Ads by Google Ads by Google

Tau saili i latou na tafanaina ta’avale a Leoleo vaiaso ua mavae


Se vaaiga atu lena i le ta’avale leoleo lea na a’afia i le fa’alavelave i le vaiaso na te’a nei. [ata AF]
ausage@samoanews.com

O lo o fa’agasolo i le taimi nei suesuega a le Matagaluega o Leoleo a le malo, i le fa’alavelave lea na tula’i mai i le po o le aso Tofi o le vaiaso na te’a nei, lea na fa’aleagaina ai se tasi o ta’avale a Leoleo ina ua tafana e se tagata poo ni tagata fo’i i tua o le nofoaga o le Ofisa o Fesootaiga a le malo (ASTCA) i Tafuna.

 

I se fa’atalatalanoaga ma le afioga i le Komesina o Leoleo i le vaiaso na te’a nei, na fa’amaonia mai ai e le tofa Le’i Sonny Thompson lea tulaga i le Samoa News.

 

O le fa’alavelave e pei ona saunoa le Komesina o Leoleo, na tula’i mai i le taimi na aga’i atu ai se ta’avale a Leoleo e tali i se valaau mai le Leoleo po a le ASTCA, e uiga i ni cherry bomb na tauai atu e ni tagata i totonu o le lotoa a le ASTCA.

 

Na taunu’u Leoleo ma taamilo i le lotoa mo sina taimi, ona fa’aauau atu ai lava lea o le siaki masani a Leoleo i le itu o lo o i ai le malae Baseball i tua atu o le o le nofoaga autu a le ASTCA.

 

A o fa’atino le siaki masani a Leoleo, sa moimauina le faitoto’a o le pa o loo matala, ona manatu ai loa lea o Leoleo ina ia siaki totonu o le lotoa pe aisea ua matala ai le pa o le malae Baseball. Na oso i fafo le isi Leoleo ma savali atu e siaki le pa ae ave atu e le isi Leoleo le ta’avale.

 

I le taimi na tulioso uma ai i fafo Leoleo ma aga’i atu i totonu o le lotoa, na la vaaia ai loa se moli (flash) e foliga o se moli o se fana o loo aga’i mai i le isi itu pogisa o le malae. O iina na la iloa ai loa se tagata o loo ia fanaina le la ta’avale Leoleo.

 

O le isi pulufana na nuti nini’i ai le tioata pito i tua o le ta’avale pikiapu a Leoleo, ma agai atu ai le pulufana ma masae ai le vaega o le nofoa e faalagolago ai le ulu o le ave ta’avale, ae o le isi pulu na fana ma pu ai le faitoto’a o le pasese i le itu taumatau.

 

Saunoa Le’i e fa’apea, e le o se fa’alavelave e faigofie le faalavelave na tula’i mai i le vaiaso na te’a nei, ma o lo o fa’aauau pea i ai suesuega a le Ofisa o Leoleo. Ua ia talosagaina le atunu’u ina ia fesoasoani atu i Leoleo, e ala i le fa’ailoaina atu o ni fa’amatalaga latou te silafia e uiga i se tagata po o ni tagata sa latou fa’atinoina lenei solitulafono.

 

“O le a matou suesueina ma le toto’a lenei fa’alavelave, afai matou te mauaina le tagata poo tagata sa latou fa’atinoina, o le a matou molia i latou uma i le tulafono. Ae mo le silafia e le atunu’u, e taua atu le saogalemu o ali’i ma tama’ita’i Leoleo ia te a’u nai lo se isi lava tulaga o le galuega, o i latou nei o loo ofo atu o latou ola e puipuia ai le saogalemu o tagata ma le atunuu atoa,” o le saunoaga lea a Le’i.

 

E oo mai i le taimi nei e leai se tasi poo ni tagata ua masalomia e tusa ai o lenei fa’alavelave. Saunoa Le’i e fa’apea, o le a ia fa’aaogaina le tomai ma le malosi o Leoleo i le atunu’u e sailia ai i latou sa fa’atinoina lenei solitulafono. O le a ia talosagaina fo’i se fesoasoani mai fafo ina ia mautinoa ai e le sao e se atu i latou sa faatinoina lenei amioga palaai ma le taufa’amata’u i soifua o Leoleo.

 

“O lea ua tatou i ai i vaitau pisi o le tausaga, toatele aiga, fanau ma uo ua malaga asiasi mai i si o tatou atunuu, ae le tatau ona tutupu ai ni faalavelave faapenei. O le mafua’aga lea e talosaga atu ai i le atunu’u atoa, afai e i ai se tagata na te silafia se fa’amatalaga e uiga i lenei fa’alavelave, fa’afesootai mai le Ofisa o Leoleo.” o le saunoaga lea a Le’i.