Ads by Google Ads by Google

Tatala galuega fa’aaoga ai le La maua ai eletise i Ta’u, Manu’a


Le afioga i le ali’i kovana ia Lolo Matalasi Moliga, ma sui o le aufaigaluega a le Pulega o le Eletise ma le Suavai (ASPA) i le mae’a ai o le sauniga e tatala aloaia ai le galuega e fa’aaoga ai le malosi o le la e maua mai ai le eletise, lea ua tatalaina nei i Faleasao, Manu’a. [ata: AF]

Se vaaiga i le tapuaiga a le afioaga o Faleasao i le taimi ao fa’agasolo ai le sauniga e fa’apaia ai le galuega lea ua mae’a ona fausia, o le fa’aaoga lea o le malosi o le la e maua mai ai e le eletise e ola ai le Faletolu i Ta’u, Faleasao ma Fitiuta i le eletise. [ata AF]

Se vaaiga i le aufaigaluega a le Pulega o le Eletise ma le Suavai (ASPA) sa gafa ma le fausiaina o le galuega tele i Faleasao, Manu’a, o le fa’aaogaina lea o le malosi o le la e maua mai ai le eletise, fa’atasi ai ma ta’ita’i o le atunu’u e aofia ai le Faipule i le laumua i Uosigitone ia Aumua Amata, fa’apea ai le Ta’itaifono o le Komiti Fa’afoe a le ASPA, Fonoti Perelini. [ata AF]

Se vaaiga atu na i panel ia ua mae’a ona fausia i Faleasao, Manu’a latou te aoina mai le malosi o le la, e gaosi ai le eletise mo le sapalaiina o le eletise i totonu o le Faletolu i Faleasao, Tau ma Fitiuta, e pei ona tatalaina ai lenei galuega tele i le taeao ananafi i Faleasao. [ata AF]
ausage@samoanews.com

Na tutu fa’atasi ta’ita’i o le malo fa’apea ai ta’ita’i o le itumalo o le Manu’atele e molimauina se tasi o galuega tele ua mae’a nei ona fausia i Faleasao, Manu’a, o le fa’aaogaina lea o le malosi e maua mai i le La e gaosi ai le eletise mo le Faletolu, ae fuafua ai fo’i le aso e tatala ai le galuega fa’apea i le Luanu’u i Ofu ma Olosega/Sili, lea fo’i ua toeititi lava mae’a.

 

O se sauniga lotu puupuu e tatalaina ai lenei galuega tele, na ta’ita’ia lea e le susuga i le ali’i Faifeau ia Rev. Elder Iosefa Autele, mai le Ekalesia EFKAS i Faleasao, lea na ia fa’atauaina ai le aoga o galuega na faia e le Atua i le amataga, lea ua mafai ai ona tu’u fa’atasi ma galuega ua fausia e le tagata, ina ia maua mai ai ni isi fo’i mea lelei e tausia ai le soifua lelei o tagata o le atunu’u.

 

O sui o le malo na auai i lenei sauniga e aofia ai le afioga i le ali’i kovana ia Lolo Matalasi Moliga ma sui e to’atele o lana Kapeneta, fa’aepa ai le afioga i le Faipule mai le laumua i Uosigitone, tofa Aumua Amata, tainane afioga i Senatoa ma Faipule mai le Fono Faitulafono.

 

Na taua e le afioga i le ali’i kovana i lana saunoaga e fa’apea, ina ua fa’atoa tula’i mai le la faigamalo ma Lemanu i le 2013, o le lu’i muamua lava na ia tu’uina atu i le afioga a Utu Abe Malae, o le saili lea o se auala e fesoasoani ai i le atunu’u i le fa’ataugofieina o le tau o le eletise ua fai si maualuga.

 

“Lea la ua tula’i mai lenei galuega tele, ua le toe i ai se fa’alagolago o le Faletolu i le eletise e maua mai i le suau’u, ae ua fa’alagolago lava i le eletise e maua mai i le malosi o le La, ma o se galuega e tatau ona tatou mitamita uma ai”, o le saunoaga lea a Lolo.

 

Sa ia fa’ailoa fo’i i le Itumalo aemaise ai le atunu’u na mafai ona molimauina lenei sauniga e fa’apea, e le fa’apea o le kovana e sau mai Manu’a ona manatu lea e ave le fa’amuamua i atina’e tetele nei i Manu’a, ae o le agaga, ia amata ona fausia ni galuega tetele fa’apenei mo le atunu’u, ma afuafua mai ai isi fo’i galuega lelei mo le lumana’i.

 

O lenei galuega na fausia lea e le konekarate mai Amerika e taua o le “Solar City”, ma e tusa ma le $8 miliona le tauaofa’i o lenei galuega tele, e pei ona fa’amanino e le Pulesili o le Ofisa o le Pulega o le Eletise ma le Suavai (ASPA) i lana saunoaga, afioga i le Matua ia Utu Abe Malae.

 

Saunoa Utu e faapea, mai le tele o tausaga o taumafai mai le ASPA e fuafua le fa’ataotoina o lenei galuega, o le vaiaso nei lea ua molimauina ai e Amerika Samoa le mafai lea ona fa’aaoga le malosi o le La e gaosi mai ai le eletise e fa’aaoga mo le itumalo o Manu’a i le Faletolu i Faleasao, Ta’u ma Fitiuta.

 

E 5 vaega eseese o lenei galuega tele, lea na amata fausia mai i le tausaga na te’a nei, ma o vaega e 5 o lenei galuega tele e aofia ai panels ia e pu’e mai ai le malosi o le La ina ia maua mai ai le eletise; o ma’a e fa’aaoga e ola masini e mumu uma ai le Faletolu; o le vaega tolu o le galuega, o afi eletise o lo o fausia i Faleasao, lea na muamua fa’aaoga e ola ai le Faletolu ao lei fausia lenei galuega tele; o le fausiaina lea o uaea mo fesootaiga tau i le eletise; ma le vaega lona 5, o uaea mo fesootaiga tau initaneti.

 

E ui o le vaega tele o le tupe na fa’atupe ai lanei galuega na maua mai lea i le Pone a le malo, peita’i na saunoa Utu e fa’apea, o le 80% o le tupe na fausia ai lenei galuega, o tupe na aumai i le au totogi pili a le ASPA, lea na auala mai i le Komiti o le Atina’e (ASEDA), lea na pasia e le Kovana ma fa’amaonia e le Fono Faitulafono, ma mafai ai loa ona fa’atinoina lenei galuega tele.

 

“O le talitonuga o le ASPA i galuega tetele fa’apenei, soo se galuega e lelei ma aoga mo Tutuila, e tatau fo’i ona fausia mo Manu’a”, o se vaega lea o le saunoaga a Utu na fa’alogoina ai le tau fai pati o le aofia na molimauina lenei sauniga taua.

 

O le aso Lua na te’a nei na tape ai afi eletise o lo o ola i le suau’u i Faleasao, ae fa’ata’ita’i ona fa’aaoga le eletise o lo o maua mai i le malosiaga o le La, ma molimauina ai le tulaga lelei ma le manaia o le galuega, lea fo’i na fa’aaoga i le taimi na fa’atinoina ai le sauniga ananafi.

 

“Fa’afetai atu i le itumalo o Manu’a i lo outou onosa’i aemaise ai o le lagolago i lenei taimi tele na taumafai ai le fausiaina o le galuega, e ui e le o se galuega e faigofie, ae ua mafai ona fa’atinoina ona o lo outou lagolago aemaise ai o le nonofo tatalo”, o le saunoaga lea a Utu.

 

Na fa’amanino atili fo’i e Utu i lana saunoaga e fa’apea, o le fa’anaunuaga o lo o i ai a le Komiti Faapitoa lea na tofia e le Kovana e saili auala e aumai ai i lalo le taugata o le tau o le eletise i Amerika Samoa, e tatau ona oo atu i le 2040 ua ola uma Amerika Samoa i le eletise e maua mai i le malosi o le La, ina ia taofia ai loa le toe fa’aaogaina o afi e ola i le suau’u.

 

Na fa’afetaia e le Pulesili o le konekarate o le Solar City ia Jon Yoshimura le galuega ua mafai ona fausiaina i Manu’a, lea fo’i o le a mafai ona taofia ai le toe fa’aaogaina o le suau’u o lo o fa’atauina mai i maketi eseese o le lalolagi.

 

Na taua e Yoshimura e fa’apea, o le eletise o lo o maua mai i le suau’u, e le gata e a’afia ai le soifua maloloina o tagata ma le siosiomaga, ae taugata fo’i i ni isi o taimi, aua o le tele o le suau’u e fa’atau mai e Amerika Samoa e gaosi ai lana eletise, o le tele fo’i lena o le tupe a le atunu’u e alu i atunuu eseese o loo maua mai ai e le suauu, peita’i o le galuega lenei ua fausia i Faleasao, e le gata ua maua ai le eletise mama, ae o le a nofo fo’i i Amerika Samoa tupe o lo o maua mai ai, e le toe alu i atunu’u eseese o le lalolagi sa fa’atau mai ai le suau’u.