Ua toe si’itia e le Bluesky Communications lana tautua ina ia oo i lona tupulaga lona fa, 4G+ ma ua fa’amau fa’ailoga ai, ua faaleleia atili le tautua fa’atekonolosi e fa’aaogaina ai telefoni fe’avea’i, i so’o se taimi.

O lona uiga ua fa’aleleia atili le manino o ata e pu’e i lau telefoni, fa’aleleia atili ma vave fo’i le pue’ina ai o au ata video, mafai ona e lafoina atu lau ata i so’o sau uo mamae i le lisi o au uo i le Facebook, mafai fo’i ona e pu’ea le ata video  a’o mamata mai tagata o lo’o feso’ota’i ma oe i luga o le initeneti.

E le gata i lena, ua mafai ona lava lelei le malosi’aga o lau telefoni fe’avea’i e pu’e ai sau ata tifaga e matamata pe a maua sou avanoa, faia au tusitusiga pe telefoni foi, talanoa ma pu’e atu lou ata e fa’aaoga ai le Skype.

O nei mea uma, sa amata mai lava i lona tupulaga muamua. Peita’i, o lea ua tatou tulaueleele lelei i le tupulaga lona 4G+ ma ua gafatia fo’i e le Bluesky ona fa’amanino atili talanoaga i telefoni i nu’u uma o Tutuila fa’apea ma le Manu’atele.

E le gata la ina fa’aleleia atili nei mea uma sa mua’i fa’atula’ia mai le 2G ma le 3G, ae ua fa’atelevave atili le so’otaga ma felavasa’iga o laina o feso’ota’iga fa’atekonolosi e le 4G+ lea ua tatou tulaueleele nei i ai.

Ina ia matua mautu lou maua a’ia’i o nei mea uma, ua mana’omia ona i ai sau telefoni o le ituaiga 4G LTE, ua mafai fo’i ona fa’aleleia atili le telefoni ituaiga 3G ina ia gafatia ona fa’aaoga ai auaunaga nei a le 4G+. Ua aumaia fo’i e le Bluesky nei ituaiga telefoni i le atunu’u.

I lau telefoni 4G+ LTE, e mafai ona tu’uina i ai le “sim card” e gafatia ona tau’avea le tele o ituaiga polokalama nei ua mae’a fa’aleleia e ausia ai e lou sui poo lau telefoni ona fa’atino uma galuega e tusa o le si’itaga 4G+.

Ua fa’ailoa mai e le Bluesky,  i le afiafi a tamalii sa poto ai le atunuu i le Lee Auditorium,  i le afiafi o le aso Lulu, sa matua fofola a’ia’i mai ai i le mamalu o e na aofia, “Fa’aaoga lou Sa’olotoga!”

“O lou sa’olotoga i tulaga o tautua fa’atekonolosi ina ia fa’aleleia le auaunaga mo oe, ma fa’ata’alise fo’i ona maua so’otaga ina ia vave ona tapena au fuafuaga fa’apisinisi ma so’otaga e ao ina fa’amautu e fa’aaogaina ai lau Initeneti po’o lau telefoni pe afai oe tu’ua lou ofisa.” Sa maimoaina fo’i ata fa’asolo, e fa’ailo ai lea si’itaga o le tautua, ma le saoasaoa fo’i ua fa’ataunu’uina ai.

Sa aofia mai le fa’auluuluga atoa o le Bluesky Toleafoa Douglas Creevey ma nisi o sui mamalu o le Bluesky Samoa ina ia sapaia le fa’alaua’itele o le 4G+ i Amerika Samoa nei.

Saunoaga le afioga le Lutena Kovana Lemana Peleti Mauga, e fa’ailoa ai le agaga fa’afetai o le malo ona o le sogasoga o le Bluesky i lana manulauti sa mua’i fa’atula’i mai o tau’ave pea, “Ia avea ma Kamupani latou te lagalaga ma fa’ataunu’u mai tautua lelei e aga’i ai i luma le so’otaga a Amerika Samoa ma atunu’u e mamao e ala i le initeneti ma telefoni fe’avea’i. E ui ina lutaluta le tai i le folauga a le kamupani, ae  o lo’o fa’ataunu’u pea lava lo outou faiva, fa’afetai o lea fo’i ua outou mua’i si’itia le auaunaga i le 4G+ i lenei tausaga.”

Ae na fa’amaea le tautalaga fa’apitoa a Lemanu e faapea, “Ia fa’amuamua mai Amerika Samoa, ae le o le fa’amuamua o Samoa!”

Saunoaga a Toleafoa sa ia fa’ailoa ai, “E ala ona muamua tatala i Samoa, ina ia tafitafi uma ese ni fa’aletonu mai le auaunaga. A fa’ata’ita’i atu loa e i ai nai fa’aletonu, ia ona fa’aleleia atili loa lea, ae fa’aulu mai i Amerika Samoa, ua atoatoa ona lelei le si’itaga o lenei tautua fa’atekonolosi.”

Saunoa le tama’ita’i pule o le Blusky i Amerika Samoa, Filifotu Va’ai-Tinitali e faapea,  “E ui ina fa’aletonu i nisi taimi le tautua, ae sa outou onosa’i ma mau fa’atuatuaina pea lava i matou e fa’o’o mai le auaunaga i lenei taimi, ua tatou aeae fa’atasi ai lea fo’i si’itaga fou ua matou fa’o’o maia, ia fa’aleleia atili ala e matou te tautuaina ai oe.”

I le vaega uma sa auai i le Lee Auditorium, na mafai ona feso’ota’i ma le Initeneti ua fa’aigoaina o le “Freedom” ma iloga ai le eseesega tele o le vave ma le si’itia o le tautua ua i ai nei i le 4G+ a le Bluesky Communications.

Ina ua talisua le mamalu sa aofia, ae mafuli loa le Bluesky i lana polokalama fa’ataoto e fa’afiafia ai e na vala’aulia fa’apitoa mo le latou aso. O le ausiva matagofie a le Aoga Maualuga a Faasao Malisi sa saunia siva fa’asamoa moni mo le afiafi a tamali’i, ae o le alo fo’i o le atunu’u, SpawnBreezie, Anapogi Fau o lo’o alaala tumau nei i Independence Missouri, ae o le alo lava o Samoa, e matua lelei fo’i lana saunoa i le Gagana Samoa, ina ua ia fa’ailoa mai lona lagona e tusa ai o lenei taumafaiga, “A ou i ai i Amerika e tele na’a kamupani telefoni fe’aveai ma Inibenti, peita’i, lea ua ou sau i Amerika Samoa ma Samoa fo’i, o lo’o i ai le Bluesky Communications, fa’afetai mo lenei vala’au fa’apitoa mo a’u, ou te pese ma fa’afiafia ai i o’u tagatanuu.”