O le vaiaso na te’a nei na tatala aloaia ai le Ofisa autu o le Pulega o le Eletise ma le Suavai (ASPA) i Tafuna, e sui tulaga i lona Ofisa tuai sa fa’atuina i Satala mo le tele o tausaga lea na fa’aleagaina i le galulolo o le 2009.

O le fausaga o lenei fale e pei ona taua i saunoaga a ta’it’ai i le aso na tatala aloaia ai, e foliga tutusa lelei lava ma le fausaga o le maota a le Ofisa o le AS-EPA i Utulei, lea o lo o fausia i fausaga fa’aonapo nei, o le fale lona lua la lea ua fausia i totonu o Amerika Samoa.

Na molimauina e Ta’ita’i o le atunu’u le tatala aloaiaina o lenei galuega, lea e $4.6 miliona le tau aofa’i, e aofia ai le vaega tupe e $3.73 miliona mai le Vaega a le FEMA a le malo tele o Amerika, ma le $873,000 sa fesoasoani atu i ai le ASPA.

O se sauniga lotu puupuu na taitaia e le afioga a Patele Iosefo Vaitele Tupuola na amata aloaia ai le tatalaina o lenei galuega tele, sosoo ai loa lea ma saunoaga mai ta’ita’i o le malo fa’apea ai ta’ita’i o le ASPA.

Na taua e le afioga i le ali’i kovana ia Lolo Matalasi Moliga le taua tele o le galuega ua mae’a ona fausia e le ASPA, e atagia mai ai le la’a i luma o le malo i ni isi o ana atina’e tetele mo le manuia o ona tagata.

Sa ia taua ni isi o si’itaga e fa’atatau i le taua o le la’a i luma, ona o iina e iloa ai foliga manuia o se faigamalo pe afai e vaaia le aga’i pea i luma ona galuega ma atina’e. E le gata sa ia fa’afetaia faapitoa le Pulesili o le ASPA, le afioga i le Matua ia Utu Abe Malae e tusa ai o le galuega fita ua fa’aulufaleina nei, ae sa ia fa’afetaia faapitoa fo’i le Komiti Fa’afoe a le ASPA atoa ai ma tagata faigaluega uma lava sa tu’uina atu lo latou tomai e fa’atino ai lenei galuega.

“Ua le tasi se galuega ua faia e le ASPA i le atunu’u ae ua atulasi, o lea fo’i ua mae’a ona outou fa’atinoina se tasi o galuega tele i totonu o Amerika Samoa, e pei ona i ai le galuega lea ua ola ai nei le itumalo o Manu’a atoa i le la, ma e ui o lo o i ai pea tagata Manu’a o lo o muimui ma faitio, ae o le itu taua ua mae’a ona tatalaina ia galuega tetele e manuia ai tagata o le atunu’u”, o le saunoaga lea a Lolo, ma ia toe fa’amautuina ai lana talosaga sa tu’uina atu ia Utu ma le Komiti Faafoe a le ASPA i ni taimi ua te’a, ina ia galulue pea e fa’amae’a le galuega o le fa’aaogaina lea o le la e maua mai ai le eletise e ola ai Amerika Samoa atoa.

Sa ia fa’afetaia le tautua a Utu i totonu o le malo, lea ua mafai ai ona tula’i mai le tautua a le ASPA i se tulaga manuia.

E pei ona manino i le saunoaga a le Pulesili o le ASPA, le afioga a Utu e fa’apea, e ui e le o se galuega faigofie lenei galuega, a o lea lava ua mafai ona fa’atinoina ona o le galulue fa’atasi o le Komiti Fa’afoe a le ASPA fa’apea ai vaega ta’itasi uma sa i ai lo latou sao i le fa’atinoina o lenei galuega tele.

O lenei galuega sa fausiaina e le Konekarate a le Paramount Builders Inc, i lalo o le ta’ita’iga a le afioga a Papali’i Lauli’i Alofa, ae lagolagosua i ai isi konekarate e pei o le Green Engineering Consultant, lea sa latou fa’atinoina uma galuega tau inisinia, ma le Tresmal sa latou sapalaiaina mai mea faigaluega e fa’atinoina ai le galuega.

Na aofia i le fa’afetai a Utu le suafa o le afioga i le Matua ia Togiola T. A Tulafono, lea sa avea ma Kovana o Amerika Samoa i tausaga ua mavae, ona o ia lea isi sa amataina maia taumafaiga mo lenei galuega tele, lea ua i’u ina fa’ai’uina ma le manuia.

I le saunoaga a le afioga i le Ta’ita’ifono o le Komiti Fa’afoe a le ASPA ia Fonoti Perelini, sa ia taua ai le taua tele o le fale fou mo le ASPA lea ua tatalaina nei, ona o le nofoaga lea o le a avea ma nofoaga e autu i ai tautua uma a le ASPA mo le atunu’u.

“O le ofisa lenei e maua uma i ai tali o soo se faafitauli e mana’omia e le atunu’u, o le a faigofie ai fo’i ona afifio mai le atunu’u ma feiloa’i ai ma ta’ita’i o vaega ta’itasi i soo se mataupu e fiamalamalama atili i ai”, o le saunoaga lea a Fonoti.

E ese mai i le nofoaga autu fou i Tafuna lea ua tatalaina nei, o lo o fa’aauau pea lava le auaunaga a le ASPA i lona Ofisa i le Pago Plaza, ina ia fa’a faigofie ai mo le mamalu o le atunu’u o loo alala i le itu i Sasa’e mo soo se taimi e mana’omia ai le auaunaga masani a le ASPA.