Tatala le A'oga Tulaga Muamua i Fagali'


Le ali'i pule a'oga Etisone Lauolo Taumua , le faletua o le fa'afeagaiga EFKAS i Fagali'i sa ia ootia le lipine o le Faleaoga, ma le Fa'atonusili o A'oga Ruth Matagi Tofiga ua fiafia fa'atasi i le tatalaina o falea'oga e tolu i Fagali'i ananafi. [ata: LF]

"Ia faitau ma a'oa'o, faitau ma a'oa'o, ia malamalama atoatoa le fanau,” o se tima'i lea a le Fa'afeagaiga EFKAS i Fagali'i, Rev Fa'ali'i Otineru, o se vaega o lana upu tima'i i le vasega o faia'oga, o le a tapenaina le anofale o le galuega e tolu faia'oga i le Aoga Tulaga Muamua i Fagali’i, sa tatala aloaia i le aso ananafi.

 

"O lenei galuega ia avea ma puna'oa o le atamai i alo uma o le Fale-Atalataua, ua fa'amanuia mai le Atua i le au atia'e, i pa na soloia e le galulolo tele o le 2009, lea ua toe tula'i mai ai se olo malosi e saili i ai le atamai lautele e fanau a le Alataua, fa'afetai e fo'i i le Atua,” o a Rev Otineru lea.

 

I lana mau fa'asolo o ona manatu sa ia fa'atepa ai i latou sa auai, "Lea ua mae'a le galuega sa fa'atino e Ne'emia mo lona nu'u o Isaraelu, e toe atia'e le pa o Ierusalema, ae ua tu'u atu i le manulauti sa taoto ia Esera le faitaulaga a le Atua, ia a'oa'o agaga ma le mafaufau ia manino ia i latou le tulafono ma le atamai lautele, a'o le loto o i latou e fafau atu e i matou le aufaigaluega, ia iloa ona ola finau i mea lelei, ae le o le leaga."

 

Saunoa, Kovana Lolo Moliga ma ia fa'afetaia lea folasaga manino a le Faife'au, "Ioe e tolu lava mea nei e tu'u atu ai faiva ia i tatou uma ua aofia, le faiva o le Malo lea ua mae'a o le fausia o falea'oga e tusa o tulafono fa'avae o le Malo, ia saogalemu a'oa'oga mo le fanau ma i latou o e a'oa'o, ua tu'u le faiva o le fa'aa'oa'oga o fanau e afua mai Matua e o'o mai i faiva o faia'oga, ae o le faiva o Fa'afeagaiga o matua faaleagaga o fanau a le itumalo, ia a'oa'o loto ia iloa ona ola finau mo mea e lelei ai latou lumana'i. O le uiga tonu lea o le galulue fa'atasi e manuia ai!"

 

O le tala'aga o le galuega sa faailoa e le sui Fa'atonu Sili o galuega le susuga Fa'alava'i Ta'ase. O le galuega e to'afa Kamupani sa fa'akonekarate ai. I le vaega muamua na tu'uina lea ia Tony's Construction, ia Sila Poasa e fa'amafolaina le laueleele ina ua pasia e le FEMA, malilie i ai le afio'aga o Fagali'i, atoa ai fo'i ma le afio'aga o Poloa lea sa fa'afaleina le a'oga i Taputapu, peita'i ua le finagalo i ai le FEMA e toe fa'atuina ai lenei Laumua.

 

O le Tony's Construction, o le galuega atoa e $640,000. Ina ua o'o i le fa'atutuina o falea'oga e tolu ua i ai nei, sa tolu konekarate sa lautogia mo lea vaega, ina ia mautinoa ua vave le galuega ma le fa'alavelave le isi kamupani i le taumafaiga a le isi kamupani, ae ua maua ai fo'i ma le taimi atofa o le galuega e tasi le 14 masina.

 

Amata ona fausia falea'oga A, B mas le C ia Iuni 2016 ae ua mae'a nei ia Aukuso 31, 2017.

 

O le Kamupani a le Quality Paint e fa'afoea e le tofa Atuatasi Jerry mo le "Fale A'oga A" lea e i ai le Ofisa o le a'oga i lona fogafale muamua, ae o lona fogafale lua e aofia ai le Potu o Masini Komipiuta ma le Faletusi na tu'uina mai le latou pili e $644,000. O le "Fale A'oga B" na fausia lea e le Kamupani a le Happy Trucking Company lea e fa'afoea e le susuga Lealofi Fuatagavi Suani mai Futiga ma o lana pili e $1miliona. O le falea'oga lea o lo'o aofia potu a'oga uma i lona fogafale lua, ae o le fogafale muamua o lo'o i ai le Umukuka mo fanau A'oga ma le Fale'ai, atoa ai ma Faleuia e le fanau aoga. Matagofie mea uma e pei ona asiasia e le Kovana ma lana taupulega i le aso ananafi.

 

O le "Fale A'oga C" ua fa'amautu i ai le ECE, Level K5 ma le Level 1 na fausia e le RM Construction o lo'o tula'i mai ai le susuga Roy Mallory ma lana aufaigaluega. O le latou tau e $600,000 mo lea fale.

 

O le tau aofai o le galuega atoa e $2.88miliona.

 

I se fanoga o le kovana i le vasega o faia'oga, "Ia fai e pei ona fa'ailoa mai e le faife'au, ia a'oa'o ia saga a'oa'o, ia malamalama lelei le fanau i mataupu uma ua fa'atulaga mo a'oa'oga, ia nofo malamalama ma atamamai i latou. Ia outou matua, o le a'oa'o ma le fagaina o fanau i o latou tino ma le mafaufau, o la outou matafaioe faifa'atasi lea ma faia'oga, ae o'o loa i le agaga ma le loto o fanau ina ia ola finau, o le matata lea a matua fa'aleagaga e pei ona taumafai i ai so'o se atunu'u.”

 

Na si'i mai e le Kovana le mau na fofogaina e le polofesa faia'oga o Aristotle, ma ia fa'ailoa ai, "E tolu a mea e fa'atulaga e a'oa'o ai le tamaititi, O lona tino ia malosi, e fa'aaoga ai le tausiga faaletino i lona aiga: O lona mafaufau ia malosi aua ua a'oa'oina e ona faia'oga i le atamai ma le poto lautele, ma lona agaga po'o lona loto ia malosi e soifua finau ai i mea lelei, lea e fagaina e Auauna a le Atua i le Upu o le Ola."

 

Na fa'apea fo'i le fa'afetai na si'itia e le Fa'atonu sili o A'oga, Dr. Ruth Matagi-Tofiga, aua o lenei galuega, sa amata fa'atulaga mai e le matagaluega ma i'u ina tino ma ua tula'i o se galuega matagofie. Fa'afetaia e ia le vasega o Kamupani sa latou fauao faupo lenei galuega, ae maise o le Faigamalo ma ona vaega uma sa latou fa'atulaga le galuega ia mae'a lelei mo lenei tausaga a'oga.

 

I se vaega o le tautalaga a le Kovana sa ia fa'ailoa ai, "E 50 potu a'oga fou ua mae'a fausia o le a faaaogaina i lenei tausaga a'oga, pe afai fo'i o le a pasia se tasi o pili fa'aulu a le faigamalo ua a'ao nei o le fono faitulafono mo ana iloiloga, e 50 potu a'oga fou o le a toe fausia mo le isi tausaga a'oga fou 2018-19."

 

O le fofoga le Alataua, le tofa le Tauto'oto'o Savali Talavou Ale sa tula'i mo se upu a le itumalo e tusa o le galuega. O iina sa ia fa'ata'atia ai le ata atoa o le taumafaiga mai lona amataga ina ua le pasia le afio'aga o Poloa e toe tu ai le Laumua.

 

"E ui ina fa'alagi o nu'u laiti, ae le faigofie lava nu'u laiti pe ana leai le tofa moe ma le tofa mamao a le pa'ia maualuga o fa'asuaga, ali'i ma faipule fa'apea le loaloa o aiga ua afua ai lenei taeao manuia ma le matagofie."

 

"E fa'afetaia le nofoa Fa'atonusili o A'oga e pei ona fa'asolo mai ia Taimalelagi Dr. Claire Poumele, soso'o mai ma Vaitinasa Dr. Salu Hunkin lea ua to'ai mai ia Dr. Matagi-Tofiga, fa'afetai i lo outou onosa'i ma le fa'apalepale a'o alo fo'i lenei itumalo e tau asa finagalo ina ia o gatasi ma fuafuaga uma. Lea ua talafeagai mea uma le mana'oga tupito o le FEMA, ua afua ai taeao lelei nei,” o sana toe fa'aopoopo mai lea.

 

"Peita'i e le fou falea'oga i Fagali'i, Poloa ma Fagamalo. Sa amata mai A'oga i Fagali'i i le vasega 1-8, a'oga i Fagamalo 1-6 ma le a'oga i Poloa 1-6. Lea la ua toe fo'i mai i Fagali'i, ua toe aotelega uma i ai aoaoga a le Alataua, fa'afetai ai i le Kovana ma le pulega, ua maua fo'i le ali'i pule a'oga fou mo Fagali'i, o le alo o le pule a'oga muamua lava i Taputapu na tatala ai lea a'oga, le susuga Lauolo Taumua, lea o le a tatala le a'oga lenei e lona alo o Etisone Lauolo Taumua."

 

O le aofai o le fanau ua mae'a lesitalaina e tatala ai le a'oga i Fagali'i i lenei tausaga a'oga e 72 i latou mai le vasega ECE, Level K5 se'ia o'o i le Level 8.

Comment Here