Ua tatala i tua mai le toese i Tafuna le ali’i lea na maua atu e Leoleo o lo o moe i se fale fa’atali pasi i Tafuna, ae o lo o ia te ia fualaau fa’asaina, ina ua manatu le fa’amasinoga ua lava masina e 4 lea na taofaia ai o ia e fai ma ana fa’asalaga i lenei mataupu.

O le masina na te’a nei na ta’usala ai e le Fa’amasinoga Maualuga le ali’i o Faaili Mata’u poo ‘Whistle’ fo’i e pei ona iloa ai o ia e le to’atele o tagata i le moliaga o le umia fa’asolitulafono o vaega o le pauta fa’asaina o le aisa.

Na faatoese Matau i le fa’amasinoga e tusa ai o lana solitulafono sa faia, ma ia talosagaina ai se isi avanoa e toe fo’i atu ai i tua i lona aiga e tausi lona Tama o lo o gasegase, atoa ai ma si ona tuafafine matua e a’afia o ia i le gasegase o le stroke.

Na faailoa e le ua molia i le Fa’amasinoga e fa’apea, i le taimi ae lei taofia o ia i le falepuipui, o ia sa faia le galuega matua o le tausi lea ma fesoasoani i lona Tama ma lona tuafafine. Sa ia augani i le fa’amasinoga mo se avanoa se tasi mo ia e toe fo’i atu ai i tua e fa’aauau lana tausiga i lona aiga.

Na faailoa e le afioga i le ali’i Fa’amasino Sili ia Michael Kruse ia Matau e fa’apea, e le tatau ona ia fa’aaoga lona Tama ma lona tuafafine o loo maua i ma’i e fai ma alofaga, ae afai e mana’o o ia i se avanoa, e tatau lava ona ia faia se auala e mafai ai ona talitonuina o ia e le fa’amasinoga ma tuu atu ai se isi avanoa mo ia.

Na talosaga le loia a Matau ia Douglas Fiaui i le fa’amasinoga, ina ia fa’asala le ua molia i se fa’asalaga faanofovaavaaia, e aunoa ma le toe tuuina atu i ai o se isi fa’asalaga fa’a falepuipui.

O ni isi o itu lelei na taua e Fiaui e tatau i le fa’amasinoga ona silasila i ai mo Matau, e le gata o le taimi muamua lea faatoa faamaonia ai sana solitulafono, ae na vave lava fo’i ona ia tali ioe i le moliaga fa’asaga ia te ia.

Na lagolagoina e le loia a le malo ia Woodrow Pengelly le tatau lea ona faasala Matau i se faasalaga faanofovaavaaia, e aunoa ma le toe tuuina atu i ai o se fa’asalaga fa’a falepuipui.

Na talia e Kruse le talosaga a Matau ma faia ai le faaiuga ina ia tatala o ia i tua mai le toese, ma ia usita’i i tuutuuga uma o lana faasalaga faanofovaavaaia e 5 tausaga.

O ni isi o ia tuutuuga e aofia ai le faasa lea ona ia tagofia fualaau faasaina poo le ‘ava malosi, fa’asa ona ia toe mafuta pe eva ma tagata o loo latou tagofia le ava malosi poo fualaau fa’asaina, o le a faia fo’i se suega i lona tino i soo se taimi e faamaonia ai na te le o toe tagofia fualaau faasaina.

“O lea ua talia e le fa’amasinoga lau talosaga ma ua matou tuuina atu le isi avanoa mo oe, ae afai e te le usita’i i soo se poloaiga ua tuuina atu e le fa’amasinoga, o le a faaleaogaina loa lau nofovaavaaia ae poloaina loa oe e tuli lau faasalaga faa falepuipui lea ua taofi e le fa’amasinoga lona tuliina”, o le saunoaga lea a Kruse ia Matau.

E 20 masina na manatu le fa’amasinoga e taofia ai Matau i le falepuipui, peita’i ua taofia lona tuliina o lea faasalaga, fuafua lava i lona usitaia o isi poloaiga uma a le fa’amasinoga.