Ads by Google Ads by Google

Tatala fa’aaliga oloa pisinisi, fagotaga ma fua o fa’ato’aga


O le tama'ita'i o Ashley Sherman o le Practical Employee Solutions lea ua amata fa'atumu ana talosaga mo galuega a le fanau i Amerika, afai e te fia talanoa i sou avanoa, va'ai le fale'ie lea e i ai lea tama'ita'i i le malae o le Suigaula o le Atuvasa i Utulei i lenei vaiaso i le fa’aaliga a pisinisi. [ata: Leua Aiono Frost]
ausage@samoanews.com

O le ulua'i aso mo le fa'aaliga o oloa mo fefa'ataua'iga, fagotaga ma fua o fa'aeleeleaga, ae maise o tautua eseese o lo'o ofoina e kamupani Tumaoti i le atunu'u fa'atasi ai ma tautua a le Malo, ua fa'aalia uma i le Malae o le Su'igaula a le Atuasa i Utulei.

 

O lo ua va'aia fo'i le gasolo atu o pisinisi eseese ma a latou oloa gaosi, o oloa e fia fa'atau atu, oloa o lo'o taumafai ona gaosia ma ua fa'alauiloa aloa'ia i lea fa'aaliga, peita'i o ala fo'i o faigafaiva eseese ma ogasami o lo'o mafai ona fagotaina, ua saunia sui iloga e fa'amatala auiliili i so'o se tasi e fia malamalama i lena itu, ua i ai uma i lea malae e afua i le taeao ananafi se'ia pa'ia le aso Faraile o lenei lava vaiaso.

 

E le gata i lea, ua mafai ona folasia ai ma fua o fa'aeleeleaga ina ia fa'aalia ma fa'atau atu i le mamalu lautele o le atunu'u. Peita'i o lea vala o le tautua, e tatala le fa'aaliga tele i le aso ananafi, e le'i va'aia lava ni fua o fa'ato'aga.

 

I le sauniga sa tatala ai le fa'aaliga, sa auai le afioga le Kovana Sili Lolo Matalasi Moliga, Lutena Kovana Lemanu Peleti Mauga ma sui o le kapineta.

 

O le tatalo amata na tapena i ai le susuga le Tiakono Malaki Timu o le Ofisa o le Kovana,  ona soso'o ai lea ma se saunoaga fa'apitoa a Lemanu e tusa ai o le fa'amoemoe, e fai o ia ma sui o le kovana.

 

"Ia tatou fa'aaoga tatau nei avanoa lelei ua tatou maua, e galulue feso'ota'i ai mo se manuia o le tatou malo ma ona tagata. O le tautuaina o le tatou atunu'u o le tatou faiva alofilima lea. Po'o a lava manaoga i o tatou aiga ta'itasi, e tatau ona mafaia e i tatou le 'au faipisinisi ona sapalai mai. Ia matala fo'i avanoa mai le malo mo le 'au faipisinisi ina ia tautuaina ai le atunu'u. O le tatou faiva fai fa'atasi le auaunaga o tagata uma i totonu o lo tatou atunu'u atoa."

 

O le saunoaga fa’apitoa mai le CEO o le Ofisa o Feso’otaiga, ASTCA, Puleleiite Liamatua Tufele. sa ia mua'i fa'ailoa ai le tulaga ua i ai nei le so'otaga fa'ainiteneti, so'otaga tau telefoni, ma le tulaga ua i ai nei lea tautua. Sa ia fa'afetaia fo'i le lava onosa'i o le Malo, faipisinisi ma le mamalu lautele o le atunu'u a'o taumafai i latou e fa'aleleia le tautua.

 

Sa ia saunoa fo'i e tusa o le Hawaiki Cable ma lena itu o le auaunaga ma lona aoga tele i le aufaipisinisi ae maise tagata lautele ma le Malo. Ina ua mae'a sa ia fa'afetaia le galuega tele sa nafa ma le to'atele o le aufaigaluega sa mua'i faia nei faiva i totonu o le matagaluega lenei a'o le'i o'o mai i lenei vaitau. "O la outou tautua, o lo'o manino le ata e pei o lena fetalaiga, e fa'amanuia le Atua i le auauna gapatia ai a'o le'i o'o mai i lenei fo'i vaitau. Peita'i o le a taumafai pea ia fa'aauau galuega lelei."

 

I lea fa’aaliga a pisinisi, ua tele fo'i ni fale'aiga ua fa'amautu atu i ai, ina ia tali fo'i le mana'o ma le galala i le fia taumafa o le atunu'u e maimoaina lea nofoaga e afua atu i le 10:30 ananafi se'ia pa'ia le aso Faraile i le afiafi e tapunia ai.

 

O fa'afiafiaga fo'i a aoga autalavou ma fa'alapotopotoga uma ua mae'a ona fa'aulu, o le a maimoaina lea i le afiafi o le aso ma le aso Faraile nei.

 

Peita'i i se tasi o vala o nei tautua ua mae'a fa'atula'ia i Utulei, ua mafai ona fa'atuina ai se laulau ma ua nofoia e tama'ita'i papalagi mai Le Kamupani a le PEC po'o le Practical Employee Solutions, o ia lea e suafa ia Ashley Sherman, ua o'o mai ina ia fa'atutumu ni talosaga a nisi o tatou alo ua fia maua ni galuega e faigaluega ai i Amerika.

 

O lo'o fia maua se to'a 200 o talosaga mai fanau sa soifua a'e i Amerika po'o Amerika Samoa lava. O i latou ua silia ma le 18 tausaga le matutua. O lo ua fa'ailoa mai, e totogia lava e i latou pasese ma avatu nei sui e faigaluega i fafo, ua mae'a tapena fo'i i latou mo ni fale e nonofo ai lava nei fanau ma usu ane e faigaluega. O se avanoa lelei lea e tou te sailia ai lea nofoaga i totonu o le malae i Utulei ma fa'atumu lau talosaga.

 

O se tala fiafia lea i le to'atele ua mae'a fa'ailoa mai e malaga i le po o le aso Tofi nei, ma o le a malaga fo'i isi i le aso Gafua. Ua atoa le 100 o tama ma teine ua mae'a faia lea filifiliga ma o le a malaga. O le isi vaega, e malaga fa'atasi ma nei papalagi na masi'i mai, ae o le isi vaega e malaga atu ma le sui tofia mai le matagaluega o tagata faigaluega a le Malo.

 

Fa'ailoa mai e Kovana Lolo, "O lo ua ou taumafai lava ina ia faasalafa lea avanoa mo le fanau fo'i sa soifua ae i Samoa ma Toga po'o Fiti fo'i, peita'i, ua latou fa'ailoa mai e faigata lava pepa. Ae le o muta ai le taumafaiga, e i'u lava ina mafai, talosia lea tulaga ua tatala mai i se taimi o i luma."