Tatala polokalame fou ofisa DHSS mo tagata molia sauaina aiga

Sui o le Ofisa o Alamanuia ma Auaunaga Lautele i le atunu’u, i le taimi o le latou savali i le fa’amanatuina o le aso o tagata faigaluega i le atunu’u i le amataga o le masina lenei.  [ata AF]
ausage@samoanews.com

O le masina fou o Oketopa 2016 lea ua fa’atulaga e le Matagaluega o Alamanuia ma Auaunaga Lautele i le atunu’u (DHSS), e tatalaina ai sana tautua faapitoa mo i latou uma lava ua ta’usala e le fa’amasinoga i le faia o sauaga fa’asaga i latou ta’ito’alua po o tina fo’i o lo o latou mafuta, ina ia mafai ai ona fesoasoani i le foiaina o lea fa’afitauli.

 

I le avea ai o le masina o Oketopa o le masina e fa’atauaina ai le tete’e atu i sauaga i totonu o aiga, aemaise ai o faiga le alofa e faia fa’asaga i fanau tama’ita’i, tina fa’apea ai fo’i ni isi o Tama, ua fuafua ai le matagaluega e tatala aloaia ai se tasi o ana polokalame fou mo i latou ua mae’a ona ta’usala e le fa’amasinoga e pei ona taua, lea ua fa’aigoaina o le “AMANAIA”.

 

E pei ona fa’amanino ai e le sui fa’atonusili o le Ofisa ia Cellestina Faumuina-Nix e fa’apea, o le taua o polokalame eseese nei, o le a mafai ai ona fesoasoani i le fa’aitiitia o le fa’atupulaia o lenei fa’afitauli i totonu o aiga aemaise lava i le va o ulugali’i.

 

O le taimi nei, o lo o fa’atautaia pea lava e le DHSS Ofisa o Alamanuia ma Auaunaga Lautele i le nofoaga o le Fatu o Aiga lenei, lea o lo o mafai ai ona auai i latou o lo o a’afia i solitulafono nei i aoaoga fa’a faufautua, pe afai ae poloaiga i latou e le fa’amasinoga e auai ma fa’au’u mai ai.

 

Na taua e sui o le DHSS e fa’apea, o nisi o auala o le a mafai ona a’oa’oina ai i latou  i lenei polokalame, o le taumafai lea e a’oa’o i latou i auala e foia ai le tula’i mai o le ita ma fa’atupu ai le vevesi i totonu o aiga, aemaise ai o auala e mafai ai ona talanoa ma fofo ni fa’afitauli e alia’e mai i totonu o le aiga.

 

E le gata i aoaoga mo tama ua poloaina e le fa’amasinoga le auai i aoaoga fa’a faufautua nei, e mafua mai i lo latou faia o sauaga i o latou ta’ito’alua ma tina o lo o latou mafuta, ae mafai fo’i ona aofia ai ma tina o lo o faia sauaga fa’asaga i tama i totonu o aiga.

 

O le amataga o le masina o le a faia ai sa sauniga e aloaia ai le fa’atauaina o le masina o Oketopa, o lea fo’i ua fa’amoemoe e sainia ai e le afioga i le ali’i kovana ia Lolo Matalasi Moliga se poloaiga fa’alaua’itele e aloaia ai le masina fou o se masina e fa’apitoa mo aoaoga taua nei.

Comment Here