Ads by Google Ads by Google

Tatala malae ta’alo Fagatogo na fausia silia $400k


Le taimi na aga’i atu ai i totonu o le malae taalo i Fagatogo sui o le malo ma le afioga ina ua tatala le malae taalo a le afioaga i Fagatogo i le aso Faraile na te’a nei. [ata AF]

Ta’aalo fiafia fanau o le afioaga i Fagatogo ina ua fa’atoa mae’a le sauniga lotu e tatala aloaia ai le malae taalo a le afioaga sa fausia e le malo i le aso Faraile na te’a nei. [ata AF]
ausage@samoanews.com

E silia i le $400,000 le vaega tupe na fa’aalu e le malo atoa ai ma le lagolago malosi mai a ni isi o kamupani i le atunu’u e fausia ai le malae ta’alo mo le afioaga i Fagatogo, lea na tatalaina i le aso Faraile na te’a nei i se sauniga lotu puupuu na molimauina e ta’ita’i o le afioaga fa’apea ai ta’ita’i o le malo.

 

O le itula e 9:00 na amata aloaia ai le sauniga lotu i luma tonu o le faitoto’a e ulufale ai i le malae taalo, e fa’apaiaina ai le fa’aaogaina o lenei galuega tele, lea na ta’ita’ia e le aufaigaluega Faifeau a le afioaga i Fagatogo, i lalo o le ta’ita’iga a le susuga i le Faifeau Toeaina ia Rev. Elder Fa’amao Asalele.

 

O le upu fa’amalosi na tatala ai le autu o le galuega, na taitaia lea e le susuga Rev. Iasepi Ulu mai le Ekalesia EFKAS i Fagatogo, lea na ia fa’ailoa ai i ta’ita’i ma sui uma o le afioaga i Fagatogo na auai i le sauniga, e le o se malae e faia ai ni inuga ‘ava malosi poo fefa’atauaiga o aisa ma fualaau fa’asaina, ae o le malae e feiloa’i ma mafuta fiafia ai tupulaga o le afioaga ma le atunu’u.

 

“Ia tatou fa’aaoga tatau meaalofa ua tu’uina mai e le malo mo tupulaga o le afioaga, ia avea o se malae ta’alo e afua atu ai ni mea lelei mo tupulaga, ma avea o se nofoaga e mafuta fiafia ai tupulaga o le afioaga ma le atunu’u, ae le o se nofoaga e o mai ai tupulaga e fa’atau ai aisa ma ula ai mariuana, pe inu ai fo’i le ‘ava malosi”, o le fautuaga lea a le susuga Rev. Ulu.

 

Sa auai i le sauniga le afioga i le ali’i kovana ia Lolo Matalasi Moliga, fa’apea ai le lutena kovana ia Lemanu Peleti Mauga. Sa fa’atumulia fo’i le sauniga i sui o le afioaga faapea ai isi sui o le malo na lolofi atu latou te fia molimauina le tatalaina o lenei galuega matagofie.

 

Na taua e le afioga i le ali’i kovana i lana saunoaga e fa’apea, e ui e lei i ai se tupe e amata ai le fausiaina o le galuega, ae na mafai ona fesoasoani mai le Fono Faitulafono ma latou fa’amatu’u mai le $100,000 e amata ai le fausiaina o le galuega mo le malae ta’alo, i le mae’a ai lea ona talosagaina e le afioga i le ali’i faipule o le afioaga ia Maugaoali’i Leapai Tusipa Anoa’i se vaega tupe e fausia ai se malae ta’alo mo tupulaga o le afioaga.

 

Na fa’amatala e le ali’i kovana i lana saunoaga le la ulua’i fonotaga ma Maugaoali’i, lea na fa’ailoa atu ai loa e le ali’i faipule lona fa’anaunauga o lo o i ai, i le tau sailiina lea o se fanua e fausia ai se malae taalo mo tupulaga o le afioaga ma le atunu’u, ona o le tele o fanua i Fagatogo ua mae’a ona fa’aaoga e le malo e fausia ai atina’e mo le atunu’u.

 

“E 2 atina’e na talanoa mai le ali’i faipule o lo o naunau e fia fausia, o se malae taalo mo Fagatogo, ma se Ma’a Fa’amanatu e fa’ailoga ai le ulua’i nofoaga na sisi a’e ai le fu’a i Fagatogo i le pito nu’u o Sogelau, ae talu ai ua le lava se tupe a le malo, o le mafua’aga lea ua manatu ai e auaua’i le fausiaina o nei galuega”, o le saunoaga lea a Lolo.

 

Na taua fo’i e le ali’i kovana e fa’apea, sa i ai fo’i popole i le fausiaina lea o le malae ta’alo i lona nofoaga ua i ai, ona o le tulaga latalata i le Fale Fa’amasino, peita’i i le mae’a ai ona faia o feutanaiga mo tulaga uma e moomia, na amata ai loa le fausiaina o le galuega.

 

“O le malae taalo la lenei ua fausia e le malo, e le o se malae o le malo, ae o le malae a le afioaga i Fagatogo, lona uiga, o le tausiaina lelei o le malae atoa ai ma le vaaia lelei o tulaga uma, o le matafaio tausi lena a le afioaga i Fagatogo, ia avea o se nofoaga e mapu mai i ai tupulaga ma aiga i taimi avanoa, ae aua ne’i avea ma nofoaga e tutupu mai ai ni mea le lelei ma le manuia i le fa’alogo a ta’ita’i o le afioaga, atunu’u ma le malo”, o le saunoaga lea a le ali’i kovana.

 

Na taua atili e le ali’i kovana le isi mafua’aga na ala ai ona naunau le malo e fausia le malae taalo, ona o le manatu ia avea o se auala e tutupu mai ai mea lelei i olaga o tupulaga o le atunu’u ma le nu’u, ma ia maua ai fo’i le avanoa e mafuta fiafia ai tupulaga o le atunu’u, nai lo le naunau atu i isi mea leaga o le olaga.

 

O le tala o le galuega na saunoa i ai le Faatonusili o Paka ma Malaetaalo a le malo, susuga Maeata’anoa Pili Gaoteote, lea na ia taua ai le tupe na amata ai le galuega o le malae taalo, atoa ai ma isi fesoasoani na tu’uina mai i kamupani ma vaega o le malo.

 

O le galuega o le malae taalo e pei ona saunoa Maeata’anoa, na amata mai lona fausiaina ina ua fa’apipi’i e le malo moli e ola i le malosiaga o le la o lo o si’imia ai le Malae o le Talu ma fa’asolo atu ai lava se’ia oo atu i le malae o le Su’iga’ula o le Atuvasa i Utulei, i le tau atoa e $200,000.

 

O le malae taalo i Fagatogo e $150,000 lona tauaofa’i, fa’aopoopo ai ma le isi $100,000 mo le totogi o mea taalo uma faapea ai le tau atoa o le galuega, ona maua ai lea ol e tau atoa o le galuega e $450,000.

 

Na fa’afetaia e Maeata’anoa le fesoasoani a isi Matagaluega o le malo e pei o le vaega o Fefa’atauaiga ma Alamanuia (DOC) ma le Ofisa o le Kovana, lea ua mafai ai ona fa’atinoina ma le manuia lenei fa’amoemoe.

 

O le mae’a ai o le sauniga na faai’u ai loa le mafutaga i fa’aaloaloga fa’aleaganu’u na saunia e le afioaga i Fagatogo mo ta’ita’i o le malo, i lalo o le ta’ita’iga a le tofa a Ta’amu Vaigafa Iakopo.