O le taeao ananafi na tatala aloaia ai le Fale Televise fou a le Ekalesia Aso Fitu i Amerika Samoa, i lona nofoaga autu i le afioaga i Vaitogi, le nofoaga autu lea sa i ai muamua le Fale Televise a le PCS-TV sa pulea e le susuga ia Bill Hyman, lea ua suia nei lona igoa i le Hope Channel.

O le tatalaina ai o le Fale Televise fou a le Ekalesia Aso Fitu o le Toe Afio mai i Amerika Samoa i lenei vaiaso, o se tasi lea o gaioiga ua mafai ona fa’atinoina i le vaiaso lenei, lea fo’i ua tatala aloaia ai le ulua’i Fonotele a le Ekalesia, e pei ona tatala aloaia ai i le po anapo i lona laumua i Iakina.

O le afioga i le Lutena Kovana ia Lemanu Peleti Mauga na fai ma sui o le malo i le sauniga e tatala aloaia ai lenei fa’amoemoe, lea fo’i sa mafai ona molimauina e le Ta’ita’i o le Ekalesia mai isi atunu’u e aofia ai Amerika ma Samoa.

O le mae’a ai o le sauniga lotu e tatala aloaia ai lenei fa’amoemoe, lea na saunoa e le susuga Pr. Sione Ausega, o le Failautusi Aoao lea o le Misiona Samoa, na sosoo ai loa ma le saunoaga autu o le aso, lea na saunoa i ai le afioga ia Lemanu.

Na taua e Lemanu i lana saunoaga le taua tele o lenei atina’e ua taumafai i ai le Ekalesia, ina ia mafai ai ona faasoa atu le Talalelei a le Atua i soo se itu o le atunu’u, ina ia avea o se auala e toe fa’amanatu ai i tagata uma le taua o le fa’aolataga na saunia e le Ali’i mo Samoa ma le lalolagi.

Sa ia fa’aaogaina fo’i le avanoa na ia maua i le taimi o lana saunoaga e fa’afetaia ni isi o le Ekalesia na asia i laua ma le Tina o le aiga ao fa’ataotolia ai si ona faletua i Hawaii. Saunoa Lemanu e fa’apea, o le aufaipese lava na muamua atu e asi ma ofo atu pesega ao la i ai i le falema’i ma lona faletua, o le aufaipese a le Ekalesia Aso Fitu.

E ui o lea fa’atoa tatala aloaia se Fale Televise a le Ekalesia i Amerika Samoa nei, peita’i na taua e le Failautusi Aoao o le Ekalesia ia Pr. Ausage i lana saunoaga, le tele o tausaga na taumafai mai ai le Ekalesia Aso Fitu i Samoa e tau atina’e mai tulaga o fa’asalalauga i luga o televise ina ia mafai ai ona momoli le feau o le Talalelei.

O le tausaga e 2011 na tatala aloaia ai le Fale Televise a le Ekalesia Aso Fitu i Samoa i luga o le afioaga i Tiapapata, ae o le vaiaso nei lea ua tatala aloaia ai le Fale Televise a Amerika Samoa ma le fa’anaunauga o lo o i ai, o se taimi o i luma e tatala ai le auaunaga tau Leitio.

Na taua e le susuga a Hyman i se fa’atalatalanoaga ma le Samoa News lona fiafia tele ina ua mafai ona taunu’u lana moemitiga ua leva ona i ai, o le fa’atau atu lea o lana Fale Televise i se Ekalesia e fa’aauau ai le faasalalauina o polokalame Fa’a le Ekalesia.

I le amataina mai ai o le kamupani a le PCS-TV i Vaitogi i le 10 tausaga talu ai, na tasi lava le autu na mafua ai ona tatalaina lenei tautua e pei ona taua e Hyman, o le fa’aaogaina lea e fa’asalalau ai polokalame fa’alelotu.

“Sa fa’aaogaina le tautua a le Channel 11 e fa’asalalau ai polokalame a le matou Talitonuga Baha’i, ae ina ua amata ona fetaia’i a’u ma fa’afitauli tau tupe i ni nai tausaga e le’i mamao atu, na ou manatu ai loa e sili ona fa’atau ese atu le Fale Televise ina ua ou le toe gafatia ona fa’atupeina”, o le saunoaga lea a Hyman.

O le Channel 11 a le susuga a Hyman sa masani ona fa’asalalau tu’usa’o mai ai ta’aloga lakapi e aofia ai ta’aloga ta’ito’a 7 a le IRB, fa’apea ai ta’aloga fusuaga e aofia ai ma fusuaga a le susuga ia David Tua.

“E to’atele isi tagata faipisinisi ma kamupani tua sa latou manana’o e fa’atau la’u Fale Televise, peita’i sa fa’atuatuai pea lava lo’u taofi, ona sa ou manatu, o le kamupani latou te fa’atauina le Fale Televise lenei, e tatau ona latou fa’aauauina polokalame fa’alelotu na mafua ai na ou naunau e fa’avae lenei fa’amoemoe, ae ina ua aga’i mai le Ekalesia Aso Fitu ma fa’ailoa mai lo latou naunau e fa’atau le Fale Televise, sa ou ioe loa i ai ma fa’agasolo loa feutana’iga mo le fa’amautuina o fuafuaga uma”, o le saunoaga lea a Hyman.

O le ala ata a le Ekalesia Aso Fitu lea sa fa’asalalauina i luga o le cable a le kamupani o le BlueSky i le channel 45, mulimuli ane toe suia i le channel 61, ua fa’asalalauina nei i luga o le channel 11.