’u.

 

Ae i tofiga tuai a le ali’i kovana, ua toe tofia ai Dr. Oreta Mapu Crichton e avea ma Faatonusili le tumau o le Ofisa e Pulea Fa’atauga o oloa a le malo, o le susuga ia Maeata’anoa P. Gaoteote lea ua toe filifilia e avea ma Faatonusili le tumau o Paka ma Malaetaalo, o le ali’i foma’i ia Dr. Peter Tinitali lea ua toe filifilia e avea ma Faatonusili le tumau o le Ofisa e Puipuia aia tatau o i latou e i ai manaoga fa’apitoa o le tino ma le mafaufau, o le susuga ia Aliitama Sotoa lea ua toe filifilia e avea ma Faatonusili le tumau o le Ofisa o le Enetia a le malo, ma le tofa a Motusa Tuileama Nua lea ua toe filifilia e avea ma Fa’atonusili le tumau o le Matagaluega o le Soifua Maloloina a le malo.

 

O lo o fa’aauau ona tauaao e le Fono Faitulafono isi fesootaiga mo tofiga a le kovana ua mae’a ona faia mo i latou e avea ma ta’ita’i i ni isi o Ofisa a le malo.

Comment Here