Tatala Falepuipui fou e silia i le $3 miliona na fausia ai i Tafuna


Leoleo o le toese i Tafuna [ata AF]
ausage@samoanews.com

E ui o le aso ananafi o se aso fa’anoanoa lea i le tala fa’asolopito o Amerika Samoa, ona o le aso lea na atoa i ai le 7 tausaga talu ona tuana’i le galulolo na osofaia ai le atunu’u ma maliliu ai soifua e to’a 34 i le taeao o le aso 29 Setema 2009, peita’i na avea ma aso fiafia mo le aiga toese, ina ua mafai ona tatala aloaia ai le falepuipui fou mo le vaega o pagota ali’i i Tafuna, lea e silia i le $3 miliona le tupe mai le Ofisa o le Initeria na fausia ai, ae to’a 114 le aofa’i o pagota e mafai ona ofi uma ai i totonu o lenei fale fou.

 

E to’atele Ta’ita’i o le atunu’u na latou molimauina lenei sauniga taua, e aofia ai le afioga i le ali’i Kovana ia Laolo Matalasi Moliga ma le faletua ia Cynthia Moliga, le afioga i le Lutena Kovana ia Lemanu Peleti Sialega Mauga, fa’apea ai ma sui o le Kapeneta,  Peresetene o le Senate ia Gaoteote Palaie Tofau, le afioga i le ali’i senatoa ia Laolagi Fonoti Savali Vaeao ma ni isi o afioga i ali’i Faipule o le maota o sui.

 

Sa fa’apea fo’i ona auai le Failautusi o le Ofisa o Mataupu Tau Samoa, le afioga i le Maoputasi ia Mauga Tasi Asuega.

 

Na saunoa le Komesina o Leoleo e fa’aleo le agaga fa’afetai i le malo, e tusa ai o lenei galuega tele ua mae’a.

 

Na fa’afetaia e le afioga a Save Liuato Tuitele le faigamalo a Lolo ma Lemanu, ona o le naunau e fausia lenei falepuipui fou mo le mamalu o le atunu’u o lo o aumau ai i le toese, ma e ui i le tele o fa’asea mai le atunu’u i le tele o nei tupe ua fa’aalu e le malo e fausia ai lenei falepuipui, ae i lona talitonuga, o se galuega ua lelei ma matagofie lona fuafuaina.

 

“E ui o le falepuipui, o se nofoaga lea e tu’u i ai tagata ua fa’amaonia a latou solitulafono, peita’i ua le muta ai iina la oulua silasila, ae ua lua vaai mamao i Tama ma Tina, uso ma tuafafine, atoa ai ma fanau o le atunu’u o lo o aumau ai i lenei nofoaga, ona o le tuliina o a latou fa’asalaga, e mafua mai i le sese o fa’aiuga ua latou faia”, o le saunoaga lea a Save.

 

Na fa’afetai fa’apitoa fo’i le ali’i komesina i le sui o le Ofisa o le Initeria i Amerika Samoa ia Lydia Nomura Faleafine, ona o le alagatupe ua mafai ona fausia ai lenei galuega tele.

 

O le agaga fa’afetai lava fo’i lea na fa’aleoina e le afioga i le ali’i kovana, ina ua maua le avanoa e tulei saunoa ai. E le gata sa ia fa’afetaia le konekarate sa fausia le galuega, atoa ai ma le ofisa o le Initeria e tusa ai o le tupe, ae sa fa’apitoa lana fa’afetai i le Fa’atonusili o le Ofisa o Galuega Lautele a le malo ia Faleosina Voigt, ona o le ulua’i galuega lenei ua tusia i Amerika Samoa sona ata ae fausia i tupe mai le malo tele.

 

O se tala e fa’amomoi loto le saunoaga a le ali’i kovana, i le mafua’aga na ala ai ona unaia lona lagona e fau se falepuipui mo le mamalu o le atunu’u o lo o aumau i le toese i Tafuna, ina ua ia maitauina tulaga fa’aletonu o lo o i ai fale o lo o nonofo ai pagota, i le taimi o lana ulua’i asiasiga i totonu o le falepuipui i le masina o Tesema 2013.

 

“O la’u ulua’i asiasiga i le falepuipui i le 2013, na ou vaaia ai se fa’aletonu e le fia vaai i ai ni ta’ita’i o le malo ma le atunu’u, ina ua matou molimauina tagata pe to’a 20 o lo o nonofo i le isi fale o lo o i luma, toeititi lava ti’eti’e le isi tagata i luga o le isi tagata, o se vaaiga e matua fa’amomoi loto ma le talafeagai, o le mafua’aga lena na ou valaauina ai loa le Komesina o Leoleo i lena vaitaimi ia Viliamu [William E. Haleck], e saili se auala e fofo ai le fa’afitauli”, o le saunoaga lea a Lolo

 

Saunoa le al’i kovana e fa’apea, e 3 aso talu ona tuana’i le la talanoaga ma le ali’i Komesina, ae fo’i atu Viliamu ma le ata o le falepuipui, ae ina ua ia fesili i ai pe fia le tau e fausia ai le falepuipui lea o lo o i totonu o le ata, ae tali Viliamu e $15 miliona.

 

“O la’u tala sa fai ia Viliamu, lona uiga e uma lelei ona fa’asolo pagota ia i le lagi e le i uma lava ona fausia le falepuipui na e sau ma oe, alu e toe mafaufau ma toe saili mai se isi ata mo se galuega taugofie”, o le saunoaga lea a Lolo i le la fetaliaiga ma le ali’i Komesina, mulimuli ane ina ua toe faia le isi a latou feiloaiga ma isi uma Ofisa o le malo fa’apea ai ma le sui o le Initeria, na maua ai loa ma le vaega tupe lea ua mafai ai ona fausia le galuega.

 

“Ua tele fesili ma fa’asea a le atunu’u i le media ma a latou faipule, pe aisea e fau ai fua lenei fale, ou te le o mafaufau e tali i tagata fa’asea fa’apea, ae o la’u tala ia te outou ia e fa’asea, o i le Falesa o lo o latalata ane e lolotu ai, ona ta’u atu loa lea e le Faifeau mafua’aga e fau ai e le malo fale fa’apea, ae o le agaga fa’afetai i le Atua, o Tama ma Tina, uso ma tuafafine atoa ai ma fanau e pele i loto ma agaga o aiga, ma e ui ua vavae ese mai i latou iinei, ae tatau pea lava ona manatua i latou”, o le saunoaga lea a Lolo na fa’alogoina ai le tau fai pati pati o ali’i pagota sa auai ma molimauina lenei sauniga taua.

 

Na taua e Gaoteote i lana saunoaga e fa’apea, o tupe alu aoga tupe ia ua fa’aalu e le malo e fausia ai le falepuipui fou lenei, e tausi ma tu’u fa’alelei ai tagata o le atunu’u ua nofosala, “e ui o lo o tele fo’i isi tagata nofosala e le i maua lava”.

 

O le kamupani fau fale a le Jay’s Fashion Statement dba B&J Construction na fausiaina lenei galuega tele, i lalo o le ta’ita’iga a le susuga a Mr. Diosdado Guevarra, lea e $3,117,208.66 lona tau aofa’i, ma le ata sa tusia e Inisinia a le Matagaluega o Galuega Lautele a le malo.

 

E pei ona taua i le ripoti o le galuega, e tusa ma le 24 le aofa’i o sela o lo o i totonu o le fale fou lenei, lea e ta’ito’a 4 pagota e mafai ona taofia ai i totonu, 1 le isi ituaiga sela e taua o le ADA, poo le sela lea e taofia ai i latou e i ai gasegase o le mafaufau, fa’apea ai ma sela e 10 e fa’apitoa mo i latou e fa’atinoina solitulafono mamafa.

 

E ea malulu isi vaega o le falepuipui fou, e tofu uma fo’i vaega eseese me masini pu’eata ua mae’a ona fausia mo le mata’ituina o gaioiga uma a pagota.

 

Na fa’ai’u le polokalame i fa’afiafiaga fa’aevagelia na fa’atinoina lea e pagota, ma viiga o le Atua na saunia e le aufaipese a pagota ua taua o le Amazing Grace, lea o lo o i lalo o le ta’ita’ia a le susuga ia Iose Auva’a.

Comment Here