Ads by Google Ads by Google

Tatala i tua Michael Agasiva mai le Falepuipui

ausage@samoanews.com

O le aso Faraile na te’a nei na tatala ai i tua e le Fa’amasinoga Maualuga le ali’i o Michael Agasiva mai le toese i Tafuna, ina ua fa’amalieina le Fa’amasinoga, ua ova atu aso na taofia ai Agasiva i le toese nai lo aso e tatau ona ia tuliina i moliaga e pei ona ta’usala ai o ia.

 

O moliaga e 3 ua ta’usala ai e le Fa’amasinoga ia Agasiva e aofia ai le faia o uiga mataga i se tamaitai e le faaipoipo i ai i le tulaga lua, faaoolima i le tulaga tolu, atoa ai ma le tu fua i le fale o le isi tagata. O ia moliaga uma, e mafai ona fa’asala ai o ia i le falepuipui mo le umi e 12 masina.

 

I le ripoti na tuuina atu e le loia a Agasiva ia Joshua Rovelli i le fa’amasinoga na taua ai, e toeititi lava atoa le 13 masina na taofia ai Agasiva i le falepuipui, talu mai le aso na taofia ai o ia ia Ianuari 1, 2017, ma ua ova atu lea umi mai le taimi e tatau ona ia tuliina mo moliaga ua ta’usala ai o ia e le fa’amasinoga.

 

O le faalavelave e pei ona ta’usala ai Agasiva, na tula’i mai i Amaluia i le vaveao o le aso o le tausaga fou o le 2017, ina ua ia ulufale faamalosi i totonu o le fale o le Fafine e 52 tausaga le matua na a’afia, ma ia faia i ai ni uiga mataga ao moe le Fafine i luga o le nofoa i totonu o le potu malolo o lona fale.

 

Na taua e le Fafine na a’afia i Leoleo e fa’apea, o se fiafia a lona aiga sa faia mo le tausaga fou, lea fo’i sa auai ma Agasiva. O le mae’a ai o le fiafia i se taimi o le vaveao, na ia maua ai loa e alu i lona fale e malolo. Na taunu’u le Fafine i le fale ma taoto ai lava i luga o le nofoa i luma o le potu malolo ma moe ai loa.

 

O le fanau a le  Fafine sa i ai i le fale i le taimi lea, ae ina ua latou tuua le fale, latou te le’i lokaina le faitoto’a o le fale, ma o iina na maua ai le auala e ulufale ai Agasiva i totonu ma ia faia ai uiga mataga e pei ona ta’usala ai o ia e le Fa’amasinoga.

 

O ni isi o tuutuuga o le faasalaga a Agasiva sa tuu atu e le Fa’amasinoga, e aofia ai le tatau lea ona alu e lesitala lona igoa i le lisi o tagata ua faamaonia le faia o uiga mataga i tamaitai, e pei ona faatonu mai e le tulafono.

 

Ua faasa fo’i ona ia toe taumafai e fa’afesootai le Fafine na aafia i soo se auala, afai fo’i e i ai se isi ona fale i Amaluia e mafai ona alu e nofo ai, e ese mai i lona fale lea e latalata i le fale o le Fafine na a’afia, ona alu lea e nofo ai.

 

O Agasiva e pei ona taua e lana loia, o se tasi o Matai faitauina i totonu o le afioaga i Amaluia, o se matai fo’i ua uma ona lesitala fa’aletulafono.

 

Na faailoa e Agasiva i le Fa’amasinoga, o loo ia umia le faailoga o le BA i le matata o le Fa’a-Faiaoga, o lea fa’ailoga na ia maua mai i le Iunivesite o Hawaii.