Ads by Google Ads by Google

Tatala galuega toe fa’aleleia vaega o le uafu Fagatogo


O le laulau pitoaluma o le afioga le Kovana Lolo Moliga ma lana faigamalo ma ua sasao ai fo'i ma le susuga le Fa'afeagaiga Iasepi Ulu mo le ta'ita'iga o le sauniga e tatala fa'apitoa ai le Uafu i Fagatogo mo lona fa'aaogaina. [ata: Leua Aiono Frost]

O le tatalaga o le Itu o le Uafu Tele a le tatou Malo sa toe fa'aleleia atili ina ia fa'aopoopo nisi tausaga e fa'aaogaina ai na fa'ataunu'u i le taeao ananafi. E pei ona mua'i manatu ai Kovana Lolo Moliga, e ao ina tatala lea galuega ia Novema 4, 2016, ae ua tutula'i ai ma le va'a mo feoa'iga i le Manu'atele, sa usia'ia lea tulaga ae suia lona aso i le aso ananafi.

 

O le tau aofa’i na fa'ailoa e le Matagaluega o Uafu ma Malevaalele e $9,595,471.22: tau o le ata $576,799.50; o le tau o lona fausaga e $534,150.00 ae o le tau o konekarate mo le galuega $8,464,521.22.

 

O le umi  o le galuega e 24 masina, ina fa'amautu lelei ai le sima o le galuega ma fa'ato'a tatala ai mo le fa'aaogaina.

 

Saunoa le susuga ia Dean Hudson, Pule o le Fletcher Construction lea sa manumalo i le tauofoga mo lea galuega, Dean Hudson, o le fausaga o lenei galuega e le faigofie lava. "O le toe eliga ia loloto atili le Uafu ua tula'i mai ai le loloto ua fa'amautu atili i ai pou i le taimi nei e 256 futu ua i ai nei. Ina ua mae'a la'u ese mai uma le tele o le lapisi ma toe eli fa'aloloto ina ia tau i le papa le uafu, ua maua ai lea loloto mo le fa'amoemoe e taula ai va'a tetele. Ua fa'amafiafia atili le sima ua mae'a fa'amalo atili i le 9 inisi ma ua iloga fo'i lona malosi mo le vaitau o lumana'i, ae o galuega o le a fela'ua'i ai ma feoa'i ai ta'avale tetele ma le mamafa. O le Uafu i le fausaga ua i ai, e tele ni tausaga o le a fa'aaogaina ai e le Malo o Amerika Samoa, ma o se sao lena o galuega fa'apenei, ia mautu ma lelei umi aua le fa'amoemoe mo fela'ua'iga,” o se tala lea a Hudson.

 

Na ia fa'ailoa fo'i le afuaga ona suia o nisi o aiaiga tamau o le galuega e afua i le tulaga, "E le mafai ona faia matou galuega i lalo o lenei fola i so'o se taimi e sua tutu'i mai ai le tai, e tatau ona faia i le taimi ua maulalo ai le suasami atoa fo'i ma vaitau e louloua ai le tau i timuga tetele ma matagi malolosi."

 

O lana tala mai, "O le galuega ua mae'a, na toe suia le taimi ma ua talafeagai, ma ua fa'afetaia fo'i sa talafeagai fo'i ma le tau na tauofo ai la'u Kamupani. Peita'i e ui ina ua umi, ae o se taimi e tatau ona talafeagai mo fausaga mautu e ao ina fausia ai le uatu, aua e tele fo'i tausaga o le a aoga ai."

 

Sa ia fa'afetaia lava le sui o le Initeria i le tatou nei malo, Lydia Faleafine Nomura, "Fa'afetai aua sa tele feuiuia'iga ma aiaiga e ao ina usitaia ma feutaga'i, ae sa le fa'avaivai lou taumafai atili, ia maua le seleni ma ia gaoioia lava lenei galuega ia mae'a e pei ona i ai nei, fa'afetai i lou malamalama ma lau pitola'au i le fa'atupega, sa e tu malosi ma fai le faiva se'ia uma le fa'amoemoe ma ua lelei mea uma!"

 

Sa saunoa fo’i le Fa'atonusili o Uafu ma Malaeva'alele Taimalelagi Claire Tuia-Poumele a'o sasao le aofia, ua aotelega i ai le fono faitulafono, le vasega o le faigamalo, le matagaluega fa'apea le mamalu lautele ma le aufaipese EFKAS Fagatogo sa latou usuina pese o le sauniga.

 

Ina ua saunoa Taimalelagi sa ia mua'i fa'afetaia Hudson mo lana aufaigaluega mo le galuega mae'ae'a ma le matagofie. Ona ia fa'afetaia fo'i lea o Hudson mo le taligamalo i le fa'amoemoe ua fa'atautaia nei, aua sa ia fa'ailoa mai, o lo'o ua saunia fa'atasi atu ai ma le 'aiga ma faleie, nofoa ma laulau e le Agaiotupu ma lana aufaigaluega. Ua le fa'aaogaina ai se tupe a le Matagaluega.

 

E tusa ai le fa'atonuga a le Kovana mai le amataga o lenei galuega ia Setema 2015 na suaina ai le eleele, sa ia fa'ailoa atu ai i le Fa'atonusili, "Ia leai ni suiga o le galuega e toe fa'alavelave i le taimi e tatau ona fa'amae'a ai e le Konekarate ia Novema 4, 2016. Peita'i, ua fa'afofoga i le folasaga a le Agaiotupu i le galuega, na feagai i latou ma tele o lu'iga a'o fa'atautaia le galuega i lona taimi atofa, e le talafeagai ai ma se galuega o lea ituaiga ona mae'a ma lelei pe afai e manatu i tatou i galuega lelei ona fausia o se Uafu e fa'aaogaina mo se taimi umi a'o aoga pea."

 

Na toe fa'atepa e ia le faigamalo ma tagata uma sa aofia i le galuega tele ua mae'a ma tatalaina fo'i a le Kolisi e tusa o le lua vaiaso ua te'a, "O lea galuega sa tulei mai le Kovana, o nei galuega fa'apenei ua tatou fausia e le mo i tatou i le taimi nei, ae o taeao ma le lumana'i mo isi fanau o le a amata soloa'i mai e fa'aaoga."

 

"O lena le agaga o lenei galuega, o fausaga matua mautu ina ia le fa'aleagaina gofie e le tau, sousou o le vasa, po'o le vevela tele o le la e pei ona tatou molimauina suiga tetele o feagai ma i tatou o le Tau. Ua fausia nei galuega, ae mataituina le lumana'i ia tagolima i o latou faiva."

 

O lana fa'afetai i uso a fa'atonusili sa tula'i mai ina ua i ai le mana'omia. Muamua le fa'afetai i le Ofisa o le Initeria ma Nomura. “Fa'afetai tele mo le tele o feso'ota'iga tau emeli mo le taumafaiga ia sa'o ma lelei le iuga o lenei galuega, lea ua mae'a fa'afetai tele mo lau fesoasoani, lou iloa o le galuega ma le manatu mai fo'i ina mae'a ma lelei le galuega."

 

Lona lua o le fa'afetai ia Faleosina Voigt, "I lou fa'aauauina ona siakia lelei o le tatou galuega, talu mai Setema 2017, ona ua tula'i ese atu ai le Inisinia fa'apitoa a le poloketi lenei, ua mae'a lona taimi na fa'atupe, ae fa'aauau mai e oe se'ia o'o i lona taunu'uga.” Na ia fa'afetaia fo'i Inisinia tofia a le Matagaluega, James Tamasese ma Natalia Palamo, aua o i la'ua fo'i sa faia le la'ua vaega mo lenei poloketi. O lana fa'afetai mulimuli mo matua fa'aleagaga o le Port Administration, "Rev Iasepi Ulu ma Leone Ripley Ulu, avea lava oulua ma matua e tulivaeina lenei matagaluega i so'o se matou fa'amoemoe ma galuega fai, e a'amia lava oulua ma talosagaina lo oulua fa'atasi mai, Fa'afetai mo le aufaipese siufofoga malie i lenei taeao i vi'iga matagofie o le Atua."

 

I le folasaga a le Kovana sili sa ia fa'ailoa ai lona agaga, "O le fa'afetai e si'i i le Atua e ona mea uma, o le tima'i fo'i lea a le Fa'afeagaiga i lenei taeao, o i tatou uma, na faia e le Atua, ia maua ai lava sona vi'iga, ae le o i tatou."

 

"Fa'afetai ua mae'a le sao o le Malo mo ona tagata ma ana tautua mo le lautele, peita'i a mae'a mea uma, o i tatou o auauna le aoga i tatou. Ae si'i atu le fa'afetai i le Atua, ma vi'ia lava o ia. Peita'i e moni lelei le tala sa mua'i saunoa i ai le Fa'afeagaiga i le tatalaina o le galuega o le Vaita'ele i le Paka Liona, e sili le to'alua pe to'atolu nai lo le to'atasi, aua a pa'u le tasi e fa'atu i luga e le isi to'alua."

 

"Lelei fo'i o lo'o pa'au mai le fono faitulafono, aua a mae'a isi galuega, ona iloa lea o isi galuega uma e ao ina fa'atino ma fa'atautaia mo le atunu'u. Lea ua tele isi tatou galuega nei ua amata, ae le'i mautu mai se tupe e fa'atino ma fa'amae'a ai. E tusa ma le $50 miliona e mo'omia e fa'atino ai isigaluega ua mae'a amata i le 2018. O le fale Leoleo lea na mu, lea ua toe fausia. O le fale Mata'aga lea ua amata, ae na'o le $600,000 na faatulaga mai e le fono e fa'atino ai, e le mae'a ai le galuega pe lua Miliona le isi vaega tupe e fa'amaea lelei ai lena galuega."

 

"Lea fo'i ua taoto mai le falefono o le Fono Faitulafono, e ao ina fausia ma fa'aleleia atili mo le soloa'i mai o nofoaiga aua le aiaiga o tulafono, fausia tulafono ma pasia tulafono e fa'atautaia ai le malo nei ae maise le lumana'i."

 

"I le taimi nei ua faia lava le fautuaga fo'i lea, tatusi lava ata ma ta'atitia e o'o atu lava i ai ua maua tupe e faia ai na galuega i lona lava taimi. Peita'i fa'afetai mo i latou uma na tofusao mo lenei galuega ua mae'a ma o le a fa'aaogaina."

 

O le 'aiga fiafia na faai'u ai, ona fa'afetai fa'apitoa lea o Taimalelagi i lana Matagaluega  sa latou fa'atasi i le fa'amoemoe, ona o le latou galeuga faifaatasi ua mafai ona sao ma uli ai lea poloketi ua mae'a.