Tatala Maota Tele o le Kolisi Tu'ufa'atasi o Amerika Samoa


[l-r] Afioga i le Maoputasi, Mauga T. Asuega; afioga i le kovana sili Lolo Matalasi Moliga, ma le afioga i le matua ia Togiola Tulafono (lea sa avea muamua ma kovana) i le aso ananafi i le fa’apaiaina o le Maota tele fou o le ASCC. [ata: Leua Aiono Frost]

"E ui ina umi o tatali, ae o lea ua mae'a, o se galuega na faia ma le toto'a, ia usita'ia uma tulafono tau le fa'asaoaina o le enetia, ia agatonu ma le Si'omaga, ma ia matagofie e talia mana'oga o le fanau a'oga e gasolo atu i le Kolisi Tu'ufa'atasi o Amerika Samoa e saili le atamai lautele,” o lea se saunoaga sa fa'afofogaina e le tofa le Puleono Aufai Apulu Areta, lea na fa'afeiloa'ia le mamalu na vala'aulia ae a le taeao manuia o le Laumua i Mapusaga.

 

O le Multi-Purpose Center ua tutula'i nei e fa tausaga o fausia mai talu ona mae'a suaina le eleele i le tausaga 2013. Peita'i na afuafua mai e Peresetene Adelle Satele Galea'i, soso'o mai ai ma Peresetene Seth Galea'i, ae o lea fa'ato'a fa'amae'a lelei e Peresetene, Dr. Rosevonne Makaiwi Pato, o le fa'afetai, e to'atele e na tofu sao, ma ua mae'a ane ai, o se Faletele na Fautele!

 

O mea uma lava na molimauina o le fa'amoemoe, e matua u'umi lava. O le lauga fa'afeiloa'i a le tofa le Puleono, soso'o mai ma le lisi o le fa'afetai a le Peresetene na lisia uma ai i latou na tofu sao, taumafai e fa'aputuputu mai le seleni ina ia lava, i latou na tiga ulu i le tau fausiga o le fale, o i latou na saunia le ata ma ia taumafai e mulimulita'i i na tapenaga, ae maise o i latou na fautua i le faiga e mafai ona vave ai ona tino mai le galuega.

 

Na tula'i le Kovana, Lolo Matalasi Moliga, ma ia toe fa'apea mai, "E le o le fale, a'o le anofale, ia tele ni alo o le atunu'u e gasolo mai, tautuaina ma aoaoina ai i le fale lea, ma toe felelei atu i fafo mo le fa'alauteleina o le atamai, aua le lumana'i o le malo lea!"

 

Ina ua mae'a le sauniga lotu sa ta'ita'ia e Moseniolo Viane Etuale, sa saunoa le peresitene mo le tala ole galuega, lea na tomua i lana fa'afetai mo faigamalo e lua. O le faigamalo a le afioga le Matua Togiola Tulafono ma le faigamalo o lo'o tula'i nei. Soso'o ane ai ma le nofoa Komiti Fa'afoe na tutula'i mai ma tausinio ina ia mae'a ma tula'i lenei galuega ae fa'ai'u ai ma le nofo a peresetene o le Kolisi ma ana aufaigaluega tofia.

 

O le tala o le tupe na tausailia mo le galuega lenei, sa amata ona fa'asaoina mai le tupe e le nofoa'iga a Adelle Galea'i, soso'o mai ai ma Seth Galea'i, ae o le nofoa'iga a Kovana Tulafono na fa'asalafa atoa mai ai loa le CIP Funds atoa mo le galuega i le tausaga 2008, 2010, 2012, 2013 ma le 2014 atoa ai le $6.5miliona e mae'a ai le galuega lenei.

 

E to'atele fo'i tagata faigaluega na atofa mo lenei galuega ua toe tofia mo nisi tiute ae na i ai lo latou sao fa'afetai i le galulue ma le tofa mamao sa fuafua ma faatino ai nei galuega uma.

 

Na fa'ato'a amatalia lava le fausaga o lenei fale i le tausaga e 2013 se'ia o'o mai i le 2018 lenei ua tatala aloa'ia ai.

 

Ina ua mae'a le tala o le galuega o le afioga le Kovana Sili na ootia le lipine o le galuega.

 

O lo'o ua mae'a fa'atutuina fo'i panele mo le mitiia o ave o le la e fa'aeletisea ai le maota, ae maise o le galuega tele na fa'afao i ai a'ao o le susuga le Matuaofaiva Papali'i Lauli'i Alofa ma le aiga Salemalama. O le ata o le fale sa tusia lea e le susuga Ben B. Lee ma lana kamupani o le Clifford Planning & Architecture mai Hawaii, ma sa auai lava lenei ali'i i le sauniga ananafi.

 

E ese mai lea ae sa ia tula'i ma fa'ailoa, e ui ina tele manatu ma fuafuaga, ae o lea ua tino mai ua atoa mea uma sa fa'atulaga mo le faletele. Mai lona amataga se'ia fa'ai'u, sa mataituina lava e Ben Lee le galuega fa'atasi ma ali'i pasi fale a le Public Works a le tatou Malo lea na masi'i atu ai le susuga Laupule Tilei e taua'ao aloa'ia le tusi pasi o le fale mo lona fa'aaogaina ia Pato.

 

O le sui sa gafa fo'i ma le va'aiga toto'a o le fa'agasologa o le galuega i le va ai ma le Kolisi Tu'ufa'atasi o le susuga lea a Lokeni Lokeni.

 

I se saunoaga a le susuga le Matuaofaiva i lona avanoa i le polokalama fa'asolo, sa ia fa'ailoa ai, " Pe ana leai le alofa o le Atua e le mafai ona mae'a lava se galuega. Fa'afetai lea ia te Ia aua e le'i mavae lona alofa mai, fa'asoa mai le tomai mo le fausaga. Fa'afetai fo'i i le Kovana ma le Kolisi ona o le mau talitonuina o le Paramount latou te fausia lenei faletele. E tuai lava ae fai mai, o se mea lelei! O le tatalo ia fa'amalieina outou i lenei fale pe a outou ulufale ma maimoaina. Ae fa'asili ia aoga i le tausailiga a le fanau a Amerika Samoa i aoaoga ae a le lumana'i o le atunu'u."

 

Sa ia matua fa'afetaia Dr. Pato mo lona onosa'i, fa'apalepale i taimi e lutaluta ai le tai ona o fa'aiuga faia mo le maota lenei. "Ua avea lava oe ma purinisese i le aiga Sa Iuta, i lou lava taimi ua ea ai lenei galuega ona o lou onosa'i ma lou loto maulalo ina ia mae'a. Ia i matou le au faufale, matou te fa'afetaia le avanoa ua aofia ai i matou i le fausaga o lenei maota, aua o le sao mo a taeao o le atunu'u."

 

I le 'aiga mo le galuega sa faia lea i totonu o le Hall o le faletele fou, ma sa matagofie le nofoaga fa'apitoa e faia fa'afiafiaga ae maise o le nofoaga e alalata'i ai e maimoa lea na tautu mai ai le 'aiga mo malo fa'aaloalogia. Na vala'auina fa'apitoa fo'i le afioga le Matua ina ia saunoa ona toto'o ai lea i le keke, sa ia fa'amanuia i alo uma o le atunu'u o le a soloa'i atu e fa'aaoga lenei maota, sa ia fa'amalo ia i latou uma na galulue ma tofu sao i le galuega ae maise ai lava le afioga Kovana Lolo Moliga, sa ia fa'afetai ua mae'a ma ua matagofie le faletele o le Kolisi Tu'ufa'atasi aua sa aotelega fo'i taofi ma manatu, ia tula'i lava se pine fa'apenei i le Laumua.

 

O toe upu a Lolo sa ia una'ia ai le mau mo e a'oa'o, "Ia tautuana lo tatou tofi o le a'oa'o o fanau, aua e le o tupe po'o fale tetele, ae ia saunia le tupulaga o a taeao ia popoto e fa'afoe le tatou malo lea. O i tatou ia a'oa'o atu i latou. A faaletonu i latou o lona uiga o i tatou e mafua atu ai."

Comment Here