Ads by Google Ads by Google

Taua’ao agiagia a le malo - aloa’ia tautua Taeaoafua Dr. Meki Solomona


Le taimi na taua'ao ai le Agiagia a le Malo o Amerika Samoa i le Tina loto fa'avauvau Vaofu'amalo Soliai Solomona, e taualoa ai le tautua a Taeaoafua Dr Meki Solomona i lona malo. [ata: Leua Aiono Frost]

O toe sauniga o le tofa Taeaoafua Dr Meki Solomona i lana ekalesia i le Mauga o Sione i Leone, sa tomuli lava i molimau a le aiga, le tama fa'aleagaga ma ona uso sa latou tautua i vaega eseese o le Ekalesia ae maise ai le molimau a le tausi Vaofu'aomalo Soliai Solomona.

 

Peita'i i ona sauniga uma lava, sa tautuaina lona Sa e le vasega o Malu o le Malo ua tofia fa'apitoa a le Matagaluega o le Puipuiga o le Saogalemu Lautele.

 

I le molimau a le Tina sa la'ua mafuta i le fatuaiga, "E tele rosa, ae tasi sa ia filifilia ai le vao filifili o i latou uma, na fa'afetai aua o a'u sa ia filifilia mai le tasi ae afe sa i lona ala!"

 

"E fa'amaoni lona alofa, e pele ia te ia lo'u aiga na ia tauto ai ma lona aiga, o se auro sa ia fa'apelepele i lona tuputupu a'e se'ia o'o i le aso e moe ai. Sa sili atu ona pele ia te ia lana Ekalesia ma le Mauga o Siona i lana auaunaga sa ia galue ai ma tautua lona Atua soifua. O Ia lava lea sa mafua ai ona soifua a'e i Port Moresby, Papua Niu Kini, a'o fa'anofonu'u fa'amisionare ai nai ona matua ma tuafafine: Rev Siulagi & Fuarosa To'alepai Solomona."

 

"O se tama e agaga i lona afafine, o lona toe malosi na fa'afo'isia mai ina ua o'o mai le meaalofa sili mo i ma'ua i la le tino, Tavita Meki ma lona uso la'ititi. E osiosi e ia lona aiga ma o'u aiga i so'o se mea. E le atoa fo'i matou fa'atasiga pe afai e misia ai lona leo. E le mafai ona malaga loa, ae le afea nai o ma'ua aiga i Hawaii po'o Kalefonia. O o'u aiga ma ona aiga e tutusa pau i lana tausiga ma asiasiga. E le misia lana fa'amalosi'au i fanau a lona aiga ma lo'u aiga i a'oa'oga. E na te siakia so'o se tasi i se mea o mana'omia. E talimana'o i nai ona tuafafine a'o ia te ia le tausiga e o'o mai ina faia o latou aiga, e le mafai ona tu'ua lana matata fa'atama matua ia i latou uma. Ua alu lona tama, ae tu'u i ai lena faiva, o se faiva na te faia ma le fiafia ma le agaga fa'afetai."

 

"E le fesiligia lana fa'ai'uga i lo'u loto, o se fa'ai'uga e faia i le fa'avae o le alofa. E faigata ona ia tu'u ese lona talitonuga i lona Atua, ma lana auaunaga i Siona le Mauga Pa'ia, o lona lea ala e tapena ai lona sao mo lona Atua. E ui ina ia ou fa'auluulumatau i lou naunau e avatu i le matou ekalesia, ae le'i maluelue lona tumau ai i le Ekalesia na ia soifua a'e ai. Ua i'u nei lana folauga, ua faigata ona ou fa'agalo le alofa sa ia te a'u, ae maise i le li'o o i ma'ua ma le fanau, fa'afetai fo'i i le Atua, ua alu ese atu o ia, ae ua ou maua fo'i se atali'i ua tula'i mai e alofa ia i matou i le matou aiga, fa'afetai son Vincent."

 

"O ana upu o le a nonofo pea ma i matou, e ui fo'i ina matuitui le oti, ae o tua atu o lo'o i ai lava le alofa o le Atua e tausia fa'atasi uma ai i tatou, o pelega a le ali'i foma'i  Meki Tavita Solomona, le tama o lenei aiga!"

 

E le o fesiligia le tele o le auaunaga a Meki i lana ekalesia, e afua mai i le aufaipese, autalavou a'o talavou, se'ia o'o mai ina avea ma failautusi o le Ekalesia, ma le sui usufono i nisi o fonotaga a le EFKAS Aoao, ma se totino fo'i o le Komiti o Atina'e i Siona le Mauga Pa'ia. O ia tautua sa molimau ai uso sa latou galulue Fiu Johnny Saelua ma le susuga le Ta'ita'ipese o lo'o tula'i nei i lea tofi atoa ma le fa'afeagaiga Rev. Eteuati Toma.

 

I le toe sauniga i lona oliolisaga tumau, sa fa'ato'a faia ai loa toe sauniga o le Agiagia o Amerika Samoa ma sa fa'apapa ai le uafana, ma iliina le pu o le fa'anoanoa o le amia o se tasi o le nofoa'iga a le Kapeneta a le Faigamalo a Amerika Samoa a'o tautua pea.

 

Ina ua mae'a gaugauina le agiagia sa taua'aoina e le susuga le Malu o le Malo Siaosi Aiono i lana afioga le Lutena Kovana Lemanu Peleti Sialega Mauga na te fa'ao'o i le faletua ma lona alo e to'atasi Katerina Keli'iaione Solomona Toeava. Na talia e le tina ma saunoa faamaise ai lana susuga le Sui Kovana, "Tau ina ia avea lenei fa'ailo, o se matau aloa'ia o le tautua matavela a Taeaoafua Fofogaoaiga Dr Meki Solomona i lona malo ma ona tagata lautele. Ia fa'atasi le Atua ma fa'amafanafana ia te oe ma le fanau ona o le to'esea o le tama o le aiga. O le to'esea fo'i lea o se tasi o uso ia i matou uma i le tatou Malo."

 

Ona fa'amae'a ai lea o sauniga o le tama a le malo i lona oliolisaga tumau i lona laoa i le mauga o Tafeta, Amerika Samoa.

 

[O tala uma o Taeaoafua Dr Meki Tavita Solomona, ua tusia ma fa'amaumauina i le gagana e pele ia te ia, ina ia le solo le falute pe mou malie atu ia te'i tatou uma le tofi ua i o tatou lima, lau Gagana Samoa, o se tasi o auau o lana molimau totino a le faletua ua lomia - L.Aiono Frost]