Ads by Google Ads by Google

Tatala ofisa fou DOH Fagaalu mo talavai fa’afou o kilia ma’i


O i latou o lo'o tautuaina le mamalu lautele i le Fale fou ua nofoia nei e le Talavai mo Kilia Ma'i a le Matagaluega o le Soifua Maloloina i Faga'alu. Matagofie le latou Ofisa fou fa'ato'a atoa le tolu vaiaso talu ona tatala. [ata: Leua Aiono Frost]

Ua matagofie le fa'afaigofie ona fa'ataunuu uma lava tiute o tama'ita'i o lo'o tautuaina le mamalu lautele o i latou e gasolo atu i le Fale fou mo Talavai e fa'afou ai KIlia Faigaluega mo e faigaluega i galuega i fale'aiga ma fale gaosia meataumafa o so'o se ituaiga, e pei o Kamupani I'a atoa ai ma fale'aiga fa'atau atu i le mamalu lautele i le Maketi po'o isi nofoaga tumau.

 

"Ona o le tulaga o le mana'omia ona fa'aaoga vave le Ofisa fou, ua tatala vave ai loa le falefou lenei. Ua mana'omia ona vave le fa'asologa o tagata e talosaga latou kili o le soifua maloloina, e mafai ai ona galulue,” o se tala lea mai se sui o le Matagaluega o le Soifua Maloloina, ona sa tele fonotaga a le Fa'atonusili, Motusa Tuileama Nua i le aso ananafi.

 

O le fale lea a'o le'i mae'a ona toe galuea'ina, sa fa'atautaia ai talavai mo Kilia o le Soifua Maloloina ma le Talavai a le "Well Baby Clinic" mo pepe ma fanauiti i a latou siakiga masani ma tui puipuia fa'alemasina se'ia mae'a le ta'i 14 tausaga o le matutua.

 

Lea ua toe tatala nei, ae ua faia ai Kilia mo le Soifua Maloloina o tagata faigaluega, ae o le talavai a le fanauiti ua taumafai ona fa'aa'e ane i le fale i tua atu o lea falefou e pito i luma. E ese mai lea ua fuafua fo'i ina ia fa'atulaga fale tuai i tua atu o nei potu talavai, ia avea ma se nofoaga fa'apitoa mo gasegase tau le mafaufau, e nonofo mau ai.

 

"O i latou nei ua va'aia le momoe i nofoaga fa'atali pasi, ma luma o Ofisa po'o so'o se vaipanoa. O i latou fo'i o tagata o si o tatou atunu'u, peita'i ua afaina latou mafaufau, ma e tatau ona saunia se nofoaga e fiafia i latou e nonofo lelei ai,” o se tala lea mai le sui o le matagaluega.

 

O lona uiga, o nei faletuai o le a toe fa'aleleia totonu, ina ia agava'a ona nofoia e i latou nei, ma e toe itiiti nei va'aia le fa'agasologa o galuega toe fausia lelei mo lea atufalega e pito i tua o le Matagaluega, i lona nofoaga i Fagaalu.

 

O le tinoitupe na fa'aaoga i le toe fausia o le Ofisa mo Talavai o Kilia Faigaluega, sa maua mai i le polokalame a le fetarale mo galuega tetele (CIP).

 

Ua fuafua nei le tatalaga aloia o lea galuega i le masina fou, peita'i, e muamua lava ona mautinoa o le a i ai ni ali'i foma'i e to'atolu e mafai ona latou galulue i le Talavai a le Primary Care, lea e fa'atautaia lua mai ma siakiga o Kilia Ma'i mai le Soifua Maloloina e pei ona amatalia ai nei i le fale fou.

 

I le taimi nei, o talavai nei e le o totogia, e pei lava fo'i o talavai i Falema'i i Itumalo lea e aofia ai Tafuna, Leone ma Amouli.

 

O talavai uma nei o lo'o aofia i le fa'atulagaga a le Medicare lea ua alu uma ai fa'atasi Falema'i Itumalo, e fa'auia le totogia o nei talavai uma i le Medicare.

 

Na fa'atuai ona fa'alauiloa lea tautua i Faga'alu, ona o le le'i mae'a ona tatala o lea fale fou mo Talavai tumau a le Primary Care ma siakiga mo Kilia Faigaluega.

 

E lima potu e faia ai siakiga o gasegase i le fale fou lenei, ae mana'omia lava ni Foma'i se to'atolu e fa'aaogaina nei potu mo talavai. E to’atasi le foma'i, o lo'o fia siakiga mo Kilia a le Soifua Maloloina mo tagata faigaluega e mo'omia. O lona uiga o le tulaga fita lea e i ai nei mo le Matagaluega, o le fia maua o ni Foma'i e fa'atautaia Talavai a le Primary Care i le totogi ua gafatia ona ofo atu ia i latou.

 

I le tulaga fo'i o talavai mo kili faigaluega o le Soifua Maloloina, e tuai lava le fa'asologa, ona o le foma'i lava e to'atasi, ma e na'o le 20 tagata talosaga mo nei kilia e talia i le aso e tasi. O le fa'atulagaga lea e ao ina usita'ia ai le aiaiga a le Medicare mo falema'i uma e totogia e i latou le talavai.

 

E fa'afa ona e asia ma fa'aauau au talavai nei, ina ia mae'a ai ona taua'aoina lou ID.

 

O au talavai e mae'a ai Kilia Faigaluega mai lea Ofisa e ao fo'i ona i ai suesuega uma a le Laboratory e faia.